ބައިޑަން، ކެންސަރު ފަރުވާގެ ރޭޑިއޭޝަންގެ ފުރަތަމަ މަރުހަލާ ނިންމާލައިފި

އެމެރިކާގެ ކުރީގެ ރައީސް ޖޯ ބައިޑަން، ޕްރޮސްޓޭޓް ކެންސަރަށް ފަރުވާ ހޯދުމުގެ ރޭޑިއޭޝަންގެ ފުރަތަމަ ރުހަލާ ނިންމާލައިފި އެވެ.

އަންގާރަ ދުވަހު އެކަން ހާމަ ކޮށްފައި ވަނީ ބައިޑަންގެ ތަރުޖަމާނު އެވެ. އުމުރުފުޅުން 82 އަހަރުގެ ބައިޑަން އަށް ރޭޑިއޭޝަން އަދި ހޯމޯން ފަރުވާ ދޭން ފެށީ ނިމުނު ސެޕްޓެމްބަރު މަހު އެވެ. އޭނާގެ ކަށިތަކަށް ފެތުރިފައި ވަނީ ގަދަ ފަދަ ބާވަތެއްގެ ޕްރޮސްޓޭޓް ކެންސަރެއް ކަމަަށްވާއިރު، އެ ބަލި ދެނެ ގަނެވިފައި ވަނީ މިއަހަރުގެ މެއި މަހުގެ ތެރޭގަ އެވެ.

ބައިޑަންގެ ތަރުޖަމާނު ކެލީ ސްކަލީ އަންގާރަ ދުވަހު ވިދާޅުވެފައި ވަނީ، ރޭޑިއޭޝަން ފަރުވާގެ މަރުޙަލާއެއް ނިމިފައިވާ ކަމަށެވެ. އެހެން ނަމަވެސް، ފަރުވާގެ ކުރިއަށް ހުރި މަރުޙަލާގެ އިތުރު މައުލޫމާތެއް ހިއްސާކޮށްފައި ނުވެ އެވެ. އަދި ހަމަ އެއާއެކު، ބައިޑަންގެ މުޅި ފަރުވާ ނިމިފައިވާ ކަމެއް ވެސް ސާފެއް ނުވެ އެވެ.

މީގެ އިތުރުން ބައިޑަންގެ ދަރިކަނބަލުން އޭޝްލީ ބައިޑަން ވަނީ، ފިލަޑެލްފިއާގެ ޕެން މެޑިސިން ރޭޑިއޭޝަން އޮންކޮލޮޖީގައި އޭނާ ރަނގަބީލު ޖެހި ވީޑިއޯއެއް ސޯޝަލް މީޑިއާގައި ހިއްސާ ކޮށްފަ އެވެ. މިއީ ފަރުވާގެ މުހިންމު މަރުހަލާއެއް ނިމުމުން ބަލި މީހުން އާންމުކޮށް ކުރާ ކަމެކެވެ. އެކަން ފާހަގަކޮށް އޭޝްލީ ލިޔުއްވާފައި ވަނީ، ރަނގަބީލު ޖަހާފައިވާ ކަމަށާއި، ޕެން މެޑިސިންގެ ޑޮކްޓަރުންނާއި، ނަރުހުންޏާއި، މުވައްޒަފުންނަށް ޝުކުރު އަދާ ކުރާ ކަމަށެވެ.

އެމެރިކާގެ ރައީސް ކަމުގެ މަގާމުގައި ބައިޑަން ހުންނެވިއިރު، 2023 ވަނަ އަހަރު އޭނާ ހެއްދެވި އާންމު މެޑިކަލް ޗެކަޕަށް ފަހު، އޭނާގެ ހަމުން ވަނީ ލީޝަނެއް ނަގައިފަ އެވެ. އެއީ ބޭސަލް ސެލް ކާސިނޯމާ ކަމުގައި އޭރު ވަނީ ދެނެގަނެވިފަ އެވެ.

ހުސްވި ސެޕްޓެމްބަރު މަހުގެ ތެރޭގައި ބައިޑަން ވަނީ ހަމުގެ ކެންސަރުގެ ސާޖަރީއެއް ވެސް ކޮށްފަ އެވެ. އެ ސާޖަރީ އަކީ "މޯސް ސާޖަރީ"ގެ ނަމުން މަޝްހޫރު، އާންމުކޮށް ހަމުގެ ކެންސަރަށް ފަރުވާ ކުރުމަށް ކުރިއަށް ގެންދާ ޕްރޮސީޖާ އެކެވެ.

ބައިޑަންގެ ޕްރޮސްޓޭޓް ކެންސަރަކީ ވަރަށް ބާރަށް ފެތުރޭ ބާވަތެއްގެ ކެންސަރަކަށް ވީ ނަމަވެސް، ހޯމޯން ފަރުވާ އަށް އިޖާބަދޭ ބާވަތެއްގެ ކެންސަރެއް ކަމަށް ބައިޑަންގެ ޞިއްޙީ ޓީމުން ފާހަގަ ކޮށްފައިވެ އެވެ. އެހެންކަމުން، ފަރުވާ އިން ރަނގަޅު ނަތީޖާއެއް ފެންނާނެ ކަމުގެ އުންމީދު އޮތް ކަމަށް ވެސް އޭރު ވަނީ ފާހަގަ ކޮށްފަ އެވެ.

ބައިޑަންގެ ޞިއްޙީ ޙާލަތާ މެދު ކަންބޮޑުވުން ތަކެއް ކުރިން ވެސް އުފެދުނެވެ. އެގޮތުން ރައީސް ކަމުގައި ބައިޑަން ހުންނެވިއިރު، ޞިއްޙީ ގޮތުން އޭނާ ހުންނެވީ ރައީސް ކަމުގެ މަސްއޫލިއްޔަތު އަދާ ކުރެވޭ ޙާލަތެއްގައި ނޫން ކަމަށް ބުނެ، ގިނަ ބަޔަކު ވަނީ އެ ވާހަކަތައް ދައްކައި، ފާޑު ވެސް ކިޔައިފަ އެވެ.

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ބައިޑަން ވަނީ ދެ ވަނަ ދައުރަކަށް ވާދަ ކުރައްވަން ނިންމަވައިފަ އެވެ. ޑިމޮކްރަޓިކް ޕާޓީގެ ރިޔާސީ ޓިކެޓު ބައިޑަން އަށް ލިބިވަޑައިގެންނެވިއިރު، ރިޔާސީ ބަހުސްގެ ފުރަތަމަ ބުރުގައި ބައިޑަންގެ ފަރާތުން ފެނުނު ދަށް ޕާފޮމެންސްއާ ގުޅިގެން ވެސް ފާޑު ކިޔުން އަމާޒުވި އެވެ. ބައިޑަންއާ ވާދަ ކުރެއްވި މިހާރުގެ ރައީސް ޑޮނަލްޑް ޓްރަމްޕްއާ އެކު އޮތް ބަހުސް އަށް ފަހު، ބައިޑަންގެ ޤާބިލު ކަމާ މެދު އިތުރު ސުވާލު ތަކެއް އުފެދުނެވެ.

ބައިޑަން ނިސްބަތްވެ ވަޑައިގަންނަވާ ޑިމޮކްރެޓިކް ޕާޓީގެ ތެރޭގައި ވެސް ޚިޔާލު ތަފާތުވުން ތަކެއް އުފެދިގެން އައިއިރު، އޭގެ ދެ ހަފުތާ ފަހުން ބައިޑަން ވަނީ ރިޔާސީ ރޭހުން ވަކިވާން ނިންމަވައިފަ އެވެ.