45 ވަނަ މަސްވެރިންގެ ދުވަހުގެ ރަސްމީ ޖަލްސާގައި ކަނދޮޅުދޫގައި މަސް ކިރޭނޭ ފެސިލިޓީ އެއް، ކޯލްޑް ސްޓޯރޭޖާއި ފާނައިގެ ޚާއްޞަ ފެސިލިޓީއަކާ އެކު ޤާއިމުކުރުމުގެ އެއްބަސްވުމުގައި ސޮއިކުރުމާއެކު، ކެޔޮޅު އެޕްލިކޭޝަން، ބީއެމްއެލްގެ މަސްވެރިޔާ ޕޯޓަލް، ފްރޮމް މޯލްޑިވްސް ވެބްސައިޓް އަދި މިފްކޯގެ މަސް ކިރާ އެޕްލިކޭޝަން އިފުތިތާޙު ކުރުން އޮތް.
ރައީސް މުއިއްޒު 45 ވަނަ މަސްވެރިންގެ ދުވަހުގެ ރަސްމީ ޖަލްސާ ގައި އިނާމު ދެއްވަނީ
45 ވަނަ މަސްވެރިންގެ ދުވަހު ރަސްމީ ޖަލްސާ ބާއްވައި، މަސްވެރިކަމުގެ ސިނާޢަތަށް އަގުހުރި ޚިދުމަތްތައް ކުރައްވާފައިވާ ފަރާތްތަކަށާއި، 2023 ވަނަ އަހަރާއި 2024 ވަނަ އަހަރު މަސްވެރިކަމުގެ ސިނާޢަތުގައި ފާހަގަކުރެވޭ ނަތީޖާތައް ހޯދާފައިވާ ފަރާތްތަކަށާއި، މަސްވެރި އުޅަނދުތަކަށާއި، ކުންފުނިތަކަށާއި، މަސްވެރީންނަށް އިނާމު ދީފި އެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޝަރަފުވެރިކޮށްދެއްވި މި ޖަލްސާ ބާއްވަވާފައިވަނީ، ހޮނިހިރު ދުވަހުގެ ރޭ މާޅޮސްމަޑުލު އުތުރުބުރީ ދުވާފަރުގަ އެވެ.
މި ޖަލްސާގައި ވަނީ މަސްވެރިކަމުގެ ސިނާޢަތުގެ ތަރައްޤީއާ ގުޅުންހުރި ބައެއް މަސައްކަތްތައް އިފުތިތާޙުކޮށް، މުހިންމު އެއްބަސްވުމެއްގައި ސޮއިކޮށްފަ އެވެ.
އެގޮތުން، ކަނދޮޅުދޫގައި މަސް ކިރޭނޭ ފެސިލިޓީ އެއް، ކޯލްޑް ސްޓޯރޭޖާއި ފާނައިގެ ޚާއްޞަ ފެސިލިޓީއަކާ އެކު ޤާއިމުކުރުމުގެ އެއްބަސްވުމުގައި ސޮއިކުރުން އޮތެވެ. އަދި އައިސް ޕްލާންޓްތަކުގައި އައިސް ހުރި މިންވަރު ކެޔޮޅު އެޕްލިކޭޝަން މެދުވެރިކޮށް މަސްވެރިންނަށް ފަސޭހައިން ބަލާލެވޭނޭ ގޮތަށް ތައްޔާރުކޮށްފައިވާ މޮޑިއުލް އާއި، ބޭންކް އޮފް މޯލްޑިވްސް "މަސްވެރިޔާ ޕޯޓަލް" އާއި، "ފްރޮމް މޯލްޑިވްސް" ބްރޭންޑްގެ ވެބްސައިޓާއި، މިފްކޯގެ "މަސް ކިރާ" އެޕްލިކޭޝަން އަދި ދިވެހިރާއްޖޭގައި އެންވެރިކަން ދެމެހެއްޓެނިވި ގޮތެއްގައި އާލާކުރުމުގެ ޕްލޭން ވަނީ އިފުތިތާޙުކޮށްފަ އެވެ.
މިއަހަރުގެ މަސްވެރިންގެ ދުވަސް ޤައުމީ ފެންވަރެއްގައި ފާހަގަ ކުރުން އޮތީ ދުވާފަރުގައެވެ.
