އިނގިރޭސި ޕްރިމިއާ ލީގުގައި ބާންލީއާ ދެކޮޅަށް ކުޅުނު މެޗުން މޮޅުވެ، އާސެނަލް އިން އެއް ވަނައިގައި ލީޑު ފުޅާ ކޮށްފި އެވެ.

ބާންލީގެ އަމިއްލަ ދަނޑުގައި ކުޅުނު މެޗު އާސެނަލް އިން ކާމިޔާބު ކުރީ 2-0 އިންނެވެ. މެޗުގައި އާސެނަލް އިން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ.

މެޗުގެ ފުރަތަމަ ހާފުގެ 14 ވަނަ މިނެޓުގައި އާސެނަލް އަށް ލަނޑު ޖަހައި ލީޑު ނަގައިދިނީ ވިކްޓަ ޔޯކެރޭޝް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ގަބްރިއެލް މަގާޅައެސް އެވެ.

އޭގެ ފަހުން ފުރަތަމަ ހާފުގެ 35 ވަނަ މިނެޓުގައި އާސެނަލް އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އާސެނަލް އަށް ޖަހައިދިނީ ޑެކްލަން ރައިސް އެވެ. އެއީ ލިއާންޑްރޯ ޓްރޮސާޑް ތަނަވަސްކޮށްދިން ފުރުސަތެއްގައި ރައިސް ޖެހި ލަނޑެކެވެ.

މޮޅާއެކު އާސެނަލް އިން ވަނީ އެއް ވަނައިގައި ހަތް ޕޮއިންޓުގެ ލީޑެއް ނަގައިފަ އެވެ. މިހާތަނަށް ލީގުގައި ކުޅެފައިވާ 10 މެޗުން އާސެނަލް އަށް ލިބެނީ 25 ޕޮއިންޓެވެ. އާސެނަލް އަށް ވުރެ އެއް މެޗު މަދުން ކުޅެގެން ދެ ވަނައިގައި ބޯންމައުތަށް 18 ޕޮއިންޓު ލިބޭއިރު، ދެން ކުޅޭ މެޗުން މޮޅުވެ ފަރަގު ކުޑަ ކުރުމުގެ ފުރުސަތު ބޯންމައުތަށް އޮންނާނެ އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، ބާންލީއާ ދެކޮޅަށް އާސެނަލްގެ ކުޅުންތެރިން ދެއްކި ކުޅުމާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. ބާންލީ މެޗުގެ ފުރަތަމަ ހާފަކީ، މި ސީޒަންގެ މެޗެއްގެ ފުރަތަމަ ހާފުގައި އާސެނަލް އިން ދެއްކި އެންމެ ރަނގަޅު ކުޅުމަށް ކަމަށް ވެސް އާޓެޓާ ވަނީ ފާހަގަ ކޮށްފަ އެވެ.

ޚާއްސަކޮށް ފުރަތަމަ ހާފުގައި އާސެނަލް އިން ދެ ލަނޑު ޖަހާފައިވާއިރު، އިތުރު ދެ ލަނޑު ނުވަތަ ތިން ލަނޑު ޖަހާނެ ފުރުސަތު އެ ޓީމަށް ލިބުނު ކަމަށް ވެސް އާޓެޓާ ބުންޏެވެ. ނަމަވެސް ދެ ވަނަ ހާފުގައި އާސެނަލް އަށް އުނދަގޫ ތަކެއް ކުރިމަތިވީ، ކޮންމެ ވެސް ވަރަކަށް ކުޅުމުގެ ފެންވަރު ދަށްވުމުން ކަމަށް އާޓެޓާ ވަނީ ބުނެފަ އެވެ.

މީގެ އިތުރުން ވާހަކަ ދައްކަމުން އާޓެޓާ ބުނެފައި ވަނީ، މިހާރު އާސެނަލް އޮތީ ރަނގަޅު މިސްރާބެއްގައި ކަމަށާއި، އޭނާ ޤަބޫލު ކުރާ ގޮތުގައި އާސެނަލްގެ ފޯމު ދަމަހައްޓަން ޖެހޭ ކަމަށެވެ. ޚާއްސަކޮށް މިހާރު ޓީމު އޮތް ހިސާބުގައި ދެމި އޮންނަން ވެސް ގިނަ މަސައްކަތް ތަކެއް ކުރަން ޖެހޭ ކަމަށާއި، ކުޅުންތެރިން އެކުގައި ކުރިއަށް ދާން ޖެހޭ ކަމަށް އޭނާ ވަނީ ފާހަގަ ކޮށްފަ އެވެ.