ދެ ވަނަ މެޗުގައި ރާއްޖެ އިން އަފްޣާނިސްތާން ވެސް ބަލިކޮށްފި

ރާއްޖޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމަންސް ކަޕްގައި ރާއްޖެ އިން ކުޅުނު ދެ ވަނަ މެޗުގައި އަފްޣާނިސްތާންގެ މައްޗަށް ވެސް ކުރި ހޯދައި، އުންމީމު ހިފަހައްޓައިފި އެވެ.

އާދީއްތަ ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗުގައި ރާއްޖެ އިން ވަނީ ސީދާ ތިން ސެޓުން އަފްޣާނިސްތާންގެ މައްޗަށް ކުރި ހޯދައިފަ އެވެ. މެޗުގެ ސެޓުތައް ރާއްޖެ އިން ކާމިޔާބު ކުރީ 25-20، 25-13 އަދި 25-12 އިންނެވެ. މެޗުގެ ތިން ސެޓުގައި ވެސް ރާއްޖޭގެ ކުޅުންތެރިން ވަނީ މޮޅު ކުޅުމެއް ދައްކައިފަ އެވެ.

މެޗަށް ފަހު ވާހަކަ ދައްކަމުން ރާއްޖޭ ޓީމުގެ ސެޓަރު ޖޫޒާން ޒަރީރު ބުނީ، ދެ ވަނަ މެޗަށް ނިކުތީ ފުރަތަމަ މެޗަށް ވުރެ ރަނގަޅު ކުޅުމެއް ދެއްކުމުގެ އަޒުމުގައި ކަމަށެވެ. މިހާތަނަށް ރާއްޖެ ކުޅުނު ދެ މެޗުން ވެސް މޮޅުވެފައިވާއިރު، ޖޫޒާން ބުނީ އެއީ ޓީމެއްގެ ގޮތުގައި ހުރިހާ ކުޅުންތެރިން އެކުވެގެން ކުރާ މަސައްކަތުގެ ފޮނި ނަތީޖާ ކަމަށެވެ.

އިތުރަށް ވާހަކަ ދައްކަމުން ޖޫޒާން ބުނީ 10 އަހަރު 12 އަހަރު ވަންދެން އެ ކުޅުންތެރިން ކުރަމުން އަންނަ މަސައްކަތް ހަގީގަތަކަށް ހެދުމަށްޓަކައި ދިވެހި ސަޕޯޓަރުންގެ އެހީ ވަރަށް ބޮޑަށް ބޭނުންވާ ކަމަށެވެ. ފަހު މެޗުގައި ކިރްގިސްތާނާ ދެކޮޅަށް ރާއްޖެ ނިކުންނައިރު، ޖޫޒާން އެދުނީ ވީހާ ވެސް ގިނަ ބަޔަކު ޒުވާނުންގެ މަރުކަޒަށް އައިސް ޓީމަށް ސަޕޯޓުކޮށް، ހިތްވަރު ދިނުމަށެވެ. 

ރާއްޖެ އިން މިފަހަރުގެ މުބާރާތާ ކުރިމަތިލީ ރަން މެޑަލް ހޯދުމުގެ ވަރުގަދަ އަޒުމުގަ އެވެ. ހޯމަ ދުވަހުގެ ރޭ ތިން ވަނަ މެޗުގައި ރާއްޖެ އިން ކިރްގިސްތާނާ ދެކޮޅަށް ނިކުންނައިރު، އެ ޓީމު ވެސް ވަނީ މިހާތަނަށް ކުޅެފައިވާ ދެ މެޗުން މޮޅުވެފަ އެވެ. ރާއްޖޭގެ ފުރަތަމަ މެޗުގައި ވެސް ބަންގްލަދޭޝްގެ މައްޗަށް ކުރި ހޯދީ ވެސް ސީދާ ތިން ސެޓުންނެވެ.