މިރޭ ކުނޫޒު ޖަލްސާއެއް، ރައީސް މައުމޫން ބައިވެރިވެވަޑައިގަންނަވާނެ!
9 ސެޕްޓެމްބަރު 2017 | ހޮނިހިރު 09:23އިދުކޮޅު ޕާޓީތަކުގެ ހަރަކާތްތައް މެދުކަނޑާލީ އީދު ބަންދަށް
ގުޅިފައިވާ ސިޔާސީ ޕާޓީތަކުން ބޭއްވި ޖަލްސާއެއްގެ ތެރެއިން
ގުޅިފައިވާ ސިޔާސީ ޕާޓީތަކުން ސިލްސިލާކޮށް ބާއްވަމުންއައި ޖަލްސާތަކާއި ހަރަކާތްތައް އަޟްހާ އީދަށް މެދުކަނޑާލުމަށްފަހު، ހަރަކާތްތަކާއި ޖަލްސާތައް ބޭއްވުމަށް ނިންމައިފި އެވެ.
ގުޅިފައިވާ ސިޔާސީ ޕާޓީތަކުން މ. ކުނޫޒުގައި ބޭއްވި ނޫސްވެރިންގެ ބައްދަލުވުމުގައި މެމްބަރު މުހައްމަދު އަމީތު ވިދާޅުވީ ގުޅިފައިވާ ސިޔާސީ ޕާޓީތަކުން ބާއްވާ ހާއްސަ ޖަލްސާއެއް ހޮނިހިރު ދުވަހުގެ ރޭ ޖުމްހޫރީ ޕާޓީގެ ޖަގަހަ، މ. ކުނޫޒުގައި އޮންނާނެ ކަމަށެވެ.
އަމީތު ވިދާޅުވީ މި ޖަލްސާގައި ކުރީގެ ރައީސް އަދި ޕީޕީއެމްގެ ރައީސް މައުމޫން ބައިވެރިވެ ވަޑައިގަންނަވާނެ ކަމަށެވެ.
ގުޅިފައިވާ ސިޔާސީ ޕާޓީތަކުން އީދު ބަންދަށްފަހު ޖަލްސާތަކާއި ހަރަކާތްތައް ބޭއްވުމަށް ނިންމާފައިވާއިރު ރައީސް މައުމޫން ފިޔަވާ އެ ހުރިހާ ސިޔާސީ ޕާޓީތަކެއްގެ ލީޑަރުން ތިއްބެވީ ޖަލުގަ އެވެ. ރައީސް މައުމޫން ޖަލަށް ނުލެއްވި ނަމަވެސް ރައީސް މައުމޫންގެ އަރިހުގައި އެންމެ އިސްކޮށް މަސައްކަތް ކުރައްވާ އެމަނިކުފާނުގެ ދަރިކަލުން އަދި ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ހުންނެވީ ވަކި މުއްދަތެއް ނެތްގޮތަށް ޖަލުގައެވެ. އަދި އެމަނިކުފާނާއެކު މަސައްކަތް ކުރައްވާ ގިނަ މަޖިލިސް މެމްބަރުންތަކެއްގެ ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ނިންމުމާއެކު ރައްޔިތުންގެ މަޖިލީހުންވެސް ދަނީ އިލެކްޝަންސް ކޮމިޝަނުގެ އެނިންމުންތައް ތަންފީޒު ކުރަމުންނެވެ.
އިދިކޮޅު އެމްޑީޕީގެ ލީޑަރު އަދި ކުރީގެ ރައީސް މުހައްމަދު ނަޝީދުގެ މައްޗަށް 13 އަހަރުގެ ޖަލު ހުކުމެއް އިއްވާފައިވާއިރު، އެމަނިކުފާނު މިވަގުތު ހުންނެވީ ރާއްޖެއިން ބޭރުގަ އެވެ. އަދާލަތު ޕާޓީގެ ލީޑަރު ޝެއިހް އިމްރާން ހުންނެވީ 12 އަހަރުގެ ޖަލު ހުކުމެއްގައި ޖަލުގަ އެވެ. ޖުމްހޫރީ ޕާޓީގެ ލީޑަރު ގާސިމް އިބްރާހީމް ބަލި ހާލުކޮޅުގަިއ އައިޖިއެމްއެޗްގައި ފަރުވާ ދެއްވަމުން ގެންވަނިކޮށް، އެމަނިކުފާނުގެ ޣައިރު ހާޒިރުގައި ކްރިމިނަލް ކޯޓުން ވަނީ ތިން އަހަރަށް ޖަލަށްކުމަށް ހުކުމް ކޮށްފަ އެވެ. އެމަނިކުފާނު މިވަގުތު ހުންނެވީ ބޭސްފަރުވާއަށް ސިންގަޕޫރުގަ އެވެ.
ކުރީގެ ރައީސް ނަޝީދު ޖަލަށްލުމަށްފަހު ސަރުކާރަށް އައި ޕްރެސަރު ކުޑަކުރުމަށް މަޝްވަރާތަކަށް އޭރު ގޮވާލެއްވި ގޮތަށް ގާސިމް ޖަލަށްލެއްވުމަށްފަހު، ސަރުކާރަށް ކުރިމަތިވި ޕްރެޝަރު ކުޑަކުރުމަށް އަނެއްކާވެސް ވަނީ މަޝްވަރާއަށް ގޮވާލައްވާފަ އެވެ. ނަމަވެސް ސަރުކާރާއެކު މަޝްވަރާކުރަން ބޭނުންނުވާކަމަށް އިދިކޮޅު ޕާޓީތަކުން ދަނީ ބުނަމުންނެވެ.
