ލަންކާއަށް ކުރަމުންދާ ވިއްސާރައާ ގުޅިގެން ރާއްޖެއިން 50،000 ޑޮލަރާ 25،000 ކޭސް މަސްދަޅު ހަދިޔާ ކުރަނީ
ސްރީލަންކާއަށް ކުރަމުންދާ ވިއްސާރައާ ގުޅިގެން 56 މީހުން މަރުވެ 21 މީހުން ގެއްލުނު ކަން ޑީއެމްސީ އިން ރިޕޯޓު ކޮށްފައިވޭ
ލަންކާ ހުޅަނގުގައި ޕުޓަލަމްގައި ބޯކޮށް ވާރޭވެހި ފެންބޮޑުވެފައިވާ މަގެއްގެ ތެރެއިން ރައްޔިތުންތަކެއް ހަރަކާތްތެރިވަނީ
ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން، އެ ގައުމަށް ފައިސާގެ އެހީ އާއި މަސްދަޅު ކޭސް ހަދިޔާ ކުރަން ސަރުކާރުން ނިންމައިފި އެވެ.
ބޯ ވިއްސާރަ އާއި ގަދަ ވައިގެ ސަބަބުން ސްރީލަންކާ ގެ އެތައް ސަރަހައްދެއްގެ ދިރިއުޅުމަށް ބޮޑެތި ބުރޫއެރުންތަކެއް ކުރިމަތިވެފައިވާއިރު، ފެން ބޮޑުވުން އަދި ބިންގަނޑު ކަނޑައިގެން ދިއުމުގެ ހާދިސާ ތައް ހިނގަމުންދާ ކަމަށް ރިޕޯޓުތައް ބުނެ އެވެ. ލަންކާ އަށް ކުރަމުންދާ ވިއްސާރައިގައި މިހާތަނަށް ފެންބޮޑުވެ 56 މީހަކު ވަނީ މަރުވެފަ އެވެ.
މިކަމާ ގުޅިގެން ފޮރިން މިނިސްޓްރީ އިން ބުނީ ލަންކާ އަށް ކުރަމުންދާ ވިއްސާރައާ ގުޅިގެން އެ ގައުމަށް ފައިސާ ގެ އެހީގެ ގޮތުގައި 50،000 އެމެރިކާ ޑޮލަރު ހަދިޔާ ކުރަން ނިންމާ ފައިވާ ކަމަށެވެ. އަދި މަސްދަޅުގެ 25،000 ކޭސް ހަދިޔާ ކުރަން ވެސް ސަރުކާރުން ވަނީ ނިންމާފަ އެވެ.
މިއީ ތޫފާން "ޑިޓުވާ" ގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ގައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ނިންމި ނިންމުމެއް ކަމަށް ވެސް މިނިސްޓްރީ އިން ބުނެ އެވެ.
ފޮރިން މިނިސްޓްރީ އިން ބުނީ މި އެހީތެރިކަން ރަމްޒުކޮށްދެނީ ދެ ގައުމުގެ ދެމެދުގައި އޮތް ގާތް އެކުވެރި ގުޅުމާއި މި ފަދަ އުނދަގޫ ދަނޑިވަޅެއްގައި އެ ގައުމު ގެ ރައްޔިތުންނާ އެކު ދިވެހި ރައްޔިތުން ތިބިކަން ކަމަށެވެ. އަދި މި އެހީގެ ސަބަބުން ހާލުގައި ޖެހިފައިވާ ސްރީލަންކާ ރައްޔިތުންނަށް ކޮންމެ ވެސް ވަރެއްގެ ތަސައްލީއެއް ލިބި، ލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބޭނެ ކަމަށް ރާއްޖެ އިން އުއްމީދު ކުރާ ކަމަށް ވެސް ބުނެފައި ވެއެވެ.
މުޅި ލަންކާ އަށް ރެޑް އެލަޓް ނެރެފައިވާއިރު، ލަންކާގެ މީޑިއާ އިން ރިޕޯޓު ކޮށްފައިވަނީ އެ ގައުމަށް މިހާރު ކުރިމަތިވެފައި ވަނީ ވަރަށް ބޮޑު ގައުމީ ކާރިސާއެއް ކަމަށެވެ.
ޑިޒާސްޓަރ މެނޭޖްމަންޓް ސެންޓަރު (ޑީއެމްސީ) އިން ބުނި ގޮތުގައި، ތޫފާން ދިތުވާގެ ސަބަބުން ދިމާވި ހާދިސާތަކުގައި ޖުމްލަ 56 މީހުން މަރުވެފައިވާއިރު، 21 މީހުން ވަނީ ގެއްލިފަ އެވެ. އަދި 14 މީހުންނަށް އަނިޔާވެފައި ވެއެވެ.
ޑީއެމްސީ ރިޕޯޓުކުރާ ގޮތުގައި، ގަދަ މޫސުމީ ހާލަތުގެ ސަބަބުން 12,313 އާއިލާގެ 43,991 މީހުންނަށް ވަނީ އަސަރުކޮށްފަ އެވެ. މި ތޫފާނުގެ ސަބަބުން ހަތަރު ގެ އެއްކޮށް ހަލާކުވެފައިވާއިރު، އެތައް ޑިސްޓްރިކްޓެއްގައި 666 ގެއަށް ވަނީ ދޭތެރެދޭތެރެއިން ގެއްލުންވެފަ އެވެ.
ލަންކާ އަށް ކުރިމަތިވެފައިވާ މޫސުމީ ހާލަތުގެ ސަބަބުން ގިނަ އަދަދެއްގެ ފްލައިޓުތައް ބަންޑާރަނައިކެ އިންޓަރނޭޝަނަލް އެއަރޕޯޓުން ޑައިވާޓް ކުރި ކަމަށް ވެސް ރިޕޯޓުތައް ބުނެ އެވެ.
