ޗައިނާ އިން ވެނެޒުއެލާ އަށް ތާއީދު ކުރާކަން ހާމަކޮށް އެމެރިކާގެ "ބުލީ ކުރުން" ކުށްވެރިކޮށްފި

އެމެރިކާ އިން ވެނެޒުއޭލާ އަށް ތާއީދު ކުރާ ކަމަށާއި އެމެރިކާ ގެ "ބުލީ ކުރުން" ކުށްވެރިކޮށް އެކަމާ ދެކޮޅު ހަދާ ކަމަށް ޗައިނާ އިން ބުނެފި އެވެ.

ޗައިނާ އިން އެމެރިކާ އަށް ފާޑު ކިޔާފައި ވަނީ ވެނެޒުއެލާ އަށް ވަންނަ އަދި ނުކުންނަ ޓޭންކަރުތަކަށް ހުރަސްއެޅުމުގެ އަމުރެއް އެމެރިކާ އިން ނެރުމާ ގުޅިގެންނެވެ.

މި ހަފްތާގެ ކުރީކޮޅު، އެމެރިކާގެ ރައީސް ޑޮނަލްޑް ޓްރަމްޕް ވަނީ ވެނެޒުއޭލާ އަށް ދަތުރު ކުރާ އަދި ވެނެޒުއޭލާ އިން ފުރާ ހުރިހާ ތެޔޮ ޓޭންކަރުތަކަކަށް ހުރަސް އެޅުމަށް އަމުރެއް ނެރުއްވާފައެވެ. އޭގެ އިތުރުން ވޮޝިންޓަނުން ވަނީ ވެނެޒުއޭލާ ސަރަހައްދަށް އެތައް ހާސް ސިފައިންނާއި އަސްކަރީ އުޅަނދުތައް ފޮނުވާފަ އެވެ.

ޗައިނާ އަކީ ވެނެޒުއެލާ ގެ ސާފު ނުކުރާ ތެޔޮ އެންމެ ގިނައިން ގަންނަ ގައުމެވެ. އެއީ ޗައިނާގެ ތެލުގެ އިމްޕޯޓުގެ  4 އިން ސައްތަ އެވެ. ދުވާލަކަށް ގާތްގަނޑަކަށް އެވްރެޖްކޮށް 600،000 ފީފާ ގެ ތެޔޮ ވެނެޒުއޭލާ އިން ޗައިނާ އަށް ސަޕްލައި ކުރާ ކަމަށް ވިޔަފާރީގެ ތަޖުރިބާކާރުން ބުނެފައިވެއެވެ.

ބުދަ ދުވަހު ވެނެޒުއެލާ ގެ ޚާރިޖީ ވަޒީރު އިވާން ގިލް އާ ފޯނުން ވާހަކަދައްކަވަމުން ޗައިނާގެ ޚާރިޖީ ވަޒީރު ވޮންގ ޔީ ވިދާޅުވީ، އެމެރިކާ އިން ވެނެޒުއޭލާ އަށް ހަނގާ ކުރުމާއި ދެކޮޅު ހަދާ ކަމަށާއި، ގައުމުތަކުގެ ސިޔާދަތާއި ގައުމީ ޝަރަފު ރައްކާތެރިކުރުމުގައި ޗާއިނާ އިން ތާއީދުކުރާ ކަމަށެވެ.

ޗައިނާ އިން ވެނެޒުއެލާ އަށް ފޯރުކޮށްދެވިދާނެ އެހީ އަކީ ކޮބައި ކަމެއް ވޮންގ ވިދާޅެއް ނުވެއެވެ. ޗައިނާ އިން ކުރިން ބުނެފައި ވަނީ ވެނެޒުއޭލާ އާ އެކު އޮންނަނީ ވަރަށް ވަރުގަދަ ގުޅުމެއް ކަމުގައެވެ.

އެމެރިކާ އިން ގެންދަނީ ޓެރަރިޒަމް އާއި މަސްތުވާތަކެތީގެ ވިޔަފާރި އަދި އިންސާނުންގެ ވަގުފާރި ހުއްޓުވުމަށް ކަމަށް ބުނެ ޕެސިފިކް ސަރަހައްދުގައި ބޮޑު އަސްކަރީ އޮޕަރޭޝަނެއް ހިންގަމުންނެވެ. ވެނެޒުއޭލާ އިން ބުނަނީ އެ އޮޕަރޭޝަން ގެ ހަގީގީ މަގްސަދަކީ އެ ގައުމުގެ ވެރިކަން ބަދަލުކޮށް ތެލުގެ ވަސީލަތްތަކަށް އެމެރިކާ އިން ވެރިވެގަތުން ކަމުގައެވެ.

ޕޮލިޓިކޯ ނޫހަށް ދެއްވި އިންޓަވިއުއެއްގައި ޓްރަމްޕް ވިދާޅުވީ މަދުރޯގެ ދުވަސްތައް "އަދަދު ޖެހިފައިވާ" ކަމަށެވެ.

ވަރަށް ގިނަ އަހަރުތަކެއް ވަންދެން، ޗައިނާ އިން ވެނެޒުއެލާ އަށް ލޯނު-ފޯ-އޮއިލް ޑީލްތަކުގެ ދަށުން ކްރެޑިޓް ލައިންތައް ދީފައިވެއެވެ. މި އަހަރު މޮސްކޯ ގައި ޗައިނާގެ ރައީސް ޝީ ޖިންޕިންގ އާ ބައްދަލުކުރައްވައި، މަދުރޯ ޝީއަށް ވިދާޅުވީ ވެނެޒުއެލާ އިން ވިޔަފާރި އާއި ހަކަތައިގެ ދާއިރާ އިން ޗާއިނާ އާ އެކު ގުޅުން ފުޅާކުރުމަށް އިންތިޒާރު ކުރަމުން އަންނަ ކަމަށެވެ.

އެއާއެކު، ޗައިނާ އަށް އެމެރިކާ ވެފައި ވަނީ ވިޔަފާރީގެ އެންމެ މުހިންމު ބައިވެރިޔާ ކަމުގައެވެ. އޭގެ ސަބަބުން ވިޔަފާރީގެ މުއާމަލާތްތަކަށް ބުރުލެއް އެރިޔަ ނުދިނުމަށް ޗައިނާ އިން އަންނަނީ ވަރަށް ބޮޑަށް މަސައްކަތް ކުރަމުންނެވެ.

ޗައިނާ އިން ބުނަނީ އދ ޗާޓަރަށް ހިލާފުވާ ނުވަތަ އެހެން ގައުމުތަކުގެ ސިޔާދަތާއި ސަލާމަތަށް އަރައިގަންނަ ކޮންމެ އަމަލަކާ ދެކޮޅު ހަދާ ކަމަށެވެ.

"ޗައިނާ އިން ގަބޫލު ކުރަނީ ބައިނަލްއަގުވާމީ މުޖުތަމައު އިން ވެނެޒުއެލާގެ ޝަރުއީ ހައްގުތަކާއި މަސްލަހަތުތައް ދިފާއުކުރުމުގައި އެ ގައުމަށް ތާއީދު ކުރާނެ ކަމަށް،" ވޮންގ ވިދާޅުވިއެވެ.

އދގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ވަނީ މަސްރަހު ފިނިކުރުމަށް ގޮވާލައްވައި، އެމެރިކާ އާއި ވެނެޒުއެލާ އިން ބައިނަލްއަގުވާމީ ގާނޫނާއި، އދ ޗާޓަރާއި އެ ސަރަހައްދުގެ ސުލްހަ ރައްކާތެރިކުރުމަށް އެކުލަވާލެވިފައިވާ އެހެނިހެން ގާނޫނީ ފްރޭމްވޯކްތަކުގެ ދަށުން ޒިންމާތައް އަދާކުރުމަށް ގޮވާލައްވާފަ އެވެ.

މެކްސިކޯއާއި ބްރެޒިލްގެ ރައީސުން ވެސް ވަނީ މަޝްވަރާތައް ކުރުމަށް ގޮވާލައްވާފައެވެ. ރަޝިއާގެ ރައީސް ވްލަޑިމިއަރ ޕޫޓިން، ފާއިތުވި ހަފްތާގައި މަދުރޯއާ ފޯނުން ވާހަކަދައްކަވަމުން، ގައުމުގެ ސިޔާދަތު ރައްކައުތެރިކުރުމަށް މަދޫރޯ ގެ ސަރުކާރުން ގެންގުޅޭ ސިޔާސަތައް ތާއީދު ކުރައްވާ ކަމަށް ވިދާޅުވި އެވެ.