ފިޔަވަޅުތައް އުވާލުމުން، ސީރިއާގެ ޝުކުރު އެމެރިކާ އަށް

ސީރިއާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވާލުމަށް އެމެރިކާ އިން ނިންމުމާ އެކު، ސީރިއާ އިން އެކަމަށް މަރުޙަބާ ކިޔައިފި އެވެ. 

އެމެރިކާގެ ކޮންގްރެސް އިން ވަނީ، ސީރިއާ ދެކޮޅަށް އަޅާފައިވާ އެންމެހާ ދަތި ކުރުމުގެ ފިޔަވަޅުތައް ދާއިމީ ގޮތެއްގައި އުވާލުމަށް ފާސްކޮށްފަ އެވެ. އެއާއެކު، އެމެރިކާގެ ރައީސް ޑޮނަލްޑް ޓްރަމްޕް އެ ޤަރާރުގައި ސޮއި ކުރައްވާނެ ކަމަށް ލަފާ ކުރެވެ އެވެ. އެއާއެކު، ސިރިއާ އަށް އަލުން އިންވެސްޓްމަންޓުގެ ފުރުސަތުތައް ލިބިގެން ދާނެ ކަމަށް ވެސް ވަނީ ބެލެވިފަ އެވެ.

އެމެރިކާ އިން ސީރިއާ ދެކޮޅަށް ފިޔަވަޅުތައް އަޅާފައި ވަނީ އެ ޤައުމުގެ ކުރީގެ ރައީސް ބަޝާރު އަލް އަސަދުގެ ވެރިކަމުގަ އެވެ. ނަމަވެސް، 2024 ވަނަ އަހަރުގެ ޑިސެމްބަރު މަހުގެ ތެރޭގައި އަސަދުގެ ވެރިކަން ވައްޓާލުމަށް ފަހު، މިހާރުގެ ރައީސް އަޙުމަދު އަލް ޝަރާ ވެރިކަމާ ހަވާލުވެ ވަޑައިގެން ވަނީ ޤައުމުތަކާ ގުޅުން ބަދަހި ކުރުމަށް ގިނަ މަސައްކަތް ތަކެއް ކުރައްވައިފަ އެވެ. 

ސީޒާ އެކްޓުގެ ސަބަބުން ސީރިއާ އަށް ބައިނަލްއަޤުވާމީ މައިދާނުގައި ވެސް އޮތީ އެތައް ގޮންޖެހުން ތަކެއް ކުރިމަތިވެފަ އެވެ. ބައިނަލްއަޤުވާމީ މާލީ ނިޒާމު އަދި ބޭންކިންގެ ނިޒާމުން ވެސް ސީރިއާ އޮތީ އެކަހެރިވެފަ އެވެ. ވެރިކަމުގެ އެއް އަހަރު ދުވަހުގެ ތެރޭގައި އަލް ޝަރާ ވަނީ އެކަމަށް ވަރަށް ބޮޑަށް މަސައްކަތް ކުރައްވައިފަ އެވެ. 

ސޯޝަލް މީޑިއާގެ އެކްސް އެކައުންޓެއް ހުޅުވުމަށް ފަހު، ފުރަތަމަ ފަހަރަށް ކުރެއްވި ޕޯސްޓުގައި އަލް ޝަރާ ވަނީ އެމެރިކާ އަށް ޝުކުރު އަދާ ކުރައްވައިފަ އެވެ. ވީޑިއޯ މެސެޖުގައި އަލް ޝަރާ ވިދާޅުވެފައި ވަނީ، މިއަދަކީ ސީރިއާއާ ދެކޮޅަށް އަޅާފައިވާ އެންމެހާ ދަތި ކުރުން ތަކުން ސަލާމަތްވި ދުވަސް ކަމަށެވެ. އެކަމަކީ ފާއިތުވި ހަތަރު އަހަރު ދުވަހުގެ ތެރޭގައި ސީރިއާގެ ރައްޔިތުން ދައްކާފައިވާ ހިތްވަރުގެ ނަތީޖާ ކަމަށް ވެސް އޭނާ ވިދާޅުވި އެވެ. 

އެ ޕޯސްޓުގައި އަލް ޝަރާ ވިދާޅުވެފައި ވަނީ ސީރިއާ އާއި، އެ ޤައުމުގެ ރައްޔިތުންގެ ގޮވާލުމަށް އިޖާބަ ދެއްވި ކަމަށްޓަަކައި އެމެރިކާގެ ރައީސް ޑޮނަލްޑް ޓްރަމްޕް އަށް ޚާއްސަ ޝުކުރެއް އަދާ ކުރައްވައިފަ އެވެ. އަދި ސީރިއާ ރައްޔިތުން މިހާތަނަށް ވެފައިވާ ޤުރުބާނީ ބަލައިގަތް، އެމެރިކާ ކޮންގްރެސްގެ މެމްބަރުންނަށް ވެސް އޭނާ ވަނީ ޝުކުރު އަދާ ކުރައްވައިފަ އެވެ. 

ސީރިއާގެ ފޮރިން މިނިސްޓްރީ އިން ވެސް ވަނީ ހުކުރު ދުވަހު އެކަމާ ގުޅިގެން ބަޔާނެއް ނެރެފަ އެވެ. އެ ބަޔާނުގައި ވަނީ އެކަމަށް މަރުޙަބާ ކިޔައިފަ އެވެ. އަދި އެ ބަޔާނުގައި ބުނެފައި ވަނީ، އެއީ ސީރިއާ އަލުން އާރާސްތު ކުރުމާއި، ތަރައްޤީ ކުރުމުގެ މަރުޙަލާ އަށް ހުޅުވިގެންދާ ދޮރެއް ކަމަށެވެ. އަދި ސީރިއާ އާރާސްތު ކުރުމުގެ މަސައްކަތުގައި އެންމެން ވެސް ބައިވެރިވުމަށް އެ ޤައުމުން ވަނީ ގޮވާލައިފަ އެވެ. 

ސީރިއާއާ ދެކޮޅަށް އަޅާފައިވާ ފިޔަވަޅުތައް އެމެރިކާ އިން އުވާލާފައިވާއިރު، އެމެރިކާގެ ރައީސް ޓްރަމްޕް ވަނީ ދެ ފަަހަރެއްގެ މަތިން ސީރިއާގެ ރައީސް އަލް ޝަރާއާ ވެސް ބައްދަލު ކުރައްވައިފަ އެވެ. އެންމެ ފުރަތަމަ ސައުދީ އަރަބިއްޔާގެ ވެރި ރަށް ރިޔާދުގައި ބައްދަލު ކުރެއްވީއިރު، ދެ ވަނަ ބައްދަލު ކުރެއްވުން އޮތީ އެމެރިކާގެ ރިޔާސީ ގަނޑުވަރު ވައިޓް ހައުސްގަ އެވެ.

އެމެރިކާގެ ސެނެޓުން ވަނީ 2019 ވަނަ އަހަރު ފާސްކޮށްފައިވާ ސީޒާ އެކްޓް ބާތިލު ކުރުމުގެ ޤަރާރު ފާސްކޮށްފައި ވަނީ ހަތް ދިހަ މެމްބަރުންގެ ވޯޓާ އެކު އެވެ. އެ ޤަރާރާ ދެކޮޅަށް 20 މެމްބަރަކު ވޯޓު ދީފައިވާއިރު، މީގެ ކުރިން އެމެރިކާގެ ހައުސް އޮފް ރެޕްރެޒެންޓޭޓިވްސް އިން ވެސް ވަނީ ފާސްކޮށްފަ އެވެ.