ސްރީލަންކާ އަށް ނުރައްކާތެރި މޫސުމީ ހާލަތެއް ކުރިމަތިވެ އެތައް ބަޔަކު މަރުވެ ބޮޑެތި ގެއްލުންތަކެއް ލިބިއްޖެ އެވެ. ބޯ ވިއްސާރަ އާއި ގަދަ ވައިގެ ސަބަބުން ސްރީލަންކާގެ އެތައް ސަރަހައްދެއްގެ ދިރިއުޅުމަށް ބޮޑެތި ބުރޫއެރުންތަކެއް ކުރިމަތިވެފައިވާއިރު، ފެންބޮޑުވުން އަދި ބިންގަނޑު ކަނޑައިގެންދިއުން ހުއްޓުމެއްނެތި ކުރިއަށްދާކަމަށް ރިޕޯޓުތައް ބުނެއެވެ.

މުޅި ގައުމަށް ރެޑް އެލަޓް ނެރެފައިވާއިރު، ލަންކާގެ މީޑިއާ އިން ރިޕޯޓު ކޮށްފައިވަނީ އެ ގައުމަށް މިހާރު ކުރިމަތިވެފައިވަނީ ވަރަށް ބޮޑު ގައުމީ ކާރިސާއެކެވެ.

ފެންބޮޑުވެ، ކޯރުތައް ބަންޑުން ވުމުގެ ސަބަބުން ދަތުރުފަތުރުގެ ނިޒާމަށް ބޮޑެތި ބުރޫއެރުންތައް ކުރިމަތިވެ، އެތައް ޑިސްޓްރިކްޓެއްގެ ދިރިއުޅުމަށް ވަނީ އަސަރުކޮށްފައެވެ. ސަރުކާރުން ބުނެފައިވަނީ ހާލަތު އަވަހަށް ބަދަލުވަމުންދާތީ، ރައްޔިތުން ހާލަތައް ވިސްނައިގެން، ހަމަޖެހިގެން ތިބުމާއި، ތައްޔާރުވެ ތިބުން މުހިންމު ކަމަށެވެ.

އެކި ކަންކޮޅުތަކުގައި ކަރަންޓުގެ ހިދުމަތަށް ބޮޑެތި ބުރޫއެރުންތައް ކުރިމަތިވެ، ގައުމުގެ އެކި ކަންކޮޅުތަކުން 65,000 އަށް ވުރެ ގިނަ ކަރަންޓު ކެނޑުމުގެ ހާދިސާ ރިޕޯޓުކޮށްފައިވެއެވެ.

ދިފާއީ މިނިސްޓްރީގެ ސެކްރެޓަރީ، އެއާރ ވައިސް މާޝަލް ސަމްޕަތު ތުޔާކޮންތާ ވިދާޅުވީ، ސައިކްލޯނިކް ސްޓޯމް ދިޓުވާގެ ސަބަބުން ކުރިމަތިވެފައިވާ ނުރައްކާތެރި މޫސުމީ ހާލަތުގައި ކުރިއަށްދާ ސަލާމަތީ އޮޕަރޭޝަންތަކަށް އެހީތެރިކަން ހޯދުމަށް ސްރީލަންކާއިން ވަނީ ކޮލޮމްބޯގައި މިހާރު ހަރަކާތްތެރިވާ އިންޑިއާގެ ހަނގުރާމަމަތީ ބޯޓުގެ އެހީތެރިކަމަށް އެދިފައިވާ ކަމަށެވެ. އެގޮތުން އެ ބޯޓުގެ މަތިންދާބޯޓު ބޭނުންކުރުމަށްވެސް އެދިފައިވާ ކަމަށް ވިދާޅުވިއެވެ.

ފުލުހުން ބުނި ގޮތުގައި، ގައުމުގެ އެކި ކަންކޮޅުތަކުގައި ކުރިމަތިވެފައިވާ ނުރައްކާތެރި މޫސުމީ ހާލަތުގެ ސަބަބުން ކޮލޮމްބޯގެ އެތައް ސަރަހައްދަކަށް ވަނީ އަސަރުކޮށްފައެވެ. ފެންބޮޑުވުމާއި ގަސްތައް ވެއްޓުމުގެ ސަބަބުން މަގުތަކުން ދަތުރުފަތުރުކުރުމަށް ހުރަސް އެޅިފައިވާ ކަމަށް ރިޕޯޓުތައް ބުނެއެވެ.

ރައީސް ޑިސެނަޔަކަ ވަނީ ގައުމުގެ އެކި ކަންކޮޅުތަކުގައި މިހާރު ކުރިމަތިވެފައިވާ ނުރައްކާތެރި މޫސުމީ ހާލަތުގެ ސަބަބުން އަސަރުކޮށްފައިވާ ފަރާތްތަކަށް އަވަސް އެހީތެރިކަން ފޯރުކޮށްދިނުމަށް ސިފައިންނަށް އިރުޝާދު ދެއްވާފައެވެ. ސަލާމަތީ އޮޕަރޭޝަންތައް ހިންގުމަށް 20,500 އަށް ވުރެ ގިނަ ސިފައިން ދަނީ ހަރަކާތްތެރިވަމުންނެވެ. ހަމައެކަނި ހުކުރު ވިލޭރޭ ވެސް ސިފައިން ވަނީ ގާތްގަނޑަކަށް 3,790 މީހުން ސަލާމަތްކޮށް ރައްކާތެރި މަރުކަޒުތަކަށް ގެންގޮސްފައެވެ.

ސްރީލަންކަން އެއާލައިންސް އިން ވަނީ ދަތުރުފަތުރުގެ އިރުޝާދެއް ނެރެފައެވެ. ދަތުރުކުރުމަށް ހަމަޖެހިފައިވާ ފަސިންޖަރުން އެއާޕޯޓަށް ދިއުމުގެ ކުރިން ފްލައިޓްގެ އެންމެ ފަހުގެ މައުލޫމާތު ބަލާނެ ކަމަށް އެ އެއާލައިނުން އިލްތިމާސްކޮށްފައިވެއެވެ. އެ އެއާލައިނުން ފަސިންޖަރުންނަށް އެދިފައިވަނީ އެއާލައިންގެ ރަސްމީ ވެބްސައިޓުގެ 'ފްލައިޓް ސްޓޭޓަސް' ބަލައިގެން ދަތުރު ރޭވުމަށެވެ.

ސަރުކާރުން ވަނީ ކާރިސާއަށް އެހީވުމުގެ ހިދުމަތްތަކަށް 1.2 ބިލިއަން ސްރީލަންކަން ރުޕީސް ހާއްސަކޮށްފައިވާ ކަމަށް އޮފިޝަލުން ކަށަވަރުކޮށްދީފައެވެ.

މެޓިއޮރޮލޮޖީ ޑިޕާޓްމަންޓުން ހާމަ ކުރި ގޮތުގައި ސައިކްލޯނިކް ސްޓޯމް ދިތުވާ މިހާރު ހުރީ ޓްރިންކޮމާލީގެ ދެކުނުން ގާތްގަނޑަކަށް 50 ކިލޯމީޓަރު ދުރުގައެވެ. ޑިޕާޓްމަންޓުން ބުނި ގޮތުގައި، ކުރިއަށް އޮތް ގަޑިތަކުގައި މި ސިސްޓަމް އިރު އުތުރާ ދިމާލަށް ދަތުރުކުރުމުގެ ފުރުސަތު ބޮޑެވެ.

ޑިޒާސްޓަރ މެނޭޖްމަންޓް ސެންޓަރު (ޑީއެމްސީ) އިން ބުނި ގޮތުގައި، ތޫފާން ދިތުވާގެ ސަބަބުން ދިމާވި ހާދިސާތަކުގައި ޖުމްލަ 56 މީހުން މަރުވެފައިވާއިރު، 21 މީހުން ވަނީ ގެއްލިފައެވެ. އަދި 14 މީހުންނަށް އަނިޔާވެފައިވެއެވެ.

ޑީއެމްސީ ރިޕޯޓުކުރާ ގޮތުގައި، ގަދަ މޫސުމީ ހާލަތުގެ ސަބަބުން 12,313 އާއިލާގެ 43,991 މީހުންނަށް ވަނީ އަސަރުކޮށްފައެވެ. މި ތޫފާނުގެ ސަބަބުން ހަތަރު ގެ އެއްކޮށް ހަލާކުވެފައިވާއިރު، އެތައް ޑިސްޓްރިކްޓެއްގައި 666 ގެއަށް ވަނީ ދޭތެރެދޭތެރެއިން ގެއްލުންވެފައެވެ.

ލަންކާ އަށް ކުރިމަތިވެފައިވާ މޫސުމީ ހާލަތުގެ ސަބަބުން ގިނަ އަދަދެއްގެ ފްލައިޓުތައް ބަންޑާރަނައިކެ އިންޓަރނޭޝަނަލް އެއަރޕޯޓުން ޑައިވާޓް ކުރި ކަމަށް ވެސް ރިޕޯޓުތައް ބުނެ އެވެ.