ކާވާގެ ރައީސްކަމަށް އަނެއްކާ ވެސް ލަތީފް!
5 ފެބުރުއަރީ 2024 | ހޯމަ 00:4213 ޤައުމު ބައިވެރިވި އެ ޖަލްސާގައި، ކާވާގެ ރައީސްކަމުގެ މަޤާމަށް ލަތީފް އިންތިޚާބު ކުރީ ޤައުމުތަކުގެ އިއްތިފާގުން
ކާވާގެ ރައީސްކަމަށް އިންތިޚާބު ކުރި ލަތީފް
ސެންޓްރަލް އޭޝިއާ ވޮލީބޯޅަ އެސޯސިއޭޝަން (ކާވާ) ގެ ރައީސް ކަމަށް އަނެއްކާ ވެސް ރާއްޖޭގެ މުޙައްމަދު ލަތީފް އިންތިޚާބު ކޮށްފި އެވެ.
ރައީސްކަމުގެ މަޤާމަށް ލަތީފް އިންތިޚާބު ކޮށްފައި ވަނީ ތައިލެންޑުގެ ބެންކޮކްގައި ކުރިއަށް ދިޔަ ކާވާގެ އަހަރީ އާންމު ޖަލްސާގަ އެވެ. އެ ޖަލްސާގައި ވަނީ ކާވާގެ މެމްބަރު 13 ޤައުމަކުން ބައިވެރިވެފަ އެވެ. 13 ޤައުމު ބައިވެރިވި އެ ޖަލްސާގައި، ކާވާގެ ރައީސްކަމުގެ މަޤާމަށް ލަތީފް އިންތިޚާބު ކުރީ ޤައުމުތަކުގެ އިއްތިފާގުންނެވެ. އަހަރީ އާންމު ޖަލްސާގައި ބައިވެރި ނުވާ ޤައުމަކީ އިންޑިއާ އެވެ. އެ ޤައުމުން ބައިވެރި ނުވީ، މިވަގުތު ސަސްޕެންޝަނެއްގައި އޮތުމުގެ ސަބަބުންނެވެ.
ކާވާގެ އަހަރީ އާންމު ޖަލްސާގައި ވަނީ، އެ ޖަމިއްޔާގެ އެހެނިހެން އިސް މަގާމުތަކަށް ވެސް މެމްބަރުން އިންތިޚާބު ކޮށްފަ އެވެ. އެގޮތުން ފަސްޓް ވައިސް ޕްރެޒިޑެންޓްގެ މަޤާމަށް އިންތިޚާބު ކުރީ، އިރާންގެ ވޮލީ ބޯޅަ ފެޑެރޭޝަންގެ ސީނިއާ އެޑްވައިޒަރު ޑރ.ޑަވަރުޖަން އެވެ. އަދި ސެންޓްރަލް އޭޝިއާގެ ނަައިބު ރައީސްކަމުގެ މަޤާމަށް އުޒްބެކިސްތާންގެ ވޮލީ ބޯޅަ އެސޯސިއޭޝަންގެ ޖެނަރަލް ސެކްރެޓަރީ ފަރުހޫދު އަލިމޯ އިންތިޚާބު ކުރިއިރު، ސައުތު އޭޝިއާގެ ނައިބު ރައީސްކަމުގެ މަޤާމަށް އިންތިޚާބު ކޮށްފައި ވަނީ ނޭޕާލް ވޮލީ ބޯޅަ އެސޯސިއޭޝަންގެ ރައީސް ޖީޗެންދްރާ އެވެ. މީގެ އިތުރުން ވަނީ ބޯޑު މެމްބަރުން ވެސް އިންތިޚާބު ކޮށްފަ އެވެ.
ލަތީފް އަކީ މީގެ ކުރިން ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސްކަން ވެސް ކުރައްވާފައިވާ ފަރާތެވެ. ކާވާގެ ރައީސްކަމުގައި ލަތީފްގެ ފުރަތަމަ ދައުރުގައި ވަނީ ކާމިޔާބު މަސައްކަތްތަކެއް ވެސް ކުރައްވައިފަ އެވެ.
