ދެން އަންނަ ސަރުކާރަކުން ވެސް ދައްކަން ޖެހޭ ދަރަނި ހުންނާނެ: ފިނޭންސް މިނިސްޓަރު ޒަމީރު
އަބަދުވެސް ސަރުކާރަކުން ވެރިކަމާ ހަވާލުވާއިރު ދައްކަން ޖެހޭ ލޯނުތައް ހުންނާނެ
މިނިސްޓަރ އޮފް ފިނޭންސް އެންޑް ޕްލޭނިންގ މޫސާ ޒަމީރު
މި ސަރުކާރަށް ފަހު ދެން އަންނާނެ ސަރުކާރަކުން ވެސް ދައްކަން ޖެހޭ ދަރަނި ހުންނާނެ ކަމަށް ރައީސް މުއިއްޒުގެ ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
އަންނަ އަހަރަށް ހުށަހަޅާފައިވާ ބަޖެޓު ދިރާސާކުރާ ރައްޔިތުންގެ މަޖިލީހުގެ ކޮމިޓީގައި އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ އަބަދުވެސް ސަރުކާރަކުން ވެރިކަމާ ހަވާލުވާއިރު ދައްކަން ޖެހޭ ލޯނުތައް ހުންނަ ކަން ފާހަގަކުރައްވާފަ އެވެ. އަދި ވިދާޅުވީ ނިމިދިއަ އެމްޑީޕީ ސަރުކާރުން ވެސް އޭގެ ކުރީ ސަރުކާރުން ނެގި ލޯނުތައް ދެއްކި ކަމަށެވެ.
އަބަދުވެސް ސަރުކާރެއް ހަވާލުވާއިރު ލޯނުތަކެއް ހުންނާނެ. ނިމިދިއަ ސަރުކާރުން ވެސް އޭގެ ކުރީ ސަރުކާރުން ނަގާފަހުރި ބޮޑެތި ލޯނުތައް، އެއަރޕޯޓް ރަންވޭ ހަދަންށާ ދަރުމަވަންތަ ހޮސްޕިޓަލް ހަދަންށާ ބްރިޖު ހަދަންށާ ނެގި ފައިސާ ދެއްކި. އެކަމު އަބަދު އެ ލޯނުގެ ވާހަކަޔާ އަޅައިގަނެގެނެއް ނޫޅޭ. 2028 ނިމޭއިރު، ދެން ހަވާޅުވާ ސަރުކާރަކުން ދައްކަން ޖެހޭ ލޯނެއް އޮންނާނެތޯ؟އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
ނާޒިލްގެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ދަރަނި ހުންނާނެ ކަމަށެވެ. ދެން އަންނާނެ ސަރުކާރަކުން ވެސް ދައްކަން ޖެހޭ ދަރަނި އޮންނާނެ ކަަމަށާ ސަބަބަކީ ރާއްޖޭގެ މާލީ ނިޒާމު ބައްޓަންވެފައި ވަނީ ދަރަންޏާ ނުލާ ގައުމު ހިންގޭނެ ފަދަ ގޮތަކަށް ނޫން ކަމަށް ވުމުން ކަމަށް މިނިސްޓަރު ވިދާޅުވި އެވެ.
އެއަށް ފަހު ނާޒިލް ވަނީ ބަޖެޓް ފޮތުގައި ތަފްސީލުތައް ހިމަނާފައި ނުވާތީ އެކަމުގެ ކަންބޮޑުވުން ވެސް ފާޅުކުރައްވާފަ އެވެ. ނާޒިލް ވިދާޅުވީ މިހާރު ބަޖެޓު ފޮތް އޮންނަ ގޮތުން އެކަމުގެ ކަންބޮޑުވުން ފާޅުކުރަނީ ހަމައެކަނި އިދިކޮޅު މެންބަރުން ނޫން ކަމަށެވެ. އެގޮތުން މި ހަފްތާގައި އޮޑިޓަރ ޖެނެރަލް ވެސް މަޖިލީހުގެ ކޮމިޓީއެއްގައި އެކަމުގެ ކަންބޮޑުވުން ހިއްސާ ކުރެއްވި ކަމަށް މެންބަރު ވިދާޅުވި އެވެ.
އޮޑިޓަރ ޖެނެރަލްވެސް ފާހަގަކުރެއްވި ތަފްސީލު ނެތީމަ ދިމާވާ ކަންތައްތަކުގެ ވަހަކަ. އޮޑިޓަރ ޖެނެރަލް ވެސް އެ ވިދާޅުވަނީ އެކަން ހިނގާ ދިޔައީމައޭ ތަފްސީލު މިނިސްޓްރީން ދެއްވަނީ،އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރުގެ އެ ސުވާލާ ގުޅިގެން މިނިސްޓަރު ޒަމީރު ވިދާޅުވީ މި އަހަރުގެ ބަޖެޓާއި އަންނަ އަހަރަށް ލަފާކޮށް ހުށަހެޅި ދައުލަތުގެ ބަޖެޓުގައި ވަކިވަކި މަޝްރޫއުތަކުގެ ތަފްސީލު އެއްވެސް ވަރަކަށް ނުހިމަނަނީ ރައްޔިތުން ބޭނުންވާ ގޮތަށް މަޝްރޫއުތައް ކުރިއަށް ގެންދިއުމުގެ ބޭނުމުގައި ކަމަށެވެ.
މާލެ ސަރަހައްދުގައި ތިބޭ ބަޔަކަށް ރަށެއްގެ ސިއްހީ މަރުކަޒެއްގައި ހުންނަ މައްސަަލަތަކެއް ނޭނގޭނެ ކަމަށާއި، އެ ސިއްހީ މަރުކަޒަކަށް ބަދަލު ގެންނަން އެނގޭނީ އެ ރަށަކަށް ސީދާ ގޮސް އެ ތަނުގެ ހާލަތު އަންދާޒާ ކުރެވުމުން ކަމަށް ޒަމީރު ވިދާޅުވި އެވެ. އަދި ދުނިޔޭގެ އެހެން ގައުމުތަކާއި ރާއްޖެ އެކުލެވިފައިވާ ގޮތަށް ބަލާއިރު ރާއްޖޭގައި މަޝްރޫއުތައް ހިންގާ މެކޭނިޒަމް ތަފާތުވާނެ ކަމަށާ ބަޖެޓުގައި އެ ތަފްސީލުތައް ނުހިމަނަނީ އެ ސަބަބަށްޓަކައި ކަމަށް ވެސް މިނިސްޓަރު ވިދާޅުވި އެވެ.
އެއާއެކު މެންބަރު ނާޒިލް ވަނީ އެހެންވީމާ ދެން ކޮންމެ އަހަރަށް ވެސް ބަޖެޓް ފިގަރ އެއް ޖަހާލުމަށްފަހު ނިންމާލަން ވީ ނޫންތޯ މިނިސްޓަރާ ސުވާލު ކުރައްވާފަ އެވެ. އަދި އެ އަހަރެއް ނިމިދިއުމުން ދެން ޖެހިގެން އަންނަ އަހަރު ތަފްސީލު ލިޔާ ގޮތަށް ނިޒާމު ބަދަލު ކުރަން ވީ ނޫންތޯ ވެސް ނާޒިލް ވިދާޅުވި އެވެ.
