ޓްރަމްޕް ސަރުކާރުން ސަދަން ސްޕިއަރ ނަމުގައި ކުރިއަށް ގެންދާ މި އޮޕަރޭޝަނުގައި މިހާތަނަށް 99 މީހުން މަރުވެފައިވެއެވެ. ވެނެޒުއޭލާގެ ރައީސް މަދޫރޯ ވިދާޅުވީ މިއީ އެ ގައުމުގެ ސަރުކާރު ބަދަލުކޮށް ތެލުގެ ވަސީލަތްތައް ކޮންޓްރޯލްކުރަން ހިންގާ އޮޕަރޭޝަނެއް ކަމަށް.
ކެރިބިއަން ކަނޑުގައި އޮތް އެމެރިކާގެ މަނަވަރަކަށް އަސްކަރީ މަތިންދާ ބޯޓެއް ޖައްސަނީ
އެމެރިކާގެ ސިފައިން ބުދަ ދުވަހު އިރުމަތީ ޕެސިފިކް ކަނޑުގައި މަސްތުވާތަކެތީގެ ވިޔަފާރިކުރާ ކަމަށް ތުހުމަތުކުރެވޭ އިތުރު ބޯޓަކަށް ހަމަލާދީ 4 މީހުން މަރާލާފައިވާ ކަމަށް އެމެރިކާގެ ސަދާން ކޮމާންޑުން ބުނެފިއެވެ.
"ޑިސެމްބަރު 17 ވަނަ ދުވަހު، ސެކްރެޓަރީ އޮފް ވޯ ހެގްސެތު ގެ އިރުޝާދުގެ ދަށުން، ޖޮއިންޓް ޓާސްކް ފޯސް ސަަދަން ސްޕިއާ އިން ބައިނަލްއަގުވާމީ ކަނޑުގައި ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވާ ޖަމާއަތަކުން ހިންގާ ބޯޓަކަށް މަރުގެ ހަމަލާއެއް ދީފި،" ސައުތްކޮމް އިން އެކްސްގައި ލިޔެފައިވެއެވެ.
ސައުތްކޮމް އިން އިތުރަށް ބުނީ މި ހަމަލާގައި އެމެރިކާގެ ސިފައިންގެ ތެރެއިން އެއްވެސް މީހަކަށް ގެއްލުމެއް ލިބިފައި ނުވާ ކަމަށެވެ.
ބުދަ ދުވަހުގެ ހަމަލާއަކީ މި ހަފްތާގެ ދެވަނަ ހަމަލާ އެވެ. އެމެރިކާ އިން ހޯމަ ދުވަހު އިރުމަތީ ޕެސިފިކް ކަނޑުގައި މަސްތުވާތަކެތީގެ ވިޔަފާރިކުރާ ކަމަށް ތުހުމަތުކުރެވޭ ތިން ބޯޓަކަށް ހަމަލާދީ 8 މީހުން މަރާލާފައިވެ އެވެ.
ސަދަން ސްޕިއަރ ގެ ނަމުގައި މަސްތުވާތަކެތީގެ ވިޔަފާރި ހުއްޓުވުމަށް ކަމަށް ބުނެ ޓްރަމްޕް ސަރުކާރުން ކުރިއަށް ގެންދާ މި އޮޕަރޭޝަން ގައި މަސްތުވާތަކެތީގެ ވިޔަފާރިކުރާ ކަމަށް ޝައްކުކުރެވޭ ބޯޓުތަކަށް ހަމަލާދީ މިހާތަނަށް 99 މީހުން މަރާލާފައިވާ ކަމަށް ރިޕޯޓު ކޮށްފައިވެ އެވެ.
މި ހަމަލާތަކަކީ ވެނެޒުއެލާ އަށް އަމާޒު ކޮށްގެން އެމެރިކާ އިން ހިންގާ އޮޕަރޭޝަނެއް ކަމަށާއި މީގެ ހަގީގީ މަގްސަދަކީ ވެނެޒުއޭލާގެ ސަރުކާރު ބަދަލު ކޮށް އެ ގައުމުގެ ތެލުގެ ވަސީލަތްތަކުގެ މައްޗަށް ވެރިވެގަންނަން ކުރާ ކަމެއް ކަމަށް ވެނެޒުއޭލާގެ ރައީސް ނިކޮލަސް މަދޫރޯ ވަނީ ވިދާޅުވެފަ އެވެ.
އެމެރިކާ ސަރުކާރުން އެތައް ހާސް ސިފައިންނާއި ކެރިއާ ސްޓްރައިކް ގްރޫޕެއް ކެރިބިއަން ސަރަހައްދަށް ގެންގޮސްފައިވާއިރު، ޓްރަމްޕް އަންގާރަ ދުވަހު ވިދާޅުވީ ވެނެޒުއޭލާ އަށް ދަތުރުކުރާ ތެޔޮ ޓޭންކަރުތަކަށް ފުރިހަމަ އަަށް ހުރަސް އަޅާފައިވާ ކަމުގައެވެ.
