ކުރިއަށް އޮތް 24 ގަޑިއިރު މުޅި ރާއްޖެއަށް ވަރަށް ވައިގަދަވާނެ ކަމަށާއި، ރާޅުގެ އުސްމިން 8 ފޫޓަށް އުފުލުނެ ކަމަށް މޫސުމާ ބެހޭ ގައުމީ އިދާރާ އިން ބުނެފި އެވެ.

ބުރާސްފަތި ދުވަހު މޫސުމާ ބެހޭ ގައުމީ އިދާރާ އިން ބުނީ، އެކިހިސާބަށް ވިއްސާރަކުރާނެ ކަމަށާއި، ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ.

އެ އިދާރާ އިން ބުނީ ހުޅަނގުދެކުނާއި ހުޅަނގުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 45 ނުވަތަ 50 މޭލަށް ވައިގަދަވުން އެކަށީގެންވާ ކަމަށެވެ.

އާންމު ގޮތެއްގައި ކަނޑުތައް ގަދަވާނެ ކަމަށާއި، ރާޅުގެ އުސްމިނުގައި 4 ނުވަތަ 8 ފޫޓަށް އުފުލޭނެ ކަމަށް މޫސުމާ ބެހޭ ގައުމީ އިދާރާ އިން ބުނެ އެވެ.

ހުޅަނގު މޫސުމުގެ ބާރުގަދަ ވެފައިވާއިރު، ބުދަ ދުވަހު މާލެ ސަރަހައްދަށް ވަނީ ވަރަށް ބޮޑަށް ވައި ގަދަވެފަ އެވެ. ހުޅުލެ އަށް ވިލާގަނޑު ގައި 60 މޭލަށް ވައި ބާރުވެފައިވާ ކަމަށް ރިކޯޑު ކުރެވިފަ އެވެ.

މީގެ އިތުރުން މޫސުމާ ބެހޭ ގައުމީ އިދާރާ އިން ބުނީ، އާދިއްތަ ދުވަހުން ފެށިގެން 10 މޭލާއި 20 މޭލަށް ވައި މަޑުވެ، ވިއްސާރަ އަލިވާން ފަށާނެ ކަމަށެވެ. އަދި މޫސުން އެއްކޮށް ރަނގަޅުވާނީ އަންނަ ބުރާސްފަތި ދުވަހުން ފެށިގެން ކަމަށް އެ އިދާރާ އިން ލަފާ ކޮށްފަ އެވެ. ނަމަވެސް ވައިގަވާނެ ކަމާއި، ކަނޑުތައް ގަދަވާނެ ކަމަށް އެ އިދާރާ އިން ބުނެ އެވެ.

އެހެންކަމުން ހުރިހާ ފަރާތްތަކުން ޚާއްސަކޮށް ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް ވަނީ އިލްތިމާސް ކޮށްފަ އެވެ.