ސްރީލަންކާ: ތޫފާނުގެ ސަބަބުން މިހާތަނަށް 334 މީހުން މަރުވެ، 370 މީހުން އަދިވެސް ގެއްލިފައިވާ ކަމަށް ރިޕޯޓު ކޮށްފި

ސްރީލަންކާ އަށް މި ފަހުގެ ތާރީހުގައި ދިމާވި އެންމެ ނުރައްކާތެރި ގުދުރަތީ ކާރިސާ ގައި ތޫފާން ދިތުވާ ގެ އަސަރު އެ ގައުމުގެ އެކި ކަންކޮޅުތަކަށް ފޯރާ، ބޯ ވިއްސާރަ އާއި، ފެންބޮޑުވުމާއި، ބިންގަނޑު ކަނޑައިގެން ދިއުން ހުއްޓުމެއް ނެތި އަންނަނީ ކުރިމަތިވަމުންނެވެ.

ކޯރުތަކުގެ ފެންގަނޑު ތާރީހީ ރިކޯޑުތަކަށް އުފުލި، މުޅި ގައުމު ފެނުއަޑީގައި އޮތް އިރު، މުހިންމު ފާލަންތައް ބުރިވެގެން ވެއްޓި، އަދި ގިނަ އަދަދެއްގެ އިމާރާތްތައް ވަނީ ހަލާކުވެފަ އެވެ.

ސްރީލަންކާ އަށް މިހާރު ކުރިމަތިލާންޖެހިފައިވާ އިންސާނީ ކާރިސާ ނުރައްކާ ދަރަޖަ އަކަށް މައްޗަށް ގޮސްފައިވާއިރު، ބައިނަލްއަޤްވާމީ އެހީތެރިކަން އެ ގައުމަށް ފޯރު ކޮށްދިނުމުގެ މަސައްކަތް ކުރިއަށް ދާ ކަމަށް ރިޕޯޓުތައް ބުނެ އެވެ.

ތޫފާން ދިތުވާގެ ސަބަބުން ސްރީލަންކާ ގައި ތާށިވެފައި ތިބި 750 އިންޑިއާ ރައްޔިތުން، 'އޮޕަރޭޝަން ސާގަރު ބަންދޫ' ގެ ދަށުން ކުރިއަށްދާ މަސައްކަތްތަކުގެ ތެރެއިން، އިންޑިއާ އިން ގެންގޮސްފައިވާ ކަމަށް ކޮލަމްބޯގައި ހުންނަ އިންޑިއާ ހައިކޮމިޝަނުން ބުނެއެވެ.

ތޫފާނުގެ ސަބަބުން މިހާތަނަށް 334 މީހުން މަރުވިކަން ކަށަވަރުވެފައިވާ ކަމަށާއި، 370 މީހުން އަދިވެސް ގެއްލިފައިވާ ކަމަށް ކާރިސާ މެނޭޖްމަންޓް ސެންޓަރު (ޑީ.އެމް.ސީ) އިން އާދިއްތަ ދުވަހު ރިޕޯޓުކޮށްފިއެވެ. އެންމެ ބޮޑަށް އަސަރުކޮށްފައިވާ ޑިސްޓްރިކްޓަކީ ކެންޑީއެވެ. އެ ޑިސްޓްރިކްޓުން 88 މީހުން މަރުވެ، 150 މީހުން ގެއްލިފައިވާ ކަމަށް ރެކޯޑުކޮށްފައިވެއެވެ. މީގެ އިތުރުން ބަޑުއްލާ، ނުވަރާ އެލިޔާ އަދި މާތަލޭ އިންވެސް ގިނަ އަދަދެއްގެ މީހުން މަރުވެފައިވާކަމަށް ރިޕޯޓުކޮށްފައިވެއެވެ. ޑީ.އެމް.ސީ އިން ބުނި ގޮތުގައި، މި ކާރިސާގެ ސަބަބުން ގައުމުގެ 309,607 އާއިލާގެ 1,118,929 މީހުންނަށް އަސަރުކޮށްފައިވެއެވެ.

ފްލައިޓްތަކަށް ހުރަސްއެޅި، ބަންޑާރަނައިކެ އިންޓަރނޭޝަނަލް އެއާޕޯޓް (ބީ.އައި.އޭ) ގައި އެތައް ދުވަހެއް ވަންދެން ތާށިވެފައި ތިބި ގާތްގަނޑަކަށް 400 އިންޑިއާ ރައްޔިތުން، އާދިއްތަ ދުވަހު އިންޑިއާ އަށް ރައްކާތެރިކަމާއެކު ފޮނުވާލާފައިވާ ކަމަށް އެއާޕޯޓްގެ އޮފިޝަލުން ބުނެފައިވެއެވެ. މީހުން ބަލައި އައި އިންޑިއާ ގެ ބޯޓު ފަހަރުގައި އެހީގެ ސާމާނު ގެނެސްފައިވެއެވެ.

ސައިކްލޯން ދިތުވާ ގެ ސަބަބުން ސްރީލަންކާ އަށް އެހީތެރިވުމަށް ޕާކިސްތާނުން ބޮޑު އިންސާނީ އެހީގެ އޮޕަރޭޝަނެއް ފަށާފައިވާ ކަމަށް ކޮލަމްބޯގައި ހުންނަ ޕާކިސްތާނުގެ ހައިކޮމިޝަނުން އާދިއްތަ ދުވަހު ބުނެފިއެވެ. އެ ބަޔާނުގައި ބުނެފައިވާ ގޮތުގައި، ޕާކިސްތާނުގެ ސަރުކާރުން، ޕާކިސްތާނުގެ ސިފައިންނާއި ގައުމީ ކާރިސާ މެނޭޖްމަންޓް އޮތޯރިޓީ (އެން.ޑީ.އެމް.އޭ) މެދުވެރިކޮށް، ނޫރު ޚާން އެއާ ބޭސް އިން ކޮލަމްބޯ އަށް އިންސާނީ އެހީގެ ގިނަ ފްލައިޓްތަކެއް ވަނީ އިންތިޒާމްކޮށްފަ އެވެ. ޕާކިސްތާނުން ފީލްޑް ހޮސްޕިޓަލްތަކާއި، ގާތްގަނޑަކަށް 100 ޓަނުގެ ކުއްލި އެހީގެ ސާމާނު ގެންދާނެ އެވެ.