ހޯމަ ދުވަހާ ހަމައަށް މޫސުމް ވަރަށް ބޮޑަށް ގޯސްވާނެ، ސަމާލުވޭ
ބޯކޮށް ވާރޭވެހި، ގަދައަށް ވައިޖެހުމުގެ ސަބަބުން ބައެއް ރަށްތަކަށް އެކިވަރުގެ ގެއްލުން ލިބިފައިވޭ
ބޯކޮށް ވާރޭވެހި، ފެން ބޮޑުވުމުން ފެން ހިންދުމުގެ މަސައްކަތް ކުރަނީ
ހޯމަ ދުވަހާ ހަމައަށް ރާއްޖޭގެ މޫސުން ވަރަށް ބޮޑަށް ގޯސްވާނެ ކަމަށް މޫސުމާބެހޭ ގައުމީ އިދާރާއިން ލަފާކޮށްފިއެވެ.
ހުކުރު ދުވަހު މޫސުމާބެހޭ ގައުމީ އިދާރާއިން ބުނީ، ރާއްޖޭގެ ސަރަހައްދަށް އަދިވެސް ހުޅަނގު މޫސުމުގެ ބާރު ގަދަވެ، ވައި ބާރުވުމާއި އެކު ކަނޑުތައް ގަދަވެ، ވިއްސާރަ ކުރާނެ ކަމަށް ލަފާ ކުރެވޭ ކަމަށެވެ. އަދި ހުކުރު ދުވަހުން ފެށިގެން އަންނަ ހޯމަ ދުވަހާ ހަަމައަށް މޫސުން ވަރަށް ބޮޑަށް ގޯސްވާނެ ކަމަށް އެ އިދާރާއިން ވަނީ ލަފާކޮށްފައެވެ.
ކުރިއަށް އޮތް 24 ގަޑިއިރު މޫސުން ލަފާކުރާ ގޮތަށް ބަލާއިރު، އެކިހިސާބަށް ވިއްސާރަކުރާނެ ކަމަށާއި، ބައެއް ރަށްތަކަށް ގުގުރުން އެކަށީގެންވާ ކަމަށް މޫސުމާ ބެހޭ ގައުމީ އިދާރާއިން ބުނެއެވެ.
އެ އިދާރާއިން ބުނީ، ހުޅަނގާއި ހުޅަނގުއުތުރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށެވެ. އަދި ކަނޑުތައް ގަދަވާނެ ކަމަށާއި، ރާޅުގެ އުސްމިން 4 ނުވަތަ 7 ފޫޓަށް އުފުލޭނެ ކަމަށެވެ.
މީގެ އިތުރުން މޫސުމާބެހޭ ގައުމީ އިދާރާއިން ވަނީ ހުކުރު ދުވަހުގެ ހެނދުނު 9:30ން މެންދުރުފަހު 3:30ށް މުޅި ރާއްޖެއަށް ހުދު ސަމާލު ނެރިފައެވެ.
ބޯކޮށް ވާރޭވެހި، ގަދައަށް ވައިޖެހުމުގެ ސަބަބުން ބައެއް ރަށްތަކަށް އެކިވަރުގެ ގެއްލުން ލިބިފައިވެއެވެ. ފެންބޮޑުވެ، ބައެއް ގެތަކަށް ފެންވަންނަމުންދާތީ، އާއްމު ރައްޔިތުންނާއި، ފުލުހުންނާއި، ކައުންސިލް ގުޅިގެން ވެލި ބަސްތާ ޖެހުމުގެ މަސައްކަތާއި، ރަށު ތެރެއިން ފެން ހިންދުމުގެ މަސައްކަތް ކޮށްފައިވެއެވެ.
ހުޅަނގު މޫސުމުގެ ބާރުގަދަވެފައިވާއިރު، ފާއިތުވެދިޔަ 24 ގަޑިއިރުގެ ތެރޭގައި ކަނޑުމަތީގެ ހިތާމަވެރި ހާދިސާތަކެއް ވަނީ ހިނގާފައެވެ. ބުރާސްފަތި ދުވަހު މާލެއިން ފުރައިގެން ކ.އެރިޔަދޫ އަށް ހަތް މީހުންނާ އެކު ދަތުރު ކުރަމުން ދިޔަ "އަލްމާކް ފިޔަ" ލޭންޑިން ކްރާފްޓް ބަންޑުން ޖަހާލި ހާދިސާގައި ތިން މީހަކު ގެއްލުނެވެ. ދެމީހެއްގެ ހަށިގަނޑު މަރުވެފައި އޮއްވާ ވަނީ ހޯދާފައެވެ. އަދިވެސް އެކަކުގެ ހަށިގަނޑު ފެނިފައިނުވެއެވެ. އަދި މާލެއިން ޅ. ނައިފަރަށް ދަތުރުކުރަމުންދިޔަ މުދާ އުފުލާ ބޯޓެއް ވެސް ވަނީ އަޑިއަށް ގޮސްފައެވެ. އެ ބޯޓުގައި ތިބި ތިބި ފަސް ފަޅުވެރިން ކޯސްޓުގާޑުގެ އެހީތެރިކަމާއެކު ވަނީ ސަލާމަތްކޮށްފައެވެ.
މޫސުން ގޯސްވެ، ކަނޑުމަތީގެ ހިތާމަވެރި ހާދިސާތައް ހިނގާތީވެ، މިދުވަސްވަރު ކަނޑުމަގުން ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް ކަމާގުޅުންހުރި އިދާރާތަކުން ވަނީ އިލްތިމާސްކޮށްފައެވެ.
