ސީރިއާ ހިމެނޭހެން، ހަތް ޤައުމެއްގެ ރައްޔިތުން އެމެރިކާ އަށް ވަނުން މަނާ ކޮށްފި
އަންގާރަ ދުވަހު ސޮއި ކުރައްވާފައިވާ އެ އަމުރުގައި ބުނެފައި ވަނީ ބުރުކީނާ ފާސޯ، މާލީ، ނައިޖާ، ދެކުނު ސޫދާން، ސީރިއާ، އަދި ފަލަސްޠީނު އޮތޯރިޓީ އިން ދޫކުރާ ލިޔެ ކިޔުން ހިފައިގެން އުޅޭ މީހުންނަަށް އެމެރިކާ އަށް އެތެރެ ނުވެވޭނެ ކަމަށް.
އެމެރިކާގެ ރައީސް ޑޮނަލްޑް ޓްރަމްޕް
ސީރިއާ ހިމެނޭ ގޮތަށް، ހަތް ޤައުމެއްގެ ރައްޔިތުން އެމެރިކާ އަށް ވަނުން މަނާ ކުރުމަށް އެ ޤައުމުގެ ރައީސް ޑޮނަލްޑް ޓްރަމްޕް ނިންމަވައިފި އެވެ.
އެމެރިކާގެ ރިޔާސީ ގަނޑުވަރު، ވައިޓް ހައުސް އިން ނެރެފައިވާ ބަޔާނެއްގައި ބުނެފައި ވަނީ ޤައުމީ ސަލާމަތާއި، އާންމުންގެ ސަލާމަތަށް ދިމާވާ ނުރައްކަލުން ރައްކާތެރި ކުރުމަށްޓަކައި، ބޮޑެތި މައްސަލަތައް އޮންނަ ޤައުމު ތަކުގެ ރައްޔިތުން އެމެރިކާ އަށް ވަނުން މަނާ ކުރުން ފުޅާ ކުރައްވައި، ވަަރުގަދަ ކުރެއްވުމަށް ރައީސް ޓްރަމްޕް ނިންމަވާފައިވާ ކަމަށެވެ.
އެ ނިންމުން ނިންމަވައި، ޓްރަމްޕް ވަނީ އަމުރެއްގައި ސޮއި ކުރައްވައިފަ އެވެ. އަންގާރަ ދުވަހު ސޮއި ކުރައްވާފައިވާ އެ އަމުރުގައި ބުނެފައި ވަނީ ބުރުކީނާ ފާސޯ، މާލީ، ނައިޖާ، ދެކުނު ސޫދާން، ސީރިއާ، އަދި ފަލަސްޠީނު އޮތޯރިޓީ އިން ދޫކުރާ ލިޔެ ކިޔުން ހިފައިގެން އުޅޭ މީހުންނަަށް އެމެރިކާ އަށް އެތެރެ ނުވެވޭނެ ކަމަށެވެ.
މީގެ އިތުރުން، މީގެ ކުރިން ވެސް އެމެރިކާ އަށް ވަނުން މަނާ ކޮށްފައިވާ ލާއޯސް އަދި ސިއެރާ ލިއޯން އަށް ވަނީ ދާއިމީ މަނާ ކުރުމެއް ކަނޑައަޅުއްވައި، އެކަން ތަންފީޒު ކުރެއްވުމަށް އަންގަވައިފަ އެވެ. ވައިޓް ހައުސް އިން ބުނެފައި ވަނީ އެކަމަށް އަމަލު ކުރަން ފަށާނީ 2026 ވަނަ އަހަރުގެ ޖަނަވަރީ މަހުގެ އެއް ވަނަ ދުވަހުން ފެށިގެން ކަމަށެވެ.
މިފަދަ ނިންމެވުމެއް ޓްރަމްޕް ނިންމަވާފައިވާއިރު، މިދިޔަ ނޮވެމްބަރު މަހުގެ ތެރޭގައި ޓްރަމްޕް ވަނީ ސީރިއާގެ ރައީސް އަޙުމަދު އަލް ޝަރާއާ ބައްދަލު ކުރައްވައިފަ އެވެ. ވައިޓް ހައުސްގައި އަލް ޝަރާއާ ބައްދަލު ކުރައްވައި ޓްރަމްޕް ވަނީ، އެމެރިކާ އިން ސީރިއާ އަށް ފުރިހަމަ އެއްބާރުލުން ދެއްވާނެ ކަމަށް ވެސް ވިދާޅުވެފަ އެވެ. މީގެ ކުރިން އަލް ޤައިދާގެ ކޮމާންޑަރުގެ ގޮތުގައި ހުންނެވި އަލް ޝަރާ އަކީ، އެމެރިކާ އިން ޓެރަރިސްޓެއްގެ ގޮތުގައި ކަނޑައަޅާފައި ހުންނެވި ބޭފުޅެކެވެ.
އެހެން ނަމަވެސް، ސީރިއާގެ ވެރިކަމުން ބަސާރު އަލް އަސަދު ވައްޓާލުމަށް ފަހު، 2024 ވަނަ އަހަރުގެ ފަހު ކޮޅު އަލް ޝަރާ އެ ޤައުމުގެ ވެރި ކަަމަށް ވަޑައިގެން، ގިނަ ޤައުމުތަކާ އެކު މަޝްވަރާ ކުރައްވަމުން އަންނައިރު، އެމެރިކާ އިން ވެސް ވަނީ އެކަމަށް މަރުޙަބާ ކިޔައިފަ އެވެ. އަދި ހަނގުރާމައިގެ ތެރޭގައި އޮތް ސީރިއާ އަށް ދިރުން ގެނެސް، ޤައުމު އާރާސްތު ކުރުމަށް އަލް ޝަރާ މަސައްކަތް ކުރައްވާ ކަމަށް ވެސް ޓްރަމްޕް އޮތީ ވިދާޅުވެފަ އެވެ.
ނަމަވެސް، ސީރިއާގައި އެމެރިކާ ސިފައިންގެ ދެ އޮފިޝަލަކު މަރާލާފައިވާ ކަމަށް ބުނާ މައްސަލައިގައި ޓްރަމްޕް ވަނީ ވަރަށް ބޮޑަށް ނުރުހުންވެފަ އެވެ. އެގޮތުން ޓްރަމްޕް ވިދާޅުވެފައި ވަނީ، އެކަމުގެ ބަދަލު އެމެރިކާ އިން ވަރަށް ސީރިއަސްކޮށް ހިފާނެ ކަމަށެވެ.
މަނާ ކުރުން ތަކުގެ ތެރޭގައި ސީރިއާ ހިމަނަން ނިންމާފައިވާ ނިންމުމާ ގުޅޭ ގޮތުން ވައިޓް ހައުސް އިން ބުނެފައި ވަނީ ސީރިއާ އަކީ ދާޚިލީ ހަނގުރާމަ އިން ބޭރުވުމަށް މަސައްކަތް ކުރަމުން އަންނަ ޤައުމެއް ކަމަށާއި، އެމެރިކާއާ ގުޅިގެން ސަލާމަތީ ގޮންޖެހުންތައް ހައްލު ކުރުމަށް ވެސް ސީރިއާ އިން މަސައްކަތް ކުރާ ކަމަށެވެ.
ނަމަވެސް، ސީރިއާގައި ޕާސްޕޯޓު ނުވަތަ ސިވިލް ލިޔެ ކިޔުންތައް ދޫކުރުމަށް ފެންވަރު ރަނގަޅު މަރުކަޒެއް ނުވަތަ އިދާރާއެއް ނެތް ކަަމަށް ވައިޓް ހައުސް އިން ބުނެފައިވެ އެވެ. އަދި އެކަންކަން ރަނގަޅަށް ބަލައި، ދިރާސާކޮށް، ޔަގީން ކުރެވޭނެ ރަނގަޅު ނިޒާމެއް ވެސް ޤާއިމުވެފައި ނެތް ކަމަށް ވަނީ ބުނެފަ އެވެ.
މަސްދަރު: ރޮއިޓާސް
