އިނގިރޭސިވިލާތާ އެކު ސޮއި ކޮށްފައި އޮތް ޓެކްނޮލޮޖީގެ އެއްބަސްވުން އެމެރިކާ އިން ވަގުތީ ގޮތުން ހުއްޓާލައިފި

އިނގިރޭސިވިލާތާ އެކު އެމެރިކާ އިން ސޮއި ކޮށްފައިވާ ޓެކްނޮލޮޖީގެ އެއްބަސްވުމަށް އަމަލު ކުރުން ވަގުތީ ގޮތުން ހުއްޓާލާފައިވާ ކަމަށް ރިޕޯޓު ކޮށްފި އެވެ. 

މިކަން ރިޕޯޓު ކޮށްފައި ވަނީ ފައިނޭންޝަލް ޓައިމްސް ނޫހުގަ އެވެ. ހޯމަ ދުވަހު ކޮށްފައިވާ އެ ރިޕޯޓުގައި ބުނެފައި ވަނީ، މިއަހަރުގެ ކުރީ ކޮޅު އެމެރިކާ އާއި އިނގިރޭސިވިލާތާ ދެމެދު ސޮއި ކޮށްފައިވާ އެއްބަސްވުމަށް އަމަލު ކުރުން ވަގުތީ ގޮތުން ހުއްޓާލީ އެމެރިކާ އިން ކަމަށެވެ. 

ދެ ޤައުމުގެ ދެ މެދުގައި ސޮއި ކޮށްފައިވާ މި އެއްބަސްވުމަކީ އާޓިފިޝަލް އިންޓެލިޖެންސް އާއި، ކައުންޓަމް ކޮމްޕިއުޓިން އަދި ސިވިލް ނިއުކްލިއާ އެނާޖީ ދާއިރާ ތަކުގައި ދެ ޤައުމުގެ ގުޅުން ބަދަހި ކުރުމަށް ސޮއި ކޮށްފައިވާ އެއްބަސްވުމެކެވެ. 

އެ ނޫހުން ކޮށްފައިވާ ރިޕޯޓުގައި ބުނެފައި ވަނީ، މިދިޔަ ހަފުތާ އިން ފެށިގެން އެ އެއްބަސްވުމަށް އަމަލު ކުރުން ހުއްޓާލާފައިވާ ކަމަށް އިނގިރޭސިވިލާތުގެ ސަރުކާރުގެ ބައެއް އިސްވެރިން ވެސް ކަށަވަރު ކޮށްދެއްވާފައިވާ ކަމަށެވެ. ފައިނޭންޝަލް ޓައިމްސްގައި ރިޕޯޓު ކޮށްފައި ވަނީ، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އިނގިރޭސިވިލާތަށް ބާރު އަޅަމުން އަންނަނީ ޓެކްނޮލޮޖީގެ ހަމަހަމަ ކަމަށް ބާރު އެޅުމަށެވެ. އަދި ވިޔަފާރީގެ ބައެއް ދާއިރާ ތަކުން ލުއި ތަކެއް ދިނުމަށް ވެސް އެދެމުން އަންނަ ކަމަށް ވަނީ ފާހަގަ ކޮށްފަ އެވެ. 

މީގެ އިތުރުން ފައިނޭންޝަލް ޓައިމްސްގައި ބުނެފައި ވަނީ އިނގިރޭސިވިލާތުގެ ނޮން ޓެރިފް ބެރިއާސްގެ ކަންކަމުގައި ޙައްލު ހޯދުމަށް އެ ޤައުމުން ޝައުޤުވެރިކަން ނުދައްކާތީ އެމެރިކާ އިން ކަންބޮޑުވެފައިވާ ކަމަށެވެ. އޭގެ ތެރޭގައި ކާބޯ ތަކެތީގެ ބާވަތްތަކާއި، ސިނާއީ ބާވަތް ތަކަށް ހަދާފައިވާ ޤަވާއިދުތަކާއި ރެގިއުލޭޝަންތައް ހިމެނޭ ކަމަށް ވެސް ބުނެފައިވެ އެވެ. 

އެކަމާ ގުޅޭ ގޮތުން އިނގިރޭސިވިލާތުގެ ސަރުކާރުގެ ތަރުޖަމާނު ވިދާޅުވީ، އެމެރިކާއާ އެކު އޮތް ގުޅުން ވަރަށް ބަދަހިކޮށް އޮތް ކަމަށާއި، އެއީ ވަރަށް ޚާއްސަ ގުޅުމެއް ކަމަށެވެ. އިތުރަށް ވިދާޅުވެފައި ވަނީ ޓެކް ޕްރޮސްޕެރިޓީ ޑީލް ކާމިޔާބު ކުރުމަށް އިނގިރޭސިވިލާތުގެ ސަރުކާރުން ފުރިހަމަ އަށް މަސައްކަތް ކުރާނެ ކަމަށެވެ. އަދި އެ އެއްބަސްވުމުގެ ސަބަބުން ދެ ޤައުމުގެ ރައްޔިތުންނަށް ވެސް ފުރުސަތު ތަކެއް ފަހި ވެގެން ދާނެ ކަމަށް އޭނާ ވަނީ ވިދާޅުވެފަ އެވެ. 

މިކަމާ ގުޅޭ ގޮތުން އެމެރިކާގެ ބަހެއް ހޯދުމަށް ރޮއިޓާސް އިން މަސައްކަތް ކޮށްފައިވާ ކަމަށް ވަނީ ބުނެފަ އެވެ. ނަމަވެސް، މިކަމުގައި ކޮމެންޓެއް ކުރުމަށް، އެމެރިކާގެ ރިޔާސީ ގަނޑުވަރު ވައިޓް ހައުސް އިން ދެކޮޅު ހަދާފައިވާ ކަމަށް ބުނެފައިވެ އެވެ. އިނގިރޭސިވިލާތާއި، އެމެރިކާއާ ދެމެދު މި އެއްބަސްވުމުގައި ސޮއި ކޮށްފައި ވަނީ މިއަހަރުގެ ސެޕްޓެމްބަރު މަހުގެ ތެރޭގަ އެވެ. އެއީ އެމެރިކާގެ ރައީސް ޓްރަމްޕް އިނގިރޭސިވިލާތަށް ކުރެއްވި ދަތުރުފުޅުގެ ތެރެއިންނެވެ. 

އެމެރިކާ އަކީ އިނގިރޭސިވިލާތުގެ ވިޔަފާރީގެ އެންމެ ބޮޑު ބައިވެރިޔާ އެވެ. އެމެރިކާާގެ ޓެކްނޮލޮޖީގެ ބޮޑެތި ކުންފުނި ތަކުން އިނގިރޭސިވިލާތުގައި ހިންގާ އޮޕަރޭޝަން ތަކަށް އަންނަނީ އެތައް ބިލިއަން އެމެރިކާ ޑޮލަރެއް އިންވެސްޓު ކުރަމުންނެވެ.