އެ މީހުން ދޫކޮށްލުމަށް ބައިނަލްއަގުވާމީ ޖަމިއްޔާ ޖަމާއަތްްތަކާއި، އދ. ހިމެނޭހެން ބައިނަލްއަގުވާމީ ފަރާތްތަކާއި، އިދިކޮޅު އެމްޑީޕީ އާއި ބައެއް ސިޔާސީ ލީޑަރުން ވަނީ ގޮވާލާފަ.
ބޮޑުކަންނެލި މަސްވެރިން ކުރި އިހުތިޖާޖުގެ ތެރެއިން
ރައީސް މުއިއްޒު ބޮޑު ކަންނެލި މަސްވެރިންނަށް ވެފައިވާ ވައުދުތައް ފުއްދުމަށް ގޮވާލައި ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) އިން އިންތިޒާމުކޮށްގެން ކުރި މުޒާހަރާ ގެ ތެރެއިން ހައްޔަރުކުރި އެންމެން ދޫކޮށްލައިފި އެވެ.
އެ މުޒާހަރާ ފެށީ ގައުމީ ފެންވަރު ގައި ފާހަގަކުރާ މަސްވެރިންގެ ދުވަސް ކަމަށްވާ ޑިސެމްބަރު 10، ގަ އެވެ. ހުޅުމާލޭ ކަންނެލި ޖެޓީން ފެށި މުޒާހަރާ ގައި ބައިވެރިވި 49 އުޅަނދު އެ ދުވަހު މެންދުރު މިސްރާބު ޖެހީ މާލެއަށެވެ. މާލޭގެ ނެރުތައް އެމްއެންޑީއެފް އާއި ފުލުހުން ބަންދުކުރިއިރު އެ ރޭ ދޯނިތައް ނަގިލި ލައިގެން ތިބީ މާލޭ އެއް ނަންބަރު ފާލަމުގެ ބޭރުން ކަނޑުގަ އެވެ. ނަމަވެސް ޖެހިގެން އައި ޑިސެންބަރު 11 ވަނަ ދުވަހު އިހުތިޖާޖު ރޫޅާލައި މީހުން ހައްޔަރުކުރީ ކޯޓު އަމުރެއް ވެސް ނެތި ދޯނިފަހަރަށް ފުލުހުން އަރައިގެންނެވެ.
ދޯނިތަކަށް އަރާ ފުލުހުން ހައްޔަކުރި މީހުންގެ ތެރޭގައި ހިމެނެނީ ބީކޭއެމްޔޫ ގެ ސެކްރެޓަރީ ޖެނެރަލް އަދި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު، ޓޫރިޒަމް އެމްޕްލޯއީސް އެސޯސިއޭޝަން (ޓީމް) ގެ ނައިބު ރައީސް މުހައްމަދު ސޯދިގުގެ އިތުރުން ދެ ކެޔޮޅުން ކަމަށްވާ މުހައްމަދު މުސްތަފާ އާއި އަބްދުއްލަތީފު އަހުމަދު އެވެ. ބާސިރު މިއާ، ރިއާޒުއްދީން، ގޮލަމް ސަރޮވާރު އަދި މުހައްމަދު މިޓޫ ގެންދިޔައީ އިމިގްރޭޝަންގެ ބެލުމުގެ ދަށަށެވެ. އެއީ އެ ދޯނިތަކުގައި މަސައްކަތް ކުރަމުންދިޔަ ބިދޭސީންނެވެ.
އެ މީހުން ދޫކޮށްލުމަށް ބައިނަލްއަގުވާމީ ޖަމިއްޔާ ޖަމާއަތްްތަކާއި، އދ. ހިމެނޭހެން ބައިނަލްއަގުވާމީ ފަރާތްތަކާއި، އިދިކޮޅު އެމްޑީޕީ އާއި ބައެއް ސިޔާސީ ލީޑަރުން ވަނީ ގޮވާލާފަ އެވެ.
އިހުތިޖާޖުގެ ތެރެއިން ހައްޔަރުކުރި ފަރާތްތަށް ދޫކޮށްކުމުން ބީކޭއެމްޔޫ އިން ނެރެނު ނޫސްބަޔާނެއްގައި ބުނީ، މިއީ އެ މަސްވެރިން ދޫކޮށްލަން ގޮވާލައި، އިންސާފު ހޯދުމަށް ޔޫނިއަންގެ މެންބަރުން ގުޅިގެން ކުރި މަސައްކަތުގެ ނަތީޖާ ކަމަށެވެ. އިހުތިޖާޖު ގެ ބައިވެރިންނަށް ބިރު ދައްކައި ނުފޫޒު ފޯރުވުމަށް މަސައްކަތް ކުރި ނަމަވެސް އެ ޔޫނިއަންގެ މެންބަރުންގެ ހަނު ތިބުމަށް އިންކާރު ކުރި ކަމަށް ބީކޭއެމްޔޫ އިން ބުނެފައިވެ އެވެ. އެ ސާބިތުކަމުން ދައްކުވައިދެނީ މަސައްކަތްތެރިން ގުޅިގެން މަސައްކަތް ކޮށްފިނަމަ، ހައްގުތައް ދިފާއު ކުރުމުގެ ބާރު އޮތްކަން ކަމަށް ވެސް ބީކޭއެމްޔޫއިން ބުނެ އެވެ. ކުރިއަށް އޮތް ތަނުގައި ވެސް މަސްވެރިންގެ ހައްގުތަކަށް ވަކާލާތު ކުރުމުގައި ދެމިތިބޭނެ ކަމުގެ ޔަގީންކަން ބީކޭއެމްޔޫއިން ވަނީ ދީފަ އެވެ.
ބޮޑު ކަންނެލި މަސްވެރިންގެ ޔޫނިއަންގެ ފަރާތުން މި އަހަރުގެ މަސްވެރިންގެ ދުވަސް، ޑިސެމްބަރު 10 ވަނަ ދުވަހުން ފެށިގެން ސުލްހަވެރިކަމާ އެކު ވަނީ އިހުތިޖާޖު ކޮށްފަ އެވެ. ބޮޑުކަންނެލި މަސްވެރިންނަށް މި ސަރުކާރުން ވީ ވައުދުތައް ފުއްދައިދިނުމަށް ގޮވާލާ ކުރި މި އިހުތިޖާޖުގެ ބައިވެރިން ވަނީ ސަރުކާރަށް 3 ޑިމާންޑެއް ކޮށްފަ އެވެ. އެއީ މި ސަރުކާރުގެ މެނިފެސްޓޯގައި ވެސް ހިމަނާފައިވާ ގޮތަށް ސަރުކާރުގެ މަސް ކުންފުނި، މިފްކޯ އަށް ބޮޑު ކަންނެލި ގަންނަން ފެށުމާއި، ކަންނެލި ގަނެވޭނެ އެންމެ ދަށް އަގަކީ 80 ރުފިޔާ އާއި 100 ރުފިޔާ އާ ދެމެދު ކަމަށް ކަނޑައެޅުމުގެ އިތުރުން ބޭސް ރޭޓުގައި މަސްވެރިންނަށް ތެލާއި އައިސް ލިބޭނެ ގޮތް ހަދައިދިނުމެވެ.
