ފަސޭހައިން ރާއްޖެ ބަލިކޮށް، ކާވާ 20 އަހަރުން ދަށުގެ ވޮލީބޯޅަ މުބާރާތުގެ ފައިނަލުން ސްރީލަންކާ ޖާގަ ހޯދައިފި އެވެ.

އަންހެން ޑިވިޝަން މުބާރާތުގެ ސެމީފައިނަލް ފުރަތަމަ މެޗުގައި މިއަދު ސްރީލަންކާއިން ރާއްޖެ ބަލިކުރީވެސް ސީދާ ތިން ސެޓުންނެވެ. ތިން ސެޓްވެސް ލަންކާއިން ހޯދީ ފަސޭހަކަމާއެކު އެވެ. މެޗުގެ ސެޓްތައް ސްރީލަންކާއިން ގެންދިޔައީ 25-09, 25-08 އަދި 25-07 ނެވެ. މިމެޗުން ބަލިވިޔަސް އަދިވެސް ތިންވަނަ ހޯދުމުގެ ފުރުޞަތު ރާއްޖެ އަށް އޮންނާނެ އެވެ. ސެމީފައިނަލް ދެވަނަ މެޗުގައި ކިރުގިސްތާނާއި ނޭޕާލް ވާދަކޮށް ބަލިވާ ޓީމްގެ މައްޗަށް ކުރި ހޯދައިގެންނެވެ. ސެމީފައިނަލް ދެ މެޗުން ބަލިވާ ދެޓީމްގެ މެދުގައި ތިންވަނަ ކަނޑައަޅަން ޚާއްޞަ މެޗެއް ކުޅޭނެއެވެ.

ރާއްޖެ މިހާތަނަށް ކުޅުނު ހަތަރު މެޗުންވެސް ބަލިވީ ސެޓެއް ނުލިބިއެވެ. އެއީ ލީގު ބުރުގައި ކުޅުނު ތިން މެޗާއި, ސެމީފައިނަލް މެޗެވެ. ލީގު ބުރުގައިވެސް ލަންކާ އަތުންވެސް ތިން ސެޓުން ބަލިވިއެވެ. ސްރީލަންކާ ފައިނަލަށް ދަތުރުކުރީ ސެމީފައިނަލް މެޗާއެކު ކުޅުނު ހަތަރު މެޗުންވެސް މޮޅުވެ, ރެކޯޑަކާއެކުއެވެ.