ސްރީ ލަންކާ އަށް މިހާރު ކުރިމަތިވެފައިވާ ބޯ ވިއްސާރަ އާއި، ވާރޭ ވެހުމުގެ ސަބަބުން މިހާތަނަށް 123 މީހުން މަރުވެފައިވާ ކަމަށް ހާމަ ކޮށްފި އެވެ.
ސްރީ ލަންކާގެ ޑިޒާސްޓަރ މެނޭޖްމަންޓް ސެންޓަރުން ހޮނިހިރު ދުވަހު އާންމު ކޮށްފައިވާ ގޮތުގައި މި ވިއްސާރައިގެ ސަބަބުން މަރުވެފައިވާ މީހުންގެ އަދަދު މިހާރު ވަނީ 123 އަށް އަރައިފަ އެވެ. އަދި 130 އަށް ވުރެ ގިނަ މީހުން ގެއްލިފައިވާ ކަމަށް ވެސް އެ އިދާރާ އިން ވަނީ ހާމަ ކޮށްފަ އެވެ.
ޑިޒާސްޓަރ މެނޭޖްމަންޓް ސެންޓަރުގެ ޑިރެކްޓަރ ޖެނެރަލް ސަމްޕަތު ކޮޓުވެގޯޑާ ވިދާޅުވީ، ބޯކޮށް ވާރޭ ވެހުމުގެ ސަބަބުން އެތައް ބައެއްގެ ގެދޮރަށް ގެއްލުންވެފައިވާ ކަމަށެވެ. އަދި ސަރުކާރުން ހިންގާ ރައްކާތެރި ކަމުގެ މަރުކަޒު ތަކަށް މިހާތަނަށް 43،995 އަށް ވުރެ ގިނަ މީހުން ބަދަލު ކޮށްފައިވާ ކަމަށާއި، ރިފީލް އޮޕަރޭޝަންތައް ކުރިއަށްދާ ކަމަށް ވެސް އޭނާ ވިދާޅުވި އެވެ.
ސްރީ ލަންކާ އަށް ކުރިމަތިވި ވިއްސާރައިގެ އަސަރު މިހާރު އެ ޤައުމާ ދުރަށް ދަތުރު ކުރަމުން ގޮސް، އިންޑިއާއާ ދިމާލަށް ދަތުރު ކުރަމުން އަންނަ ކަމަށް ބުނެފައިވެ އެވެ. ނަމަވެސް މި ވިއްސާރާއިގެ ސަބަބުން ސްރީ ލަންކާ އަށް ވަރަށް ބޮޑެތި ގެއްލުން ތަކެއް ލިބިފައިވާ ކަމަށް އިދާރާ ތަކުން ހާމަ ކޮށްފައިވެ އެވެ.
ވެރި ރަށް ކޮލަމްބޯގައި އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ކޮޓުވެގޯޑާ ވިދާޅުވީ، އަސްކަރިއްޔާގެ އެހީތެރިކަމާ އެކު ރިލީފް އޮޕަރޭޝަންތައް ކުރިއަށް ގެންދަމުން އަންނަ ކަމަށާއި، އެކަމުގައި ހުރިހާ ވަސީލަތް ތަކެއް ބޭނުން ކުރުމަށް ހަމަޖެހިފައިވާ ކަމަށެވެ.
މޫސުމީ ޙާލަތުގެ އަސަރު މިދިޔަ ހޯމަ ދުވަހުން ފެށިގެން ކުރަމުން އައިއިރު، ބުދަ ދުވަހު ސައިކްލޯން ވަނީ ސްރީ ލަންކާ އަށް ކުރިމަތިވެ ޤައުމުގެ އެކި ހިސާބު ތަކުގައި ރެކޯޑު މިންވަރަކަށް ވާރޭ ވެހިފަ އެވެ. ދަށް ފަންތީގެ ސަރަހައްދު ތަކުގައި ވިއްސާރައިގެ ޙާލަތު ހޮނިހިރު ދުވަހު އިތުރަށް ގޯސްވުމާ އެކު، ކޮލަމްބޯ އިން ހިންދު ކަނޑަށް ފައިބާ ކެލާނީ ކޯރުގެ ކައިރީގައި ދިރިއުޅޭ މީހުން ބަދަލު ކުރުމަށް ވެސް އިދާރާ ތަކުން ވަނީ އަންގައިފަ އެވެ.
މިވަގުތަށް ބަލާއިރު ވެރި ރަށް ކޮލަމްބޯ އާއި ބައެއް އެހެން ސަރަހައްދު ތަކުގައި ވާރޭ ވެހުން މަޑު ޖެހިފައިވާއިރު، ބައެއް ސަރަހައްދު ތަކަށް ވާރޭ ވެހެމުން އަންނަ ކަމަށް އޮފިޝަލުން ބުނެފައިވެ އެވެ. މި ހާދިސާގައި ލަންކާ އަށް ބޮޑެތި ގެއްލުން ތަކެއް ލިބެމުން އަންނައިރު، އެ ޤައުމުން ވަނީ ބައިނަލްއަޤުވާމީ އެހީތެރި ކަމަށް ވެސް އެދިފަ އެވެ.
މި ހާދިސާއާ ގުޅިގެން ހޮނިހިރު ދުވަހު އިންޑިއާގެ ބޮޑު ވަޒީރު ނަރެންދްރަ މޯދީ ވެސް ވަނީ ހިތާމަފާޅު ކުރައްވައި، ސްރީ ލަންކާގެ ރައްޔިތުންނަށް ތައުޒިޔާ ފޮނުއްވައިފަ އެވެ. އަދި ސްރީ ލަންކާ އަށް ބޭނުންވާ އެހީތެރިކަން ދިނުމަށް ނިންމައި، އެ ޤައުމާ އެކު އިންޑިއާ ސަރުކާރު އޮތް ކަމަށް ވެސް ވަނީ ހާމަ ކުރައްވައިފަ އެވެ.
އެކަމާ ގުޅިގެން ސްރީ ލަންކާގެ ސަރުކާރުން ވަނީ ޤައުމުގެ ހުރިހާ ހިސާބެއްގައި ރެސްކިއު އަދި ރިލީފް އޮޕަރޭޝަންތައް ވަރުގަދަ ކުރުމަށް އަސްކަރިއްޔާ ޙަރަކާތްތެރި ކޮށްފަ އެވެ. ފެން ބޮޑުވުން ހުއްޓުނު ސަރަހައްދު ތަކުން މީހުން ހޯދައި، ސަލާމަތް ކުރުމަށް އަސްކަރީ ހެލިކޮޕްޓަރުތަކާއި، އުޅަނދުތައް ވެސް އަންނަނީ ބޭނުން ކުރަމުންނެވެ.
ސްރީ ލަންކާ އަށް ކުރިމަތިވި އެންމެ ބޮޑު ވިއްސާރައިގެ ހާދިސާ އަކީ 2003 ވަނަ އަހަރު ކުރިމަތިވި ހާދިސާ ކަމަށް ރިޕޯޓު ކޮށްފައިވާއިރު، އެފަހަރުގެ ހާދިސާގައި 254 މީހުން މަރުވެފައިވާ ކަމަށް ވަނީ ރެކޯޑު ކުރެވިފަ އެވެ.