ކިރްގިސްތާން ބަލިކޮށް، އެއް ވަނައިގައި ރާއްޖެ ސެމީ ފައިނަލަށް

ރާއްޖޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމަންސް ކަޕްގައި ރާއްޖެ އިން ކުޅުނު ތިން ވަނަ މެޗުގައި ކިރްގިސްތާންގެ މައްޗަށް ވެސް ކުރި ހޯދައިފި އެވެ.

ހަތަރު ޤައުމު ވާދަކުރާ މުބާރާތުގައި ރާއްޖެ އިން ކުޅުނު ފުރަތަމަ މެޗުގައި ވަނީ ބަންގްލަދޭޝްގެ މައްޗަށް ސީދާ ތިން ސެޓުން ކުރި ހޯދައިފަ އެވެ. ދެ ވަނަ މެޗުގައި ރާއްޖެ އިން އަފްޣާނިސްތާންގެ މައްޗަށް ވެސް ސީދާ ތިން ސެޓުން ކުރި ހޯދިއިރު، ރާއްޖެ އިން ވަނީ މޮޅު ކުޅުމެއް ދައްކައިފަ އެވެ.

ލީގު ބުރުގެ ތިން ވަނަ މެޗުގައި ހޯމަ ދުވަހުގެ ރޭ ރާއްޖެ އިން ނިކުތީ ކިރްގިސްތާނާ ދެކޮޅަށެވެ. ކިރްގިސްތާން އިން ވެސް ވަނީ ބަންގްލަދޭޝް އަދި އަފްޣާނިސްތާނާ ދެކޮޅަށް ކުޅުނު މެޗުން ސީދާ ތިން ސެޓުން މޮޅުވެފަ އެވެ. ޒުވާނުންގެ މަރުކަޒުގެ އެތެރޭ ކޯޓުގައި ކިރްގިސްތާނާ ދެކޮޅަށް ކުޅުނު މެޗު ރާއްޖެ އިން ކާމިޔާބު ކުރީ ތިން ސެޓު އެއް ސެޓުންނެވެ.

މެޗުގެ ފުރަތަމަ ސެޓު ކިރްގިސްތާން އިން ކާމިޔާބު ކުރީ 25-15 އިންނެވެ. ނަމަވެސް، ރާއްޖެ އިން ވަނީ ފަހަތުން އަރައި ޖެހިގެން ކުޅުނު ތިން ސެޓު ވެސް ކާމިޔާބުކޮށް މެޗުން މޮޅުވެފަ އެވެ. ވާދަވެރި ކުޅުމަކަށް ފަހު 23-25 އިން ދެ ވަނަ ސެޓު ކާމިޔާބުކޮށް ރާއްޖެ އިން ސެޓުގެ ގޮތުން ހަމަހަމަ ކުރި އެވެ.

ޖެހިގެން ކުޅުނު ތިން ވަނަ ސެޓާއި، ހަތަރު ވަނަ ސެޓުގައި ރާއްޖެ އިން ވަނީ ހިތްވަރުކޮށް، މޮޅު ކުޅުމެއް ދައްކައިފަ އެވެ. އެގޮތުން ތިން ވަނަ ސެޓު 19-25 އަދި ހަތަރު ވަނަ ސެޓު 22-25 އިން ކާމިޔާބުކޮށް ރާއްޖެ އިން ވަނީ މެޗުން މޮޅުވެފަ އެވެ. މިއާ އެކު، މުބާރާތުގެ ސެމީ ފައިނަލަށް ރާއްޖެ އިން ދަތުރު ކުރީ އެއް ވަނަ ޓީމުގެ ގޮތުގަ އެވެ.

މުބާރާތުގެ ސެމީ ފައިނަލްގެ ފުރަތަމަ މެޗުގައި ބުދަ ދުވަހުގެ ހަވީރު ރާއްޖެ އިން ނިކުންނާނީ ބަަންގްލަދޭޝްއާ ދެކޮޅަށެވެ. ދެ ވަނަ ސެމީ ފައިނަލްގައި ބުދަ ދުވަހުގެ ރޭ ބައްދަލު ކުރާނީ ކިރްގިސްތާން އާއި އަފްޣާނިސްތާން އެވެ. 

ރާއްޖެ އިން މިފަހަރުގެ މުބާރާތާ ކުރިމަތިލީ ރަން މެޑަލް ހޯދުމުގެ އަޒުމުގަ އެވެ. އެގޮތުން ރާއްޖެ އިން މުބާރާތުގައި މިހާތަނަށް ރަނގަޅު ނަތީޖާ ތަކެއް ނެރެފައިވާއިރު، ރާއްޖެ އިން މި ވަނީ މުބާރާތުގެ ރަން މެޑަލް ހޯދުމުގެ އުންމީދު ބޮޑު ކޮށްފަ އެވެ.