އެމެރިކާ ސިފައިން ވެނެޒުއެލާ ކައިރިން ބޮޑު ތެޔޮ ޓޭންކަރެއް ހިފައިފި، ވެނެޒުއޭލާ އިން ބުނީ މިއީ ކަނޑުފޭރުން ކަމަށް!

ވެނެޒުއެލާގެ ކަނޑުގެ ސަރަހައްދުން ތެޔޮ ޓޭންކަރެއް އެމެރިކާ ސިފައިން ހިފައިފިއެވެ. އެމެރިކާ ސިފައިން ތެޔޮ ޓޭންކަރަށް އަރާ މަންޒަރު އާންމުވެފައި ވާއިރު މިކަން ވަނީ ރައީސް ޑޮނަލްޑް ޓްރަމްޕް ވެސް އިއުލާނު ކުރައްވާފަ އެވެ. މިއީ ނިކޮލަސް މަދޫރޯގެ ސަރުކާރާ ދެކޮޅަށް އެމެރިކާ ސަރުކާރުން ކުރަމުންދާ ކެމްޕޭން ގައި ވަރަށް ސީރިއަސް ހަރުފަތަކަށް ދިއުން ކަމަށް ރިޕޯޓުތައް ބުނެއެވެ.

"އަޅުގަނޑުމެން ވެނެޒުއެލާގެ ކަނޑުން ޓޭންކަރެއް ހިފައިފިން - ބޮޑު ޓޭންކަރެއް، ވަރަށް ބޮޑު، ހަގީގަތުގައި މިހާތަނަށް ހިފި އެންމެ ބޮޑު ޓޭންކަރު،" ޓްރަމްޕް ވައިޓް ހައުސް ގައި ނޫސްވެރިންނަށް ވިދާޅުވިއެވެ.

ޓޭންކަރަށް އެމެރިކާ ސިފައިން އަރާ ވީޑިއޯއެއް ރިލީޒްކުރައްވައި، އެޓާނީ ޖެނެރަލް ޕާމް ބޮންޑީ އެ ޓޭންކަރު ސިފަކުރެއްވީ "ވެނެޒުއެލާ އާއި އީރާނުން ސެންކްޝަން ކޮށްފައިވާ ތެޔޮ ބަދަލުކުރުމަށް ބޭނުން ކުރާ ކުރޫޑް އޮއިލް ޓޭންކަރެއް" ކަމުގައެވެ.

ވެނެޒުއޭލާ އިން މި އަމަލު ކުށްވެރިކޮށް، މިއީ "ބައިނަލްއަގުވާމީ ކަނޑުފޭރުން" ކަމަށް ބުނެފައިވެއެވެ.

ޓްރަމްޕް ސަރުކާރުން ވެނެޒުއެލާ އަށް ތުހުމަތު ކުރަނީ އެމެރިކާ އަށް މަސްތުވާތަކެތި ފޮނުވަމުންދާ ކަމަށާއި، މިހާރު ކުރަމުންދާ މަސައްކަތަކީ ރައީސް މަދޫރޯ އެކަހެރި ކުރުން އިތުރުކުރުމުގެ މަސައްކަތް ކަމަށް ބުނެފައިވެއެވެ.

ވެނެޒުއެލާ އަކީ ދުނިޔޭގެ އެންމެ ބޮޑު ތެލުގެ ރިޒާވް އޮންނަ ގައުމެވެ. ވެނެޒުއޭލާ އިން ބުނަމުން އަންނަނީ އެމެރިކާ އިން އުޅެނީ އެ ގައުމުގެ ތެލުގެ ޚަޒާނާ އަށް އަތްގަދަ ކުރަން ކަމަށެވެ.

މިފަދަ ހާދިސާ ތަކާ ގުޅިގެން ވެނެޒުއޭލާގެ ތެލުގެ ސަޕްލައި އަށް ހުރަސް އެޅިއްޖެ ނަމަ ދުނިޔޭގެ ތެލުގެ އަގަށް ބަދަލު އަތުވެދާނެ ކަމަށް ތަޖުރިކާބާރުން ވަނީ ބުނެފައެވެ.