ރާއްޖެ ސެމީގައި ލަންކާއާ ދެކޮޅަށް
ލީގު ބުރުގެ ތިން މެޗުންވެސް ރާއްޖެ ވަނީ ބަލިވެފައެވެ.
ކާވާ 20 އަހަރުން ދަށުގެ މުބާރާތުގައި ވާދަކުރާ ޓީމްތައް
ކާވާ 20 އަހަރުން ދަށުގެ ވޮލީބޯޅަ މުބާރާތުގެ ސެމީފައިނަލްގައި ސްރީލަންކާއާ ވާދަކުރަން ޖެހިއްޖެ އެވެ.
ތިން މެޗުން ބަލިވިޔަސް މުބާރާތުގެ ފޯމެޓް އޮތް ގޮތުން ސެމީގެ ފުރުޞަތު މުބާރާތުގައި ލިބެއެވެ. އަދި ސެމީން ބަލިވިޔަސް ތިންވަނަ ހޯދަން ވާދަކުރުމުގެ ފުރުޞަތު ލިބެއެވެ. ހަތަރު ޓީމް ވާދަކުރާ މުބާރާތުގެ ލީގު ބުރުގައި ރާއްޖޭގެ ޒުވާން ޓީމް ތިން މެޗުންވެސް ބަލިވީ ސެޓެއް ނުލިބިއެވެ. އެހެންކަމުން ހަތަރުވަނަ ޓީމްގެ ގޮތުގައި ސެމީގައި ވާދަކުރަން ޖެހެނީ ލީގު ބުރުގެ އެއްވަނަ ޓީމާއެވެ. ލީގު ބުރުން އެއްވަނަ ހޯދީ ސްރީލަންކާއެވެ. ލަންކާ އެއްވަނަ ޔަގީން ކުރީ ކިރުގިސްތާން 3-2 ސެޓުން ބަލިކޮށްގެންނެވެ. ލީގު ބުރުން ދެވަނަ ހޯދީ ކިރުގިސްތާނެވެ. ތިންވަނަ ޓީމަކީ ރާއްޖެ އަތުން ހޯދި މޮޅާއެކު ނޭޕާލް އެވެ.
ސެމީގެ ފުރަތަމަ މެޗުގައި ރާއްޖެ މާދަމާ ވާދަކުރާނީ ސްރީލަންކާއާއެވެ. ސެމީގެ ދެވަނަ މެޗުގައި ވާދަކުރާނީ ކިރުގިސްތާނާއި ނޭޕާލެވެ. ސެމީ ފައިނަލް ދެ މެޗުން މޮޅުވާ ޓީމް ފައިނަލްގައި ވާދަކުރާނެ އެވެ. އަދި ބަލިވާ ދެޓީމް ވާދަކުރާނީ ތިންވަނަ ހޮވާ މެޗުގައެވެ. ފައިނަލް މެޗާއި ތިންވަނަ ހޮވާ މެޗު ކުޅޭނީ އަންގާރަ ދުވަހު އެވެ.
