އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވީ ކައުންސިލް އިންތިޚާބުގައި ރަނގަޅު ނަތީޖާއެއް ނުނެރެވިއްޖެ ނަމަ ސަރުކާރު ޖަވާބުދާރީކުރުވަން ދެއްކޭނެ ވާހަކަތައް މަދުވާނެ ކަމަށެވެ. ރައީސް މުއިއްޒަށް ބޭނުންވާހާ ގޮތަކަށް ޚަރަދުކުރެއްވޭނެ ކަމަށް ހީވެފައިވާ ކަމަށް ނާޒިލް ވިދާޅުވެ ބަޖެޓް ޚަރަދުކުރި ގޮތް ސާފު ނުވާތީ ފާޑުވިދާޅުވިއެވެ. މަސްވެރިން ވެސް ސަރުކާރާ މެދު މާޔޫސްވެފައިވާ ކަމަށް ނާޒިލް ފާހަގަކުރެއްވި.
އެމްޑީޕީގެ ޕީޖީ ލީޑަރ, ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އެމްޑީޕީ ހަރުގޭގައި ވާހަކަދައްކަވަނީ
ސަރުކާރުން ކުރާ ކަންކަމާ މެދު ސަރުކާރަށް ވިސްނޭ ހިސާބަށް ދެވޭނީ، ކައުންސިލް އިންތިޚާބުގައި ސަރުކާރަށް ނޫނެކޭ ބުނެގެން ކަމަށް އެމްޑީޕީގެ ޕީޖީ ލީޑަރ, ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެ އެވެ.
އޭނާ އެފަދައިން ވިދާޅުވީ ހޮނިހިރު ދުވަހުގެ ރޭ އެމްޑީޕީ ހަރުގެ ބޭރުގައި ކުރިއަށް ދިޔަ ހަރަކާތުގައި ވާހަކަދައްކަވަމުންނެވެ.
ކައުންސިލް އިންތިޚާބުގައި ރަނގަޅު ނަތީޖާ އެއް ނުނެރެވިއްޖެ ނަމަ ސަރުކާރު ޖަވާބުދާރީ ކުރުވުމަށް ވެސް ދެން ދެއްކޭނެ މާ ގިނަ ވާހަކަ އެއް ނުއޮންނާނެ ކަމަށް ނާޒިލް ވިދާޅުވި އެވެ. އެހެންކަމުން ކުރިއަށް އޮތް ލޯކަލް ކައުންސިލް އިންތިޚާބުގައި އިދިކޮޅު އެމްޑީޕީ އިން ރަނގަޅު ނަތީޖާ އެއް ނެރެން ޖެހޭ ކަމަށް އޭނާ ވަނީ ވިދާޅުވެފަ އެވެ.
މީގެ އިތުރުން ރައީސް ޚަރަދުކުރެއްވުމަށް އާއްމުން ފައިސާ ދޭން ޖެހޭ ކަމަށް ރައީސް ޑރ. މުހައްމަދު މުއިއްޒު އަށް ހީފުޅު ވެފައި އޮންނަ ކަމަށް އޭނާ ވިދާޅުވި އެވެ. ނާޒިލް ވަނީ ބަޖެޓް ޚަރަދުކޮށް މި އަހަރުވެސް ސަރުކާރުން ހުސްކޮށްލި ގޮތް ސާފު ނުވާތީ އެކަމަށް ފާޑު ވިދާޅުވެފަ އެވެ.
"އެ ބޭފުޅާ އަށް ހީފުޅުވަނީ އެހެން ބޭނުންހާ ގޮތަކަށް ކުރަން އޮންނަ ކަމެކޭ އެއީ. އެކަން ހައްލުކުރެވެން އެބަ އޮތް. ކައުންސިލް އިންތިޚާބުގައި ނޫނެކޭ ބުނެވިއްޖެއްޔާ އެއީ ސަރުކާރު އިތުރަށް ވިސްނަން ޖެހޭ ހިސާބަށް ގެންދިއުން. ވިސްނޭނީ ރައްޔިތުން ވޯޓުލާ ނަތީޖާ ނެރޭ ގޮތަކުން." ނާޒިލް ވިދާޅުވި އެވެ.
ދައުލަތުގެ ފައިސާ އަކީ ރައްޔިތުންގެ ފައިސާ ކަމަށާއި އެ ފައިސާ ރައްޔިތުންގެ މަޖިލީހުން، ރައީސް އާއި ހަވާލުކުރަނީ ބޭނުންވާހާ ގޮތަކަށް ޚަރަދުކުރަން ނޫން ކަމަށް ނާޒިލް ވިދާޅުވި އެވެ. ނަމަވެސް އެކަންކަމަށް ސަރުކާރަށް އަމާޒުވާ ފާޑުކިޔުންތަކަށް ސަރުކާރުން އިޖާބަ ނުދޭކަން އޭނާ ވަނީ ފާހަގަކުރައްވާފަ އެވެ.
ނާޒިލް ވަނީ މިހާރު މަސްވެރިން ކުރަމުންދާ އިހުތިޖާޖަށް ވެސް އަލިއަޅުވާލާފަ އެވެ. އެކަހަލަ އެތައް މަސައްކަތްތެރިންނެއް ސަރުކާރާއި މެދު އިންތިހާ އަށް މާޔޫސްވެފައިވާ ކަމަށާއި ކުރިއަށް އޮތް ކައުންސިލް އިންތިޚާބަކީ އެ މެސެޖު ސަރުކާރަށް ދޭންވީ ވަގުތު ކަމަށް ނާޒިލް ވިދާޅުވި އެވެ.
