ތޫފާން "ޑިޓުވާ" ދަތުރު ކުރަމުން ދަނީ ރާއްޖެއާ ދުރަށް، އެކަމަކު ކުރިއަށް އޮތް 24 ގަޑިއިރު މުޅި ރާއްޖޭގެ މޫސުން ގޯސްވާނެ
ތޫފާން ދަތުރު ކުރަމުންދާނީ އުތުރުހުޅަނގު އުތުރަށް އިންޑިއާގެ އުތުރު ޓަމިލްނާޑޫ، ޕޫޑޫޗެރީ އަދި އަންދްރަ ޕްރެދޭޝްގެ ދެކުނު އައްސޭރި ފަށާއި ދިމާއަށް
މޫސުން ގޯސްވެ، ވައިގަދަވި ދުވަހެއްގައި ގެއެއްގެ ފުރާޅު އެއްލާފައި - ފައިލް ފޮޓޯ
ތޫފާން "ޑިޓުވާ" އާ ގުޅިގެން ކުރިއަށް އޮތް 24 ގަޑިއިރު މުޅި ރާއްޖޭގެ މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ އިން ބުނެފި އެވެ.
ހުކުރު ދުވަހު މޫސުމާ ބެހޭ ގައުމީ އިދާރާ އިން ބުނީ، ތޫފާން ''ޑިޓުވާ'' މިހާރު ހުރީ ހއ. ކެލާގެ އިރުއުތުރުން ގާތްގަނޑަކަށް 876 ކިލޯމީޓަރު ދުރުން، ސްރީ ލަންކާގެ އުތުރު އައްސޭރިފަށު ގައި ކަމަށެވެ. މި ތޫފާން ދަތުރު ކުރަމުންދާނީ އުތުރުހުޅަނގުއިތުރަށް އިންޑިއާގެ އުތުރު ޓަމިލްނާޑޫ، ޕޫޑޫޗެރީ އަދި އަންދްރަ ޕްރެދޭޝްގެ ދެކުނު އައްސޭރި ފަށާއި ދިމާއަށް ކަމަށާއި، ރާއްޖެއާ ދުރަށް ކަމަށް އެ އިދާރާ އިން ބުނެ އެވެ.
މި ތޫފާނާއި ގުޅިގެން ހުދު ސަމާލު ނެރިފައިވަނީ އެލާޓް ދަރަޖަ ކުރެވިފައިވާ ސަރަހައްދަށް ތޫފާން ވަނުމުންކަން ފާހަގަކޮށް މޫސުމާ ބެހޭ ގައުމީ އިދާރާ އިން ބުނީ މި ތޫފާނާއި ގުޅިގެން ކުރިއަށް އޮތް 24 ގަޑިއިރު ވެސް ދެކުނާއި މެދުރާއްޖެތެރޭގެ އެކި ހިސާބަށް ވިއްސާރަ ކުރުމާއެކު ގުގުރާނެ ކަމަށެވެ.
2 ޑިސެންބަރު 2025 ވާ އަންގާރަ ދުވަހުން ފެށިގެން މޫސުން ރަނގަޅުވާނެ ކަމަށް ލަފާ ކުރެވޭ ކަމަށް އެ އިދާރާ އިން ބުނެ އެވެ.
މީގެ އިތުރުން މޫސުމާ ބެހޭ ގައުމީ އިދާރާ އިން ބުނީ، ކުރިއަށް އޮތް 24 ގަޑިއިރު ހުޅަނގުދެކުނާއި ހުޅަނގުން، ގަޑިއަކު 08 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައި ބާރުވުން އެކަށީގެން ވާ ކަމަށެވެ. އާދައިގެ ވަރަކަށް ގަދަވެފައި ވިލާގަނޑުގައި ގަދަ ވާނެ ކަމަށާއި، ރާޅުގެ އުސްމިނުގައި 6 ނުވަތަ 3 ފޫޓު ހުންނާނެ ކަމަށް އެ އިދާރާ އިން ބުނެ އެވެ.
މުޅި ރާއްޖޭގެ މޫސުން ގޯސް ވެފައިވާތީ މޫސުމަށް ސަމާލު ވުމަށް ކަމާގުޅޭ އިދާރާތަކުން ވަނީ އިލްތިމާސް ކޮށްފަ އެވެ.
