ވެނެޒުއެލާގެ ރައީސް މަދޫރޯ ވިދާޅުވީ ޓްރަމްޕްގެ ވާހަކަ އިން ހާމަވަނީ އެމެރިކާއިން ހަގީގަތުގައި ބޭނުންވަނީ ވެނެޒުއެލާގެ ސަރަހައްދާއި ވަސީލަތްތަކަށް ވެރިވެގަތުމާއެކު އެ ގައުމުގެ ވެރިކަން ބަދަލުކުރުން ކަމަށެވެ. ޓްރަމްޕް ވިދާޅުވީ ވެނެޒުއެލާ އިން ގާނޫނާ ހިލާފަށް އެމެރިކާގެ ހަކަތައިގެ ހައްގުތައް އަތުލާފައިވާ ކަމަށާއި އެ ހައްގުތައް އަނބުރާ ނުދޭހާ ހިނދަކު އަސްކަރީ ހަރަކާތްތައް ކުރިއަށް ދާނެ ކަމަށެވެ.
ޕެނަމާގެ އެމަޑޯރ އިންޓަރނޭޝަނަލް ކްރޫޒް ޓާމިނަލްގައި އެމެރިކާގެ ނޭވީ މިސައިލް ޑިސްޓްރޯޔަރ، ބަނދަރު ކޮށްފައި - ސެޕްޓެމްބަރ 02، 2025
ވެނެޒުއޭލާ އިން ވަނީ އެމެރިކާ ގެ ތެލާއި، ބިމާއި މުދާ ވަގަށް ނަގާފައި ކަމަށާއި، އެ ތަކެތި އަނބުރާ ނުލިބެނީސް އެ އަސްކަރީ ހަރަކާތްތައް ހުއްޓާ ނުލައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕްގެ މި ވާހަކަ އަށް ރައްދު ދެއްވާ ވެނެޒުއެލާގެ ރައީސް ނިކޮލާސް މަދޫރޯ ބުދަ ދުވަހު ވިދާޅުވީ އެމެރިކާގެ ރައީސް ޑޮނަލްޑް ޓްރަމްޕް ގެ ހަގީގީ ނިޔަތް ސާފުވެއްޖެ ކަމަށެވެ.
މަދޫރޯ ވިދާޅުވީ ޓްރަމްޕްގެ ވާހަކަ އިން ހާމަވަނީ އެމެރިކާ އިން ހަގީގަތުގައި ބޭނުންވަނީ ވެނެޒުއެލާގެ ސަރަހައްދާއި ވަސީލަތްތަކަށް ވެރިވެގަތުމާއެކު އެ ގައުމުގެ ވެރިކަން ބަދަލުކުރުން ކަމަށެވެ. މީގެ ކުރިން އެމެރިކާ އިން ބުނެފައި ވަނީ ވެނެޒުއޭލާގެ ކައިރީގައި އެމެރިކާގެ އަސްކަރީ ބާރުތައް އިތުރުކުރަމުން ދަނީ މަސްތުވާތަކެތީގެ ވިޔަފާރިއާ ދެކޮޅަށް މަސައްކަތް ކުރުމަށް ކަމަށެވެ.
މަދޫރޯ ބުދަ ދުވަހު ދެއްކެވި ވާހަކަފުޅެއްގައި އެމެރިކާ އިން ބޭނުން ވެގެން އުޅެނީ، ވެނެޒުއޭލާ އެމެރިކާގެ ކޮލޮނީ އަކަށް ހަދައި، ގޮނޑި ކޮއްކޮ ސަރުކާރެއް ވެނެޒުއެލާގައި އުފައްދަން ކަމަށާއި އެހެން ނަމަވެސް އެފަދަ ސަރުކާރެއް، 47 ގަޑިއިރު ވެސް ދެމި އޮންނަން ނުކެރޭނެ ކަމަށް ވިދާޅުވި އެވެ.
އަންގާރަ ދުވަހު ޓްރަމްޕް ޓްރުތު ސޯޝަލްގައި ލިޔުއްވީ ވެނެޒުއެލާގެ ވަށައިގެން އަސްކަރީ ބާރުތައް އިތުރުކުރައްވާނެ ކަމަށާއި، އަދި އެ ގައުމުން އެމެރިކާ ގެ "ތެލާއި، ބިމާއި، އަދި އެހެނިހެން ވަސީލަތްތައް ވަގަށް ނަގާފައިވާ ކަމަށާއި، އެތަކެތި އަނބުރާ ނުދޭހާ ހިނދަކު އަސްކަރީ ހަރަކާތްތައް ކުރިއަށް ދާނެ ކަމަށެވެ.
ޓްރަމްޕް ބުދަ ދުވަހު ނޫސްވެރިންނަށް ވިދާޅުވީ ވެނެޒުއެލާ އިން ގާނޫނާ ހިލާފަށް އެމެރިކާ އަށް ލިބިފައި އޮތް "ހަކަތައިގެ ހައްގުތައް" އަތުލާފައިވާ ކަމަށާއި، އެމެރިކާ ބޭނުން ވަނީ އެ ހައްގުތައް އަނބުރާ ހޯދުން ކަމަށެވެ.
ދުނިޔޭގެ އެންމެ ބޮޑު ތެލުގެ ރިޒާވް އޮތް ކަމަށް ބެލޭ ވެނެޒުއެލާ އިން ވަނީ އެ ގައުމުގެ ތެލުގެ ސިނާއަތް ސަރުކާރުގެ ބާރުގެ ދަށަށް 1970 ގެ އަހަރުތަކުގައި ގެނެސްފަ އެވެ. އޭގެ ކުރިން، އެމެރިކާގެ ކުންފުނިތަކަށް އެ ގައުމުގެ ތެލުގެ ސިނާއަތުގައި ވަރަށް ބޮޑު ދައުރެއް އޮތެވެ.
ޓްރަމްޕް ވަނީ އެމެރިކާ އިން ވެނެޒުއެލާ އަށް ހަމަލާތައް ދެވިދާނެ ކަމުގެ އިންޒާރު ވަރަށް ގިނަ ފަހަރު ދެއްވާފައެވެ، އަދި އެމެރިކާ އަށް މަސްތުވާތަކެތީގެ ވިޔަފާރި ކުރާ ކޮންމެ ގައުމަކީ "ހަމަލާ ދެވިދާނެ" ގައުމެއް ކަމަށް ވިދާޅުވެ، އަވަށްޓެރި ގައުމު ކޮލަމްބިއާ އެއީ އެފަދަ ގައުމުތަކުގެ ތެރެއިން ގައުމަކަށް ވެދާނެ ކަމަށް ވެސް ވިދާޅުވެފައިވެއެވެ.
މަދޫރޯ ބުދަ ދުވަހު ދެއްކެވި ވާހަކަފުޅުގައި ކޮލަމްބިއާ އަށް ގޮވާލެއްވީ ވެނެޒުއެލާ އާ އެކު ބައިވެރިވެ، ދެ ގައުމުގެ ސިޔާދަތު ދިފާއުކުރުމަށެވެ.
މަދޫރޯ ވަނީ އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް އަށް ފޯނުން ގުޅުއްވާ ޓްރަމްޕް ދެއްކެވި ވާހަކަފުޅުތައް ކުށްވެރި ކުރައްވާ ކަމަށް ވިދާޅުވެފަ އެވެ.
