ނޭޕާލުގައި އާދިއްތަ ދުވަހު ފަށާ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގެ ފުރަތަމަ މެޗުގައި ކަޒަކިސްތާނާ ދެކޮޅަށް ނުކުންނަން ރާއްޖޭގެ އަންހެން ޤައުމީ ޓީމު އޮތީ ފުރިހަމަ އަށް ތައްޔާރަށް ކަމަށް ޓީމުގެ ކޯޗު ތައިލެންޑުގެ ވިޗީޕޮން ފޯންޗާޓްޔިންޗީޕް ބުނެފި އެވެ.

އަށް ޓީމު ވާދަކުރާ މި މުބާރާތުގައި ރާއްޖެ އޮތީ ގްރޫޕް ބީގަ އެވެ. އެ ގްރޫޕްގައި ރާއްޖޭގެ އިތުރުން ދެން އޮތީ ކަޒަކިސްތާން، އުޒްބަކިސްތާން އަދި ސްރީލަންކާ އެވެ. ފުރަތަމަ މެޗުގައި ކަޒަކިސްތާނާ ދެކޮޅަށް ރާއްޖެ ނުކުންނާނީ ރާއްޖޭ ގަޑިން އާދިއްތަ ދުވަހު އިރުއޮއްސި 18:15 ގައެވެ. ފުރަތަމަ މެޗުގެ ކުރިން ހޮނިހިރު ދުވަހު ފަރިތަކުރުން ކުރިއަށް ގެންގޮސްފަ އެވެ.

އާދިއްތަ ދުވަހު ކުރިއަށް ގެންދިޔަ ފަރިތަކުރުމަށް ފަހު ވާހަކަ ދައްކަމުން ކޯޗު ބުނީ، ޓީމެއް ތައްޔާރު ކުރުމަށް އެންމެ މުހިންމު ކަމަކަށްވީ ފިޓްނަސް ރަނގަޅު ކުރުން ކަމަށެވެ. ކޯޗު ފާހަގަ ކުރި ގޮތުގައި ރާއްޖޭ ކުޅުންތެރިންގެ ފިިޒިކަލް އޭނާ ބޭނުންވާ ފެންވަރަށް ގެންދެވެ އެވެ. އެހެންކަމުން ދެން އޮތީ ފިޒިކަލީ އަދި މެންޓަލީ ކުޅުންތެރިން މެޗަށް ތައްޔާރު ކުރުންކަން ފާހަގަކޮށް ކޯޗު ބުނީ، މިހާރު އޭނާ އަންނަނީ އެކަމަށް މަސައްކަތް ކުރަމުން ކަމަށެވެ. މުބާރާތުގައި ރާއްޖެ އަށް އޮތް އެންމެ ބޮޑު އެއް ޗެލެންޖުގެ ގޮތުގައި ކޯޗު ފާހަގަކުރީ އިދިކޮޅު ޓީމުގައި އިސްކޮޅު ދިގު ކުޅުންތެރިން ތިބުމެވެ. ނަމަވެސް އޭނާ ބުނީ ދިވެހި ޓީމުން މެޗުގައި ސާވިސް ރަނގަޅު ކުރުމާއި، ރިސީވް ރަނގަޅު ކުރުމަށް އިސްކަންދީފި ނަމަ ކުރި ހޯދޭނެ ކަމަށެވެ.

ކޯޗުގެ އިތުރުން ޤައުމީ ޓީމުގެ އެންމެ ތަޖުރިބާކާރު އެއް ކުޅުންތެރިޔާ އަދި ކެޕްޓަން ޙައްވާ ރާޝިދާ (ޙައްވަ) ބުނީ، ފުރަތަމަ މެޗާއި، ޖުމުލަކޮށް މުޅި މުބާރާތަށް ޓީމު އޮތީ ތައްޔާރަށް ކަމަށެވެ. ޙައްވަ ބުނީ ކަޒަކިސްތާނު މެޗަށް ވެސް ޓީމު އިތީ ވަރަށް ބޮޑަށް ތައްޔާރަށް ކަމަށާއި، ޓީމުގެ ފަރާތުން ރަނގަޅު، މޮޅު ކުޅުމެއް ފެންނާނެ ކަމަށް އުންމީދު ކުރާ ކަމަށެވެ. އެންމެ ފަހުން ރާއްޖޭގައި ކުޅުނު ފޯ ނޭޝަންސް ކަޕަށްފަހު ޓީމަށް ކޮންމެ ވެސް ވަރެއްގެ ބަދަލުތަކެއް އައި ނަމަވެސް، ޓީމު އޮތީ އެ މުބާރާތުގައި ވެސް އޮތް ރޫހުގައި ކަމަށް ޙައްވަ ބުންޏެވެ. އޭނާ ބުނީ ފޯ ނޭޝަންސް ކަޕުން ރިހި މެޑަލް ހޯދިއިރު، ކާވާ މުބާރާތުގައި ވެސް މެޑަލަކާ ހަމައަށް ދިޔުމަކީ ހުރިހާ ކުޅުންތެރިންގެ އުންމީދު ކަމަށެވެ.

މީގެ އިތުރުން ޙައްވަ ބުނީ، ކާވާ މުބާރާތަށް ކުޅުންތެރިން ކުރިމަތިލީ އެންމެ ފަހުން ފޯ ނޭޝަންސް ކަޕުގައި ސަޕޯޓަރުންގެ ފަރާތުން ދިން ސަޕޯޓުން ހިތްވަރު ލިބިގެން ކަމަށެވެ. މުބާރާތުގައި ރާއްޖެ ހިމެނުނު ގްރޫޕް ބީ ގައި އޮތް ޓީމުތަކާ ގުޅޭ ގޮތުން ޙައްވަ ވާހަކަ ދައްކަމުން ޙައްވަ ބުނީ، އެ ގްރޫޕުގައި އޮތް ތިން ޓީމަކީ ވެސް ރާއްޖެ އަށް ވާދަކޮށްލެވޭނެ ފެންވަރުގެ ޓީމުތައް ކަމަށެވެ. ޚާއްސަކޮށް ރާއްޖޭގެ ކުޅުންތެރިން ކުޑަ ހިތްވަރަކާއެކު މަސައްކަތް ކޮށްފި ނަމަ، ލަންކާގެ މައްޗަށް ވެސް ކުރި ހޯދޭނެ ކަމަށް ޙައްވަ ޤަބޫލު ކުރެ އެވެ. އެކަން ފާހަގަކޮށް ޙައްވަ ބުނީ، އަންހެން ވޮލީ ޓީމު މިހާރު އޮތީ މީގެ ދެތިން އަހަރަށް ވުރެ ކުރީގައި އޮތް ވަރަށްވުރެ ރަނގަޅަށް ކަމަށެވެ.

ތައިލެންޑުގެ ކޯޗާއެކު ރާއްޖެ އިން ވަނީ ދޮޅު މަސް ދުވަސް ވަންދެން ފަރިތަކުރުން ކުރިއަށް ގެންގޮސްފަ އެވެ. މުބާރާތުގައި ރާއްޖޭގެ ދެ ވަނަ މެޗުގައި ހޯމަ ދުވަހު ނުކުންނާނީ އުޒްބަކިސްތާނާ ދެކޮޅަށެވެ. އެއަށްފަހު ގްރޫޕްގެ ފަހު މެޗުގައި ލަންކާއާ ދެކޮޅަށް ނުކުންނާނީ އަންގާރަ ދުވަހު އެވެ.