އަދީބު ޚަރަދުކުރި މެމްބަރުން އިސްތިއުފާ ދެއްވުމުގެ ކުރިން ރައީސް ޔާމީން އިސްތިއުފާ ދެއްވަންޖެހޭ:ލަތީފް
ރައީސް ޔާމީން ވަނީ އަދީބު ޚަރަދުކުރި މެމްބަރުން އިސްތިއުފާ ދެއްވައި އަމިއްލަ ޚަރަދުގައި އިންތިހާބު ވުމަށް ގޮވާލައްވާފައި
މެމްބަރު ލަރީފް، އަމީތު، ސައުދު އަދި ވަހީދު ނޫސްވެރިންނަށް މައުލޫމާތު ދެއްވަނީ
ކުރީގެ ނައިބު ރައީސް އަހުމަދު އަދީބު ޚަރަދު ކޮށްގެން އިންތިހާބު ވެފައިވާ ރައްޔިތުންގެ މަޖިލީހުގެ މެމްބަރުން އިސްތިއުފާ ދެއްވުމުގެ ކުރިން ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް އިސްތިއުފާ ދެއްވަންޖެހޭ ކަމަށް، ގޮނޑި ގެއްލުވާލާފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ ދިއްދޫ ދާއިރާގެ މެމްބަރު އަބްދުއް ލަތީފް މުހައްމަދު ވިދާޅުވެއްޖެ އެެވެ.
އިލެކްޝަންސް ކޮމިޝަނުން ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް ކަނޑައަޅާފައިވާ މެމްބަރުން ޖުމްހޫރީ ޕާޓީގެ ޖަގަހަ، ކުނޫޒުގައި ބޭއްވި ނޫސްވެރިންގެ ބައްދަލުވުމުގައި ލަތީފް ވިދާޅުވީ މިހާރު ހިނގަމުންދާ 18 ވަނަ ރައްޔިތުންގެ މަޖިލީހަށް ސަރުކާރަށް ނިސްބަތްވާ މެމްބަރުން އިންތިހާބު ކުރުމަށް އެންމެ ބޮޑު ޚަރަދެއް ކުރައްވާފައިވަނީ އަދީބު ކަމަށް ރައީސް ޔާމީން ވިދާޅުވެ، އަދި އަދީބުގެ ޚަރަދުގައި އިންތިހާބުވި މެމްބަރުން އިސްތިއުފާ ދެއްވައި އަމިއްލަ ޚަރަދުގައި އިންތިހާބު ވެވަޑައިގަތުމަށް ރައީސް ޔާމީން ގޮވާލެއްވިއިރު، އެ އެމެމްބަރުންނަށް ވުރެކުރިން ރައީސް ޔާމީން އިސްތިއުފާ ދެއްވާންޖެހޭ ކަމަށެވެ.
ސަބަބެއް ކަމަށް ލަތީފް ވިދާޅުވީ 18 ވަނަ ރައްޔިތުންގެ މަޖިލީހުގެ އިންތިހާބު ބޭއްވާފައިވަނީ މިހާރު ރައީސް ކަމުގެ މަގާމުގައި ހުންނެވި ރައީސް ޔާމީންގެ ވެރިކަމުގައި ކަމަށެވެ. ރައްޔިތުންގެ މަޖިލީހުގެ އިންތިހާބުގެ ކުރިން ބޭއްވި ރިޔާސީ އިންތިހާބު ރައީސް ޔާމީންއަށް ކާމިޔާބު ކުރެއްވުނީ ކޯލިޝަނެއްގެ ތެރެއިން ކަމަށެވެ. ރައީސް ޔާމީން އިންތިހާބު ކުރެއްވުމަށް ޖުމްހޫރީ ޕާޓީ އާއި އަދާލަތު ޕާޓީން މަސައްކަތްތަކެއް ކޮށްފައިވާ ކަމަށެވެ. ރައީސް ޔާމީންއަށް ރައީސް ކަމަށް ވަޑައިގެންނެވުނީވެސް ޖުމްހޫރީ ޕާޓީއާއި އަދާލަތު ޕާޓީން ވެދިން އެހީތެރިކަމާއެކު ކަމަށް ލަތީފް ވިދާޅުވި އެވެ.
އެހެންކަމުން ޖުމްހޫރީ ޕާޓީއާއި އަދާލަތު ޕާޓީ ސަރުކާރުން ކޯލިޝަނުން ވަކިވެފައިވާތީ އާއި ޕީޕީއެމްގެ ރައީސް ރައީސް ޔާމީންއަށް ކުރި ތާއީދު އަނބުރާ ގެންދަވާފައިވާތީ ރައީސް ކަމުގެ މަގާމުން ރައީސް ޔާމީން އިސްތިއުފާ ދެއްވަން ޖެހޭ ކަމަށެވެ.
ރައީސް ޔާމީން ވެރިކަމަށް ގެންނެވުމަށް ޚަރަދު ކުރެއްވި ބޭފުޅުންގެ ތެރޭގައި އޭރުގެ ޓޫރިޒަމް މިނިސްޓަރު އަދި ފަހުން ރައީސް ޔާމީންގެ ވެރިކަމުގައި ނައިބު ރައީސްކަން ކުރެއްވި އަހުމަދު އަދީބު ހިމެނިވަޑައިގަންނަވާ ކަމަށް ވެއެވެ. އަދި އެމްއެމްޕީއާރުސީގެ ހިޔާނާތް ފެންމަތި ވުމުގެކުރިން އަދީބަކީ ސަރުކާރާއި ޕީޕީއެމް ހިންގުމުގައި އެންމެ އިސްކޮށް ހަރަކާތްތެރިވެވަޑައިގެންނެވި ފަރާތެވެ.
