ގަވަރުނަރު ނިއުސަމް އިށީނދެގެން އިންނެވި ގޮތުން، މީމްސް ހަދައި ފާޑު ކިޔަނީ

އެމެރިކާގެ ކެލިފޯނިއާގެ ގަވަރުނަރު ގެވިން ނިއުސަން ގޮނޑީގައި އިށީނދެން އިންގޮތާ މެދު ގިނަ ބަޔަކު ފާޑު ކިޔަން ފަށައިފި އެވެ.

ނިއު ޔޯކް ޓައިމްސް ޑީލްބުކް ސަމިޓުގައި ވާހަކަ ދައްކަވަމުން ގެންދެވިއިރު، ނިއުސަން އިންނެވި ގޮތަށް ވަނީ އެތައް ބައެއްގެ ސަމާލުކަން ވެސް ލިބިފަ އެވެ. ޑިމޮކްރަޓިކް ޕާޓީ އަށް ނިސްބަތްވާ، އުމުރުން 58 އަހަރުގެ ނިއުސަމް އިށީނދެގެން އިންނެވީ އެއް ފައި މައްޗަށް އަނެއް ފައި ލައްވައިގެން، ހަށިގަނޑަށް ވަރަށް ބޮޑު ބުރައެއް އިޙުސާސްވާ ގޮތަކަށެވެ.

އެކަމާ ގުޅިގެން ސޯޝަލް މީޑިއާގެ އެކި އެކި ޕްލެޓްފޯމް ތަކުގައި ވަނީ އެކަމަށް ސަމާލުކަން ލިބިފަ އެވެ. ސޯޝަލް މީޑިއާގެ އެކްސްގައި "ބޯޑްއީލޮންމަސްކް"ގެ ނަމުގައި ހިންގާ އެކައުންޓަކުން ބުނެފައި ވަނީ، ނިއުސަމް އަށް ވުރެ ބޮޑަށް ފިރިހެނަކު އެފަދަ ގޮތަކަށް އިށީނދެން އިންދާ ފެނިފައި ނުވާ ކަމަށެެވެ. އެކްސްގައި އަންނަނީ ނިއުސަމްގެ އެ ވީޑިއޯ ވެސް ދައުރު ވަމުންނެވެ.

އިތުރު މީހަކު ބުނެފައި ވަނީ އެފަދަ ގޮތަކަށް އިށީނދެ އިިންނަ މީހަކަށް ދެން އެހެން ކަމަކާ ނުވިސްނޭނެ ކަމަށެވެ. ގިނަ ބަޔަކު ފާހަގަ ކޮށްފައިވާ ގޮތުގައި، ނިއުސަން އިށީނދެ އިން ގޮތުގެ ސަބަބުންމ ހަށިގަނޑަށް ވެސް އެކަމުގެ އަސަރު ކޮށްފާނެ އެވެ. ސާދާ ގޮތެއްގައި ފައި ބަހައްޓައިގެން އިނުމުގެ ބަދަލުގައި، މިފަދަ ގޮތަކަށް ނިއުސަމް އިންނެވުމުން، ސޯޝަލް މީޑިއާ ގައި ވަނީ އެކަމަށް މީމްސް ވެސް ހަދައިފަ އެވެ.

ނިއުސަމް ވާހަކަ ދައްކަވަމުން ގެންދެވީ ސިޔާސީ ގޮތުން މުހިންމު މައުޟޫއަކަށް ވީ ނަމަވެސް، ގިނަ ބައެއްގެ ސަމާލުކަން އެ ވާހަކަ އަށް ނުލިބެ އެވެ. އޭގެ ބަދަލުގައި ގިނަ ބައެއްގެ ސަމާލުކަން ލިބިފައި ވަނީ ނިއުސަމް އިށީނދެ އިން ގޮތަށެވެ.

ނިއުސަމް އަކީ އެމެރިކާގެ މިހާރުގެ ރައީސް ޑޮނަލްޑް ޓްރަމްޕް އާއި، ޓްރަމްޕް ސަރުކާރުގެ ސިޔާސަތު ތަކަށް ވަރަށް ބޮޑަށް ފާޑު ވިދާޅު ވަމުން ގެންދަވާ ބޭފުޅެކެވެ. މީގެ ކުރިން ނިއުސަމް ވިދާޅުވެފައި ވަނީ ޓްރަމްޕް އަކީ ވަރަށް ހުދު މުހުތާރު ވެރިއެއް ކަމަށާއި، ޓްރަމްޕްގެ ރައީސް ކަމުގައި އެމެރިކާ ދަނީ ރަނގަޅު މިސްރާބުގައި ނޫން ކަމަށެވެ.

ސިޔާސީ ދާއިރާގެ މާހިރުން ބުނެފައިވާ ގޮތުގައި، ނިއުސަމް އަކީ 2028 ވަނަ އަހަރު އޮންނަ އެމެރިކާގެ ރިޔާސީ އިންތިޚާބުގައި ވާދަ ކުރުމުގެ ފުރުސަތު ބޮޑު ބޭފުޅެކެވެ. ޚާއްސަކޮށް ޑިމޮކްރަޓިކް ޕާޓީގެ ރިޔާސީ ޓިކެޓު ހޯއްދެވުމަށް ނިއުސަމް މަސައްކަތް ކުރައްވަމުން އަންނަ ކަމަށް ވެސް ބުނެފައިވެ އެވެ.

ނަމަވެސް، އެކަމާ ގުޅޭ ގޮތުން ނިއުސަމް މިހާތަނަށް ވިދާޅުވެފައި ވަނީ މިވަގުތު އޭނާގެ ވިސްނުން އޮތީ އަންނަ އަހަރު އޮންނަ މިޑް ޓާމް އިންތިޚާބަށެވެ. އަދި އެއަށް ފަހު ރިޔާސީ އިންތިޚާބާ މެދު ވިސްނަވާނެ ކަމަށް ނިއުސަމް ވިދާޅުވެފައިވެ އެވެ.