ފަޒުލް ލިޔެކިޔުންތައް ނައްތާލާފައިވާ މައްސަލަ ހެކި ނެތިގެން ދައުވާ ނުކުރަން ނިންމައިފި
ފަޒުލްއާއި ޝުހޫދުގެ މައްޗަށް ކުރެވުނު ތުހުމަތަށް ބާރުދޭ ހެއްކެއް ހޯދިފައި ނުވޭ
އެޗްޑީސީގެ އެމްޑީ ފަޒުލް ރަޝީދު
އެޗް.ޑީ.ސީގެ ކުރީ ގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދާއި، އައިޓީ ހެޑް ޢަބްދުﷲ ޝުހޫދު އެ ކުންފުނީގެ ލިޔުންތަކެއް ނައްތާލާފައިވާ ކަމަށް ތުހުމަތު ކުރެވުނު މައްސަލައިގައި ހެކި ނެތްކަމަށް ބުނެ ދައުވާ ނުކުރަން ނިންމައިފި އެވެ.
ޕީޖީ އޮފީހުން ބުނީ އެޗް.ޑީ.ސީގެ މެނޭޖިންގ ޑިރެކްޓަރުގެ މަޤާމުގައި ހުރި އިބްރާހީމް ފަޒުލް ރަޝީދު އަދި އެ ކުންފުނީގެ އައި.ޓީ ހެޑް ޢަބްދުﷲ ޝުހޫދު، އެ ކުންފުނީގެ ސަރވަރގައި ހުރި ލިޔުންތަކެއް ރިކަވަރ ނުކުރެވޭ ގޮތަށް ޑިލީޓްކޮށްފައިވާކަމަށް ތުހުމަތުކުރެވުނު މައްސަލާގައި ޖިނާއީ ދަޢުވާއެއްކޮށް ކުށް ސާބިތުކުރެވޭ މިންވަރަށް ހެކި ޤަރީނާ ލިބިފައިވާ ނުވާތީ، މައްސަލަ ޑިކްލައިންކޮށްފައިވާ ކަމަށެވެ.
މިކަމާއި ގުޅިގެން ޕީޖީ އޮފީހުން ބުނީ މައްސަލަ ފުލުހުން ޑިއުޓީ ޕްރޮސިކިއުޝަނަށް ހުށަހެޅީވެސް އެކަށީގެންވާ ހެކި ލިބިފައި ނުވާކަމަށް ބަޔާންކޮށެވެ. އެހެންކަމުން، މައްސަލާގައި ދަޢުވާނުކުރުމަށް ނިންމާފައިވާ ކަމަށް އެ އޮފީހުން ބުނެ އެވެ.
މައުލޫމާތު ލިބިފައިވާ ގޮތުގައި ފަޒުލް ގެ ބޭބޭ، މުޙައްމަދު ފަޒީލް ރަޝީދަށް އެޗް.ޑީ.ސީން ވަގަށް ގޯތި ދިން މައްސަލާގައި ފުލުހުން އެޗްޑީސީއަށް ވަދެ ބަލައި ފާސްކުރި އިރު، އިބްރާހީމް ފަޒުލް ރަޝީދު ބޭނުން ކުރާ ކޮމްޕިއުޓަރ ސިސްޓަމުން ބައެއް ލިޔުންތައް ޑިލީޓްކޮށްފައިވާ ކަމަށް ތުހުމަތު ކުރެވުނެވެ. ނަމަވެސް، އެޗްޑީސީގެ ސަރވަރގެ އޮޑިޓެއް ހެދުމަށްފަހު، ސަރވަރއިން އެއްވެސް ލިޔުމެއް މަދުވެ ނުވަތަ ޑިލީޓްވެފައި ނުވާކަމަށް ނިންމާފައިވެ އެވެ. އަދި ފުލުހުންގެ ތަޙުޤީޤުގައިވެސް، ފަޒުލްގެ މައްޗަށް ތުހުމަތު ކުރެވޭ ކުށާ ގުޅުންހުރި ހެއްކެއް ހޯދިފައި ނުވާކަމަށް ނިންމާފައިވެ އެވެ.
ފަޒުލް ނައްތާލިތަ ކަމަށް ތުހުމަތު ކުރެވުނީ އޭނާ މަގާމުގައި ހުރެގެން އެޗްޑީސީ މެދުވެރިކޮށް ހިންގި ކޮރަޕްޝަނާއި ގުޅުންހުރި ލިޔެކިޔުންތަކެވެ. މި މައްސަލައަކީ އޭނާގެ ބޭބެއަށް ވަގު ގޯތި ދިން މައްސަލައިގެ އިތުރުން ފުލުހުން ބަލަމުން ދިޔަ އެހެން މައްސަލަ އެކެވެ.
ފަޒުލް ގެ ކޮއްކޮއަށް ވަގަށް ގޯތި ދިން މައްސަލަ ވަކި މައްސަލައެއް ގޮތުގައި ދަނީ ތަޙުޤީޤުކުރަމުންނެވެ.
ލިޔެ ކިޔުންތައް ނައްތާލި މައްސަލާގައި އިބްރާހީމް ފަޒުލް ރަޝީދާއި، ޢަބްދުﷲ ޝުހޫދުގެ މައްޗަށް ކުރެވުނު ތުހުމަތަކީ، ޖިނާއީ ތަޙުޤީޤެއްގައި ހެކީގެ ގޮތުގައި ބޭނުންކުރެވިދާނެ ލިޔުންތަކެއް އެޗްޑީސީގެ ސަރވަރގެ ތެރެއިން ޑިލީޓްކޮށްލާފައިވާތީ، ޢަދުލު އިންޞާފު ޤާޢިމުކުރުމަށް ހުރަސްއެޅިކަމުގެ ތުހުމަތެވެ.
އަދި އެޗްޑީސީ ގެ އައިޓީ ޑިޕާޓްމަންޓުން ތައްޔާރުކޮށްފައިވާ ރިޕޯޓުގައި، އެޗްޑީސީގެ ސަރވަރ ތެރެއިން އެއްވެސް ލިޔުމެއް ނުވަތަ ޑާޓާއެއް ޑިލީޓްކޮށްފައި ނުވަތަ ގެއްލިފައި ނުވާކަމަށް ބަޔާންކޮށްފައިވެއެވެ. އަދި ފުލުހުންގެ ތަޙުޤީޤު ރިޕޯޓުގައި، އިބްރާހީމް ފަޒުލް ރަޝީދާއި، ޢަބްދުﷲ ޝުހޫދު، އެޗްޑީސީގެ ސަރވަރ ތެރެއިން އެއްވެސް ލިޔުމެއް ނައްތާލާފައިވާކަން ތަޙުޤީޤަށް ހޯދިފައިނުވާކަމަށް ބަޔާންކޮށްފައިވެ އެވެ.
އެހެންކަމުން، ފަޒުލް އާއި ޢަބްދުﷲ ޝުހޫދުގެ މައްޗަށް ކުރެވުނު ތުހުމަތަށް ބާރުދޭ ހެއްކެއް ހޯދިފައި ނުވާ ކަމަށް ޕީޖީ އޮފީހުން ބުނެ އެވެ.
