ފިލައިގެން އުޅޭ ރަޝިޔާ ގެ މަހުޖަނު މޯޑަޝޮވް ގެ 500 މިލިއަން ޑޮލަރުގެ މެގަޔޮޓު ދޫނިދޫ ކައިރީގައި ބަނދަރު ކޮށްފައި އޮއްވާ ފެނިއްޖެ
މި ޔޮޓް އުޅޭ ހިސާބު ރާޑަރުން ގެއްލުނު ކަމަށް އެންމެ ފަހުން ރިޕޯޓު ކޮށްފައި ވަނީ ދެކުނު އެފްރިކާ ގެ ކޭޕް ޓައުން އަށް ދަތުރު ކުރަނިކޮށް
ރަޝިޔާގެ 500 މިލިއަން ޑޮލަރުގެ "ނޯޑް" މެގަޔޮޓް ދޫނިދޫ ކައިރީގައި އަޅާފައި
ފިލައިގެން އުޅޭ ރަޝިޔާ ގެ މަހުޖަނު މޯޑަޝޮވް ގެ 500 މިލިއަން ޑޮލަރުގެ މެގަޔޮޓު ދޫނިދޫ ކައިރީގައި ބަނދަރު ކޮށްފައި އޮއްވާ ފެނިއްޖެ އެވެ.
ބުރާސްފަތި ދުވަހު ޔޮޓް ދޫނިދޫ ކައިރީގައި އޮއްވައި މި ނޫހުގެ ނޫސްވެރިންނަށް ވަނީ ފެނިފަ އެވެ. ޔޮޓުގެ ފަހަތު ކޮޅުގައި "ނޯޑް" ޖަހާފައިވާ ވީޑިއޯ އާއި ފޮޓޯ މި ނޫހުގެ ނޫސްވެރިންނަށް ވަނީ ލިބިފަ އެވެ.
މި ޔޮޓް އުޅޭ ހިސާބު ރާޑަރުން ގެއްލުނު ކަމަށް އެންމެ ފަހުން ރިޕޯޓު ކޮށްފައި ވަނީ ދެކުނު އެފްރިކާ ގެ ކޭޕް ޓައުން އަށް ދަތުރުކުރަނިކޮށް ކަމަށް ރޮބްރިޕޯޓް ގައި ލިޔެފައި ވެއެވެ. އެ ހިސާބުން އެ ޔޮޓުގެ އޮޓޮމެޓިކް އައިޑެންޓިފިކޭޝަން ސިސްޓަމް (އައި.އައި.އެސް) އިން ލޮކޭޝަން ޓްރާންސްމިޓް ކުރުން ހުއްޓާލި ކަމަށް ވެސް ވަނީ ބުނެފަ އެވެ. އޭގެ ފަހުން ޔޮޓު ލޮކޭޓް ކުރެވޭ ގޮތް ނުވާ ކަމަށް ވެސް ރިޕޯޓު ގައި ވެއެވެ.
ނޯޑް ނަމަކަށް ކިޔާ މި ޔޮޓާ ބެހޭ އެންމެ ފަހުން ލިބިފައިވާ މައުލޫމާތު ކަމަށް ބުނެ ދެ ލައްކަ މީހުން ސަބްސްކްރައިބް ކޮށްފައިވާ ޔޫޓިއުބް ޗެނަލް "އީސީސްމަން ސުޕަރޔޮޓްސް" އިން ރާއްޖޭގައި މި ސުޕަރޔޮޓް ދަތުރުކުރާ ފުޓޭޖެއް ރިލީޒްކޮށްފައިވެއެވެ. އެ ފުޓޭޖު ގައި ފެންނަނީ 465 ފޫޓުގެ މި ޔޮޓު މާފުށިން މާލެއަށް ދަތުރުކުރާތަން ކަމަށް ބުނެފައި ވެއެވެ. އަދި އެ ފުޓޭޖުން ފެންނަނީ ނޯޑް ޔޮޓް ކަން ކަށަވަރު ކުރެވިފައިވާ ކަމަށް ވެސް ބުނެފައި ވެއެވެ.
މޯޑަޝޮވް އަކީ ސްޓީލްމޭކަރު ސެވަރސްޓަލް ގެ އެންމެ ބޮޑު ޝެއަރހޯލްޑަރެވެ. އަދި އޭނާ އަކީ ރަޝިޔާ ގެ ތިންވަނަ އަށް އެންމެ މުއްސަނދި މީހާ ކަމަށް ވެއެވެ. ރަޝިޔާ އިން ޔޫކްރެއިން އަށް ހަމަލާދިނުމާ ގުޅިގެން ޔޫރަޕިއަން ޔޫނިއަން، އިނގިރޭސިވިލާތް އަދި އެމެރިކާ އިން ވަނީ އޭނާގެ މައްޗަށް ދަތިކުރުމުގެ ފިޔަވަޅު އަޅާފައެވެ. އެހެން ނަމަވެސް އޭނާ ބުނެފައިވަނީ ރަޝިޔާ ގެ ސިޔާސަތު ކަނޑައެޅުމުގައި އެއްވެސް ބައިވެރިވުމެއް ނެތް ކަމަށާއި، މި އަހަރުގެ މެއި މަހުން ފެށިގެން ސެންކްޝަންސް އާ ދެކޮޅަށް އުޅެންޖެހިފައިވާ ކަމަށެވެ.
ނަމަވެސް، ސެންކްޝަންސް އަޅާފައިވާ ރަޝިޔާ ގެ އެހެން ފަރާތްތަކާ އެއްގޮތައް، އޭނާގެ މުދާ ވެސް ހުޅަނގުގެ ސަރުކާރުތަކުން ގެންދަނީ ހިފަހައްޓަމުންނެވެ. އެ ގޮތުން 215 ފޫޓުގެ ސުޕަރޔޮޓް، ލޭޑީ އެމް، މާޗް މަހު އިޓަލީ ފުލުހުން ވަނީ ހިފަހައްޓާފަ އެވެ. މިކަމާ ގުޅިގެން، ރަޝިޔާގެ ބިލިއަނަރުން ގެންދަނީ އެމީހުންގެ އަގުބޮޑު ޔޮޓު ތައް "ރައްކާތެރި" ސަރަހައްދު ތަކަށް ބަދަލު ކުރަމުން ކަމަށް ރިޕޯޓު ކޮށްފައި ވެއެވެ.
ރާއްޖެ އަކީ ރަޝިޔާ އިން ޔޫކްރެއިން އަށް ހަމަލާދިނުން ވަރަށް ފާޅުގައި ކުށްވެރިކޮށްފައިވާ އދ.ގެ މެމްބަރެކެވެ. އަދި ރާއްޖެ އިން މިކަމުގައި ގެންގުޅެނީ ޔޫކްރެއިން އަށް ތާއީދު ކުރުމުގެ ސިޔާސަތެއް ކަމަށް މުއިއްޒު އެސްޓޯނިއާ އަށް މި އަހަރުގެ ޖެނުއަރީ މަހު ކުރެއްވި ދަތުރުފުޅުގައި ވެސް ވަނީ ހާމަ ކޮށްފަ އެވެ.
