ކާވާގެ ރައީސްކަމަށް ދެވަނަ ދައުރަކަށް ލަތީފް ވާދަކުރައްވަނީ

ސެންޓްރަލް އޭޝިޔަން ވޮލީބޯލް އެސޯސިއޭޝަން (ކާވާ) ގެ ރައީސް ކަމަށް ދެވަނަ ދައުރަކަށް ވާދަކުރައްވާނެކަން އެ އެސޯސިއޭޝަންގެ ރައީސް މުޙައްމަދު ލަތީފް އިއުލާނުކުރައްވައިފިއެވެ.

ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަފުޅު ދައްކަވަމުން ލަތީފް ވިދާޅުވީ ކާވާގެ ރައީސްކަމަށް ކުރިއަށް އޮތް ދައުރުގައި ވެސް ވާދަކުރައްވަން ނިންމަވާ އެކަން ކާވާގެ މެންބަރު ގައުމުތަކުގެ އެސޯސިއޭޝަންތަކާ ވެސް ހިއްސާކުރައްވާފައިވާނެ ކަމަށެވެ. ކާވާގައި ހިމެނެނީ 14 ގައުމެވެ. މި ހިނގަމުންދާ ދައުރުގައި ސާދަ ގައުމުން ވެސް ވަރަށްބޮޑު އެއްބާރުލުމެއް ދިން ކަން ކާވާގެ ރައީސް ލަތީފް ފާހަގަކުރެއްވިއެވެ. ކާވާގެ އިންްތިޚާބު އޮންނާނީ އަންނަ އަހަރުގެ ފެބްރުއަރީ މަހުގެ ދެވަނަ ދުވަހު އެވެ.

ކާވާއިން ވަނީ ކޮންމެ އަހަރެއްގެ އަހަރީ ކަލަންޑަރުގައި ހިމަނައި މަދުވެގެން ހަތަރު މުބާރާތް ބާއްވާފައެވެ. ކާވާގެ ގައުމުތަކުގެ ތެރެއިން ޓެކްނިކަލް އޮފިޝަލުން އުފައްދައިގެން, އެ އޮފިޝަލުން ބޭނުންކޮށްގެން މުބާރާތްތައް ކުރިއަށް ގެންދަން އިސްކަންދިންކަން ލަތީފް ފާހަގަކުރެއްވިއެވެ. އޭގެތެރޭގައި ރާއްޖޭގެ އޮފިޝަލުން ހިމެނެއެވެ. ކާވާގެ ރައީސްކަމުގައި ހާޞިލްކުރަން ބޭނުންވެ, މިހާތަނަށް ނުވެ އޮތްކަމަކީ ކާވާގެ ހެޑް އޮފީސް ރާއްޖޭގައި އެޅުންކަމަށް ލަތީފް ވިދާޅުވިއެވެ. 2019ން ފެށިގެން ރާއްޖޭގައި ކާވާގެ ހެޑްއޮފީސް ގާއިމްކުރުމުގެ ފުރުޞަތު ލިބިފައި އޮތަސް, އެކަން ނުވެ އޮތީ އެކިއެކި ސިޔާސީ ސަބަބުތަކާހުރެކަމަށް ލަތީފް ވިދާޅުވިއެވެ. އެހެންނަމަވެސް އެކަން ހަގީގަތަަކަށް ވާނެކަމަށް ލަތީފް އުއްމީދުކުރައްވައެވެ.

ކާވާގެ އޮފީސް ރާއްޖޭގައި އެޅުމުން ރާއްޖެއަށް ގިނަ ތަމްރީނުތައް ބޭއްވުމުގެ ފުރުޞަތު ލިބޭނެ އެވެ. ކާވާގެ އޮފީސް ރާއްޖޭގެ ޤާއިމްކުރުން ވެގެންދާނީ ރާއްޖޭގެ ވޮލީއަށް ލިބޭނެ ވަރަށްބޮޑު ކުރިއެރުމަކަށެވެ.

ކާވާގެ ރައީސްކަމުގެ އިތުރުން ރާއްޖޭގެ ވޮލީބޯޅަ އެސޯސިއޭޝަންގެ ކުރިއަށް އޮތް އިންތިޚާބުގައި ވާދަކުރުމުގެ ޝައުޤުވެރިކަން ވެސް ލަތީފް ވަނީ ފާޅުކުރައްވާފައެވެ. އެ އިދާރާގެ ރައީސްކަން ކުރިން ވެސް ކުރެއްވި ލަތީފް ވިދާޅުވީ ބައެއް ކްލަބްތަކުން އެކަމަށް އެދޭ ކަމަށާއި ކްލަބްތަކުން އެދޭނަމަ ވާދަކުރައްވާނެ ކަމަށެވެ.