ކޮރަޕްޝަންގެ ތުހުމަތު އަމާޒުވެފައި ވަނިކޮށް، ޒެލެންސްކީ ގެ އެންމެ ގާތް އަދި އަރިހުގައި ހުންނެވި ޔާމަކް އިސްތިއުފާ ދެއްވައިފި

ޔުކްރެއިންގެ ރައީސް ވުލޮޑޮމިއަރ ޒެލެންސްކީގެ އެންމެ ގާތް އަދި އަރިހުގައި ހުންނެވި ޗީފް އޮފް ސްޓާމް އަންޑްރީ ޔާމަކް އަށް ކޮރަޕްޝަންގެ ތުހުމަތު ކުރެވިފައި ވަނިކޮށް، އޭނާގެ އިސްތިއުފާ ދެއްވައިފި އެވެ.

ޔާމަކް އިސްތިއުފާ ދެއްވާފައި ވަނީ އޭނާގެ މައްޗަށް ކޮށްފައިވާ ކޮރަޕްޝަންގެ ތުހުމަތުތަކާ ގުޅިގެން، ޔުކްރެއިންގެ ތަޙުގީގީ އިދާރާ ތަކުން އޭނާ ދިރިއުޅުއްވާ ގެޔަށް ރެއިޑު ވެސް ޖަހާފައި ވަނިކޮށެވެ.

ޔާމަކް އަކީ ޔުކްރެއިން ގެ ސިޔާސީ މައިދާނުގައި ވަރަށް ބޮޑު ނުފޫޒެއް އޮންނަ ބޭފުޅެކެވެ. ރަޝިޔާ އިން ޔުކްރެއިންއާ ދެކޮޅަށް ހަނގުރާމަ ފެށި ފަހުން، ޒެލެންސްކީ ގެ އެންމެ އަރިސް ލަފާ ދޭ ފަރާތެއްގެ ގޮތުގައި ވެސް ހުންނެވީ ޔާމަކް އެވެ. ޔާމަކްގެ މައްޗަށް ކޮށްފައިވާ ކޮރަޕްޝަންގެ ތުހުމަތުތަކާ ގުޅިގެން އޭނާ އަށް އެތައް ފާޑު ކިޔުން ތަކެއް އަމާޒުވި ނަމަވެސް، އޭނާގެ މައްޗަށް އެއްވެސް ކަމެއްް ސާބިތުވެފައި ނުވެ އެވެ.

އެމެރިކާގެ ރައީސް ޑޮނަލްޑް ޓްރަމްޕްއާ އެކު ފެއްޓެވި ރަޝިޔާ-ޔުކްރެއިން ހަނގުރާމަ ނިންމުމުގެ މަސައްކަތުގައި ޒެލެންސްކީ އައްޔަން ކުރައްވާފައި ހުންނެވީ ވެސް ޔާމަކް އެވެ. އޭނާ ފާހަގަ ވެފައި ވަނީ އެ މަޝްވަރާ ތަކުގައި ޔުކްރެއިން ގެ ފަރާތުން އިސް ދައުރެއް އަދާ ކުރެއްވި މުހިންމު ލީޑަރެއްގެ ގޮތުގަ އެވެ.

ޔާމަކްގެ މައްޗަށް ކޮށްފައިވާ ކޮރަޕްޝަންގެ ތުހުމަތުތަކާ ގުޅިގެން ޔުކްރެއިންގެ ސިޔާސީ މައިދާނަށް ވެސް ބޮޑު ބަދަލެއް އަންނާނެ ކަމަށް ލަފާ ކުރެވެ އެވެ. ޚާއްސަކޮށް އެމެރިކާއާ އެކު ވަރަށް ހައްސާސް ވާހަކަ ތަކެއް ބޭއްވުމަށް ތައްޔާރު ވަމުން އަންނަ ވަގުތެއްގައި، މި މައްސަލައިގެ ސަބަބުން އެކަމަށް ވެސް އަސަރު ކުރާނެ ކަމަށް މާހިރުން ފާހަގަ ކޮށްފައިވެ އެވެ.

އެމެރިކާގެ ފަރާތުން ހަނގުރާމަ ނިންމުމަށް ޕްލޭނެއް ހުށަހަޅާފައިވާއިރު، ޔުކްރެއިން އާއި އެ ޤައުމުގެ ބައިވެރިން ބުނެފައި ވަނީ އެއީ ރަޝިޔާ އަށް ފައިދާވާ ގޮތަށް ހުށަހަޅާފައިވާ ޕްލޭނެއް ކަމަށެވެ. އަދި އެ ޕްލޭނަށް ބަދަލު ތަކެއް ގެނެސް، ޕްލޭން އިސްލާހު ކުރަން ޖެހޭ ކަމަށް ވެސް އެ ޤައުމު ތަކުން ވަނީ ބުނެފަ އެވެ.

ޔާމަކްއާ ދެކޮޅަށް ކޮށްފައިވާ ކޮރަޕްޝަންގެ ތުހުމަތުތަކާ ގުޅިގެން ޔުކްރެއިންގެ ކޮރަޕްޝަން ހުއްޓުވުމާ ބެހޭ އިދާރާ އިން ވަނީ ހުކުރު ދުވަހު ޔާމަކްގެ ގެކޮޅަށް ރެއިޑު ކޮށްފަ އެވެ. ޔުކްރެއިންގެ ވެރި ރަށް ކީވްގައި ހުންނަ އެ ގެކޮޅަށް ރެއިޑު ކުރުމަށް ފަހު، އޮފިޝަލުން ވަނީ ބަލައި ފާސް ކުރުން ކުރިއަށް ގެންގޮސްފަ އެވެ. އެކަމާ ގުޅޭ ގޮތުން ޔާމަކް ސޯޝަލް މީޑިއާގައި ވިދާޅުވެފައި ވަނީ، އެކަމުގައި އޭނާގެ ފަރާތުން ފުރިހަމަ އަށް އެއްބާރުލުން ދޭނެ ކަމަށެވެ.

އެކަމާ ގުޅޭ ގޮތުން ޒެލެންސްކީ ވިދާޅުވީ މަޝްވަރާ ތަކުގެ މަރުހަލާގައި އަބަދު ވެސް ޔާމަކް އިސް ކޮށްފައި ވަނީ ޔުކްރެއިންގެ މަސްލަޙަތު ކަމަށާއި، އޭނާ ވަކާލާތު ކޮށްފައި ވަނީ ސީދާ ޔުކްރެއިން އިން ބޭނުންވާ ގޮތަށް ކަމަށެވެ. އެކަމަށްޓަކައި ޔާމަކް އަށް ވަރަށް ބޮޑަށް ޝުކުރު އަދާ ކުރައްވާ ކަމަށާއި، އޭނާ އަކީ ވަޠަނީ ބޭފުޅެއް ކަމަށް ޒެލެންސްކީ ވިދާޅުވި އެވެ.

މީގެ އިތުރުން، ޔާމަކްގެ އިސްތިއުފާއާ ގުޅިގެން އޭނާގެ ބަދަލުގައި ދެން އެ މަޤާމަށް އައްޔަން ކުރައްވާނެ ފަރާތެއް ކަނޑައަޅަން މަޝްވަރާތައް ކުރިއަށް ގެންދާނެ ކަމަށް ވެސް ޒެލެންސްކީ ވިދާޅުވެފައިވެ އެވެ. ޚާއްސަކޮށް ހަނގުރާމަ ނިންމުމުގައި ޔުކްރެއިން އިން ޚާއްސަ ސަމާލު ކަމެއް ދޭން ޖެހޭއިރު، އެކަމަށް އިތުރު ބާރެއްް ބޭނުންވާ ކަމަށް ވެސް ޒެލެންސްކީ ވިދާޅުވި އެވެ.