ހައުސިންގ ޑިވެލޮޕްމަންޓް ކޯޕަރޭޝަނުން ބުނެފައިވަނީ 2023 ޑިސެމްބަރު 31 ގެ ނިޔަލަށް ޖުރިމަނާގެ ގޮތުގައި ދައްކަން ޖެހި ނުދެއްކި ހުރި ފައިސާ އާއި 2024 ޖެނުއަރީ 1 އިން ފެށިގެން 2025 ނޮވެމްބަރު 30 ގެ ނިޔަލަށް ދައްކަން ޖެހޭ ޖުރިމަނާ ފައިސާ ރައީސުލްޖުމްހޫރިއްޔާ މާފު ކުރައްވައިފި ކަމަށް.
ޗައިނާ ސަރުކާރުގެ ލޯނު އެހީގައި ހުޅުމާލޭ ގައި އިމާރާތް ކޮށްފައިވާ ހިޔާ ފްލެޓްތައް
ހިޔާ ފްލެޓް ތަކަށް ޖުރިމަނާ ގެ ގޮތުގައި ދައްކަން ޖެހޭ ފައިސާ މާފު ކޮށްދޭން ފަށައިފި އެވެ.
ހައުސިންގ ޑިވެލޮމްޕަންޓް ކޯޕަރޭޝަން (އެޗްޑީސީ) އިން ގެންދަނީ ހިޔާ ފްލެޓް ގަނެފައިވާ ފަރާތްތަކުން ޖުރިމަނާގެ ގޮތުގައި ދައްކަން ޖެހޭ ފައިސާ މާފު ކޮށްދީފައިވާ ކަމަށް ބުނެ މި ޑިސެމްބަރު މަހު މެދުތެރޭގައި އެކި ފަރާތްތަކަށް ސިޓީ ފޮނުވަމުންނެވެ.
އެޗްޑީސީ އިން ހިޔާ ފްލެޓް ގަނެފައިވާ ފަރާތަކަށް ފޮނުވާފައި ސިޓީ އެއް ގައި ބުނެފައި ވަނީ ހިޔާ ފްލެޓް ތަކަށް ފައިސާ ދެއްކުމުގައި ސަރުކާރުން ދޭން ކަނޑައަޅާފައިވާ ލުއިތަކުގެ ދަށުން 31 ޑިސެމްބަރު 2023 ގެ ނިޔަލަށް ޖުރިމަނާގެ ގޮތުގައި އެ ކޯޕަރޭޝަނަށް ދައްކަން ޖެހި ނުދެއްކި ހުރި ފައިސާ ވަނީ މާފު ކުރެވިފައި ކަމަށެވެ.
"ހަމަ އެ އުސޫލުން، ރައްޔިތުންނަށް އިތުރު ލުއި ފަސޭހަ ގޮތްތަކެއް ހޯދައި ދިނުމުގެ ގޮތުން...1 ޖެނުއަރީ 2024 އިން ފެށިގެން 30 ނޮވެމްބަރު 2025 ގެ ނިޔަލަށް ޖުރިމަނާ ގެ ގޮތުގައި ދައްކަން ޖެހި ނުދެއްކި ހުރި ފައިސާ ވެސް މާފު ކޮށްދެއްވުމަށް ރައީސުލްޖުމްހޫރިއްޔާ ނިންމަވާފައިވާތީ، އެ ފައިސާ ވެސް މާފު ކޮށްދީފައިވާ ކަމަށް،" އެޗްޑީސީ އިން ފޮނުވި ލިޔުމުގައި ވަނީ ބުނެފަ އެވެ.
ހިޔާ ފްލެޓް ގަތް ފަރާތްތަކުން ދައްކަން ޖެހޭ ޖުރިމަނާ ފައިސާ ރައީސް މުއިއްޒު މާފު ކޮށްދެއްވި ކަމަށް އެޗްޑީސީ އިން އެކި ފަރާތްތަކަށް އަންގަމުން ގެންދާއިރު، ރައީސް މުއިއްޒު ހުޅުމާލޭގައި ދިރިއުޅޭ މީހުންނާ ބުރާސްފަތި ވިލޭރޭ ބައްދަލު ކުރާ ގޮތަށް ވަނީ ހަމަޖައްސާފައެވެ.
ލޯކަލް ކައުންސިލް އިންތިޚާބަށް ކުޑަތަން ވަމުން އަންނަ އިރު ސަރުކާރުން ގެންދަނީ ރައްޔިތުންނަށް ދަތިވެފައިވާ ކަންކަން ހައްލު ކުރުމުގެ ނަމުގައި ތަފާތު ކަންކަން ކުރަމުންކަން ފާހަގަ ކުރެވެ އެވެ.
