ފްލެޓްތައް އަތުލަނީ ހިތު ހުރި ގޮތަކަށް! ދައުލަތުން ވީ އެއްބަސްވުމެއްގެ އަގެއް ނެތް؟

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު ކުރިއަށް ގެންދަވާ ސިލްސިލާ ބައްދަލުވުންތަކުގެ ތެރެއިން އިތުރު ބައްދަލުވުމެއް ދެކެފީމެވެ. މިފަހަރު ހުޅުމާލޭ ދެވަނަ ފިޔަވަހީ ގައި ދިރިއުޅޭ ރައްޔިތުންނާއި ބައްދަލުކުރެއްވީ އެވެ. ރައީސް ހުޅުމާލޭ ދެވަނަ ފިޔަވަހީ ގައި ދިރިއުޅޭ ރައްޔިތުންނާއި ބައްދަލުކުރައްވާފައި ވަނީ ބުރާސްފަތި ދުވަހުގެ ރޭ 20:30 ގައި ހުޅުމާލެ ފޭސް 2 ޞަލާޙުއްދީން ސްކޫލްގަ އެވެ. ސަރުކާރުން މި ބައްދަލުވުން ސިފަ ކުރަނީ މާ މޮޅު ބައްދަލުވުމެއްގެ ގޮތުގަ އެވެ. ގިނަ އިރު ވީމަ ޔޯލަ އެވެ.

އަޖައިބު އަންތަރީހެއް މީހަކު ނުވާނެތޯ އެވެ؟ އެހެންޏާ ފަހެ ރައްޔިތުންގެ ކަންބޮޑުވުންތައް ގިނަވެގެން އޮބިނޯވެގެން އުޅޭ އިރު ވެސް ގިނަ ޝަކުވާ ހުރުމަކީ ރައްޔިތުން ހެޕީވުން ކަަމަށް ބަލާ ސަރުކާރެއް މި ނޫނީ މުޅި ދުނިޔޭގައި ވެސް އޮންނާނެ ހެނެއް ހިއެއް ނުވެ އެވެ. ރައްޔިތުން ރައީސް އަށް ކަންކަމުގައި ނުދަންނަވާ ނަމަ ހިރުވާތަން ކަހާ ވެސް ނުލާ އުސޫލުން ސަރުކާރުން މި ތިބެނީ ރައްޔިތެއްގެ ކަންބޮޑުވުމެއް ނެތް ކަމަށް ހަދައިގެންނެވެ.

ނުވިތާކަށް މި ސަރުކާރަށް ދައުލަތުން ވެފައިވާ އެއްބަސްވުމަކީ އެއްވެސް އަގެއް އޮތް އެއްޗެއް ހެނެއް ހިއެއް ނުވެ އެވެ. އާއްމުންނަށް ލިބުނު ފްލެޓުތައް އެގްރީމެންޓް ކޮށްފައި ވަނިކޮށް އަތުލުމަކީ މި ސަރުކާރުން ނިކަން ލަދު ގަންނަން ޖެހޭ ކަމެކެވެ. އެއީ ވެރިކަމަށް އަންނަން އެންމެ ހަރު އަޑުން ތަކުރާރު ކުރި ވާހަކަ އަކީ ފްލެޓަކަސް ގޯއްޗަކަށް ދިން އެއްޗެއް ދިން ތަނަކުން ދޭނެ ކަމަށް ވީ ވައުދެވެ. ނޫސްވެރިން ސުވާލުކުރާ ވަރުން މަނިކުފާނު ރުންކުރުވެ އަޑު އިވޭނީ ކިތައް ފަހަރު ބުނީމަތޯ ސުވާލު ކުރާ މޭރުމުން ދެއްވި ޖަވާބު ވެސް ދިވެހި ރައްޔިތުން ހަނދާނުގައި ހަރުލާފައި ހުންނާނެކަން ޔަޤީނެވެ. 

އެކަން އެހެން އޮތް އިރު، ހުޅުމާލޭ ދެ ވަނަ ފިޔަވަހިން ވެސް އިވުނު ކަންބޮޑުވުމަކީ ރައީސް ޑރ. މުހައްމަދު މުއިއްޒުގެ ސަރުކާރުން ކުރިން ވައުދު ވީ ގޮތަށް ފްލެޓާއި ގޯތި ދީފައި ނުވާތީ އެ ކަންބޮޑު ވުމެވެ.  އެގޮތުން މީގެ ކުރިން ފްލެޓް ލިބި، ފްލެޓް އެގްރީމެންޓް އެކުލަވާލާ، ފްލެޓް ހުރި ތަން ވެސް އެނގިފައިވާ މީހަކަށް ދާދި ފަހުން، އޭނާ ފްލެޓަށް ޝަރުތު ހަމަ ނުވާ ކަމަށް ބުނެ ފަހި ދިރިއުޅުން ކޯޕަރޭޝަނުން ސިޓީ އެއް ފޮނުވާފައިވާ ކަމަށް އާއްމު މީހަކު ވަނީ ބުނެފަ އެވެ.

"މި ސިޓީ ފޮނުވާފައި ވަނީ 16 ޑިސެމްބަރުގައި. އަޅުގަނޑުމެން ކުދިން ސްކޫލަށް ވައްދާ ހުޅުމާލެ އަދި މާލޭގައި ދިރިއުޅޭތާ 22 އަހަރު ވެއްޖެ. ސްކޫލް ރިޕޯޓް ފޯމާއި އެކު ފޯމް ފުރީ." އާއްމު މީހަކު ބުނެފައިވެ އެވެ.

މިއީ އާއްމު ރައްޔިތު މީހާ އާދޭހާއި އެކު ރައީސް ކައިރީގައި ދައްކަން ޖެހޭ ވާހަކަ ތޯ އެވެ؟ އެއް ވެރިކަމަކުން ދީފައިވާ ސައްހަ ލިޔެކިޔުމެއް މި މޭރުމުން ނަފީ ކުރެވިދާނެ ބާވަ އެވެ. މި ކަމުން ވެސް އެނގެނީ އުސޫލާއި ޙުދޫދުތައް ބަދަލުކޮށްލުމަކީ މި ސަރުކާރަށް ކިހާ ފަސޭހަ ކަމެއް ކަމެވެ.

މިފަދަ ކިތަންމެ ކަމެއް މި ބައްދަލުވުމުން ވެސް ފެނުނެވެ. ފްލެޓް ލިބުމުގައި އެކުލަވާލި ޝަރުތުތައް ހަމަ ވިޔަސް އެ ކަން ވެސް ބޭނުންވީމަ ނޫނީ ނުރުހުނީމަ ބަދަލުކުރަންވީ އެވެ. އެމްޑަބްލިއުއެސްސީ އިން ފްލެޓް ވިއްކަން ހުޅުވާލުމުން އެމްއައިބީ މެދުވެރިކޮށް ފްލެޓަށް ލާ، އެ ފްލެޓަށް އެއްކޮށް ފައިސާ ދެއްކުމަށް ފަހު ފްލެޓް ގަނެފައިވާ މީހަކަށް ނިމިދިޔަ ސަރުކާރުގައި ގެދޮރުވެރިޔާގެ ދަށުން ލިބުނު ފްލެޓް ވެސް އަތުލީ ހަމަ މި ކަހަލަ މޭރުމަކުންނެވެ. އެ ތަނަކީ ކުންފުނީގެ ހައުސިން ސްކީމެއްގެ ދަށުން ދީފައިވާ ތަނެއް ނޫންކަމަށް އެ އާއްމު މީހާ ވަނީ ފާހަގަކޮށްފަ އެވެ. އެކަން ހާމަކޮށްދޭ ލިޔެކިޔުންތަކާއި އެކު ފްލެޓަށް އެދި ހުށަހެޅުމުން، އޭނާ ކުރިން ގަނެފައިވާ ފްލެޓަކީ 600 އަކަފޫޓު ހަމަ ނުވާ ނަމަ ފްލެޓް ލިބޭނެ ކަމަށް އޭރު އަންގާފައިވާ ކަމަށް އޭނާ ބުނެފައިވެ އެވެ. އެހެންނަމަވެސް މި ސަރުކާރުން އޭނާ ގެ ނަން ފްލެޓް ލިސްޓުން އުނިކޮށްފައިވާތީ އެކަމުގެ ކަންބޮޑުވުން އޭނާ ވަނީ ރައީސް އާއި ހިއްސާކޮށްފަ އެވެ.

"ފްލެޓަކީ ކުންފުނީގެ ހައުސިން ސްކީމަކުން ދިން ތަނެއް ނޫން. ފްލެޓް ލިސްޓުން 87 ޕޮއިންޓް ލިބުނު. 389 އަކަފޫޓު އުޅޭ ތަނުގައި ހުންނަނީ. ނަމަވެސް މި ސަރުކާރުން ވަނީ އެއީ ކުންފުނީގެ އެޕާޓްމެންޓެއް ކަމަށް ބުނެ ލިސްޓުން އުނިކޮށްފަ. އެ ފްލެޓަކީ 1 ރޫމް އެޕާޓްމެންޓެއް.އަޅުގަނޑު ދިރިއުޅެނީ 14 އަހަރުގެ ފިރިހެން ކުއްޖަކާއި 6 އަހަރުގެ އަންހެން ދަރިފުޅައި އެކު." އޭނާ ވަނީ ބުނެފަ އެވެ.

މިކަހަލަ ކޮންމެ ކަމަކުން އާއްމުންނަށް ލިބެނީ އިންތިހާ މާޔޫސްކަމެވެ. މި ވަރު ވީމަ ދައުލަތަކުން ވާ އެއްބަސްވުންތަކަށް އާއްމުން އިހުތިރާމް ނުކުރާނެ ކިތަންމެ ސަބަބެއް މި ސަރުކާރަށް މި މަގުފަހިކޮށްދެވެނީ އެވެ. މި ފްލެޓްތައް އަތުލަނީ އުސޫލާއި ޚިލާފަށް ކަމަށް ޤާނޫނީ ފަންނުގެ އެތައް ބަަޔަކު ބުނަމުންދާ އިރު އެ އަޑު ސަރުކާރުގެ ބީރު ކަންފަތަކަށް ނީވެ އެވެ. އެގްރީމެންޓަކަށް ވެސް އަމަލުކުރައްވަނީ ހިތަށް އެރި މިންވަރަކަށް ހިތަށް އެރި ފަހަރެއްގަ އެވެ.