ޑޮލަރު ގެ މައްސަލަ ހައްލު ކުރަން ރައީސް ޑރ. މުހައްމަދު މުއިއްޒު ބޭނުންވާހެން ހިއެއް ނުވޭ: ސައުދުﷲ

ޑޮލަރުގެ މައްސަލަ ހައްލުކުރަން ރައީސް ޑރ. މުހައްމަދު މުއިއްޒު  ބޭނުންފުޅު ވާހެން އެ މަނިކުފާނުގެ އަމަލުފުޅުތައް ހުންނަ ގޮތުން ހީ ނުވާ ކަމަށް ޓްރޭޑް ޔޫނިއަންގެ ނައިބު ރައީސް ސައުﷲ އަހުމަދު ވިދާޅުވެއްޖެ އެވެ.

އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

ސަރުކާރުގެ އެސްއޯއީތަކުން ދިވެހި ވިޔަފާރިވެރިންގެ ވިޔަފާރިތައް ތެރެއަށް ވަންނަމުންދާ ކަމަށާއި އެ ވެސް ޑޮލަރުގެ ވިޔަފާރިތަކަށް ދިމާވާ ގޮންޖެހުމެއް ކަމަށް ސައުދުﷲ ވިދާޅުވި އެވެ. ރާއްޖޭގެ އެތެރޭގެ ވިޔަފާރި އެއްކޮށް ހަލާކުކޮށްލުމަށް ފަހު ގައުމުގެ އިގްތިސާދު ރަނގަޅުވާނެ ކަމަށް ބުނުމަކީ ބޮޑު ޖޯކެއް ކަމަށް ސައުދު ވިދާޅުވި އެވެ. ވިޔަފާރުތައް ހަލާކު ވަނީ ސަރުކާރުގެ އަމަލުތައް ހުންނަ ގޮތުން ކަމަށް އޭނާ ވަނީ ވިދާޅުވެފަ އެވެ.

" ދިވެހިން ކުރަމުން އަންނަ ވިޔަފާރިތައް ހަލާކުކޮށްލާފަ ސަރުކާރަށް ފައިދާ ހޯދުމުގެ ނިޔަތުގައި ތާރޑް ޕާޓީ މެދުވެރިކޮށް ކުރާ ކަންކަމުން ލިބެނީ ގެއްލުން. ޑޮލަރުގެ މައްސަލަ ހައްލުކުރަން ބޭނުން ނަމަ ކުރެވޭނެ. ގައުމަށް ޑޮލަރު ވަދޭ. ސީދާ ބޭރުން ފަންޑު ލިބިގެންނޭ މައްސަލަ ހައްލު ވާނީ ބުންޏަށް ޤަބޫލެއް ނުކުރެވޭ." ސައުދު ވިދާޅުވި އެވެ.

މި  ސަރުކާރުން ވިޔަފާރިވެރިންގެ ހުރި ކަންބޮޑުވުންތަކާއި ވިޔަފާރި ވެރިން އުޅޭ ހާލު ވެސް ބަަލަން ބޭނުން ނުވާ ކަމަށް ސައުދު ވިދާޅުވި އެވެ. އަދި ޑޮލަރު ނުލިބުމުގެ ދަތިކަމަކީ ކިހާ ސީރިއަސް މައްސަލަ އެއްކަން ސަރުކާރަށް ނުވިސްނޭ ކަމަށް ވެސް އޭނާ ވަނީ ފާހަގަކުރައްވާފަ އެވެ.

ޑޮލަރުގެ އުސޫލަށް ސަރުކާރުން ގެނައި ބަދަލުގެ އެންމެ ބޮޑު ނޭދެވޭ އަސަރެއްކުރީ އާއްމު ރައްޔިތުންނަށެވެ. ޚާއްސަކޮށް ރިސޯޓް ދާއިރާގައި މަސައްކަތް ކުރާ މީހުންނަށް ވަރަށް ބޮޑު ނޭދެވޭ އަސަރެއް ކޮށްފައި ވެ އެވެ.

އެހެންކަމުން ސަރވިސް ޗާޖުގެ ގޮތުގައި ލިބޭ ޑޮލަރު، ރުފިޔާ އަށް މާރުކޮށްގެން ދިނުން ހުއްޓުވުމަށާއި ސަރވިސް ޗާޖު ނުލިބޭ ގޮތަށް ފަތުރުވެރިންނަށް ސީދާ ޚިދުމަތް ދިނުމުގައި ދާއިމީ ކޮށް ހަރަކާތްތެރިވާ މުވައްޒަފުންނަށް ވެސް ސަރވިސް ޗާޖު ދޭން ޖެހޭ ގޮތަށް ގާނޫނަށް އިސްލާހެއް ވެސް ވަނީ ހުށަހަޅާފަ އެވެ.

ވަޒީފާއާ ބެހޭ ގާނޫނަށް މި އިސްލާހު ހުށަހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު އެވެ.