ނެޝަނަލް ގާޑުގެ ދެ މެމްބަރުންނަށް ހަމަލާ ދިން މީހާ އަށް ކުރަނީ ފުރަތަމަ ދަރަޖައިގެ މަރުގެ ދައުވާ

އެމެރިކާގެ ވޮޝިންޓަން ޑީސީގައި ނެޝަނަލް ގާޑުގެ ދެ މެމްބަރުންގެ ގަޔަށް ބަޑި ޖެހި ކަމަށް ތުހުމަތު ކޮށްފައިވާ އަފްޣާނިސްތާން އަށް ނިސްބަތްވާ މީހާ އަށް ކުރަނީ ފުރަތަމަ ދަރަޖައިގެ މަރުގެ ދައުވާ ކަމަށް ހާމަ ކޮށްފި އެވެ.

އެމެރިކާގެ ރިޔާސީ ގަނޑުވަރު ވައިޓް ހައުސް ކައިރީގައި ނެޝަނަލް ގާޑުގެ ދެ މެމްބަރުންނަށް އަމާޒުކޮށް ބަޑިން ހަމަލާ ދީފައިވާއިރު، އެ ދެ މެމްބަރުން ވަނީ މަރުވެފަ އެވެ. އެ މައްސަލައިގެ ތުހުމަތުގައި ހައްޔަރު ކޮށްފައި ވަނީ އަފްޣާނިސްތާން އަށް ނިސްބަތްވާ އުމުރުން 29 އަހަރުގެ ރަހުމާނުﷲ ލަކަންވަލް އެވެ.

ވޮޝިންޓަން ޑީސީގެ އެޓަރނީ ޖެރަނަލް ޖީނީން ޕިރޯ ހުކުރު ދުވަހު ވިދާޅުވެފައި ވަނީ، ހަމަލާ ދީފައި ވަނީ ލަކަންވަލް ކަމަށް ދެނެގަނެވިފައިވާ ކަމަށެވެ. އެމެރިކާގެ މީޑިއާ ތަކުގައި ބުނެފައިވާ ގޮތުގައި އޭނާ އަކީ ސީއައިއޭ އިން ޓެރަރިޒަމް ގުރޫޕެއް ކަމަށް ކަނޑައަޅާފައިވާ، ޒީރޯ ޔުނިޓްސް އަށް ނިސްބަތްވާ މެމްބަރެކެވެ.

ފޮކްްސް ނިއުސްގައި ވާހަކަ ދައްކަވަމުން ޖީނީން ޕިރޯ ވިދާޅުވެފައި ވަނީ، އޭނާގެ މައްޗަށް އިތުރު ދައުވާ ތަކެއް މިހާރު އަންނާނެކަން ކަށަވަރުވެފައިވާ ކަމަށެވެ. އަދި މީގެ ކުރިން އޭނާގެ މައްޗަށް ކޮށްފައިވާ ތުހުމަތާއި ދައުވާ، ފުރަތަމަ ދަރަަޖައިގެ މަރުގެ ދައުވާ އަކަށް ބަދަލު ކޮށްފައިވާ ކަމަށް ވެސް އޭނާ ވިދާޅުވި އެވެ. އެކަން ފާހަގަ ކުރައްވައި އޭނާ ވިދާޅުވީ، އެ ހަމަލާ އަކީ ކުރިން ރޭވިގެން ދިން ހަމަލާއެއް ކަމަށާއި، ހަމަލާ ދޭނެ މީހުން ވެސް ކުރިން ކަނޑައަޅައިގެން ދިން ހަމަލާއެއް ކަމަށެވެ.

މި މައްސަލައިގައި މީގެ ކުރިން ވާހަކަ ދައްކަވަމުން ޕިރޯ ވިދާޅުވެފައި ވަނީ، ވައިޓް ހައުސް ކައިރީގައި ތިބި ނެޝަނަލް ގާޑުގެ ގުރޫޕަކަށް ލަކަންވަލް ހަމަލާ ދީފައި ވަނީ 357 ސްމިތު އެންޑް ވެސަން ރިވޮލްވަރެއް ބޭނުން ކޮށްގެން ޖެހި ވަޒަނުން ކަމަށެވެ. އަދި އޭނާ އަކީ އެމެރިކާގެ ވޮޝިންޓަންގެ ހުޅަނގުގައި ދިރިއުޅެމުން އައި މީހެއް ކަމަށާއި، އެއްކޮޅުން އަނެއް ކޮޅަށް ދަތުރު ކުރުމަށް ފަހު ވެރި ރަށަށް އައިސްފައިވާ ކަމަށް ޕިރޯ ވިދާޅުވި އެވެ.

މި ހަމަލާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ، ތިން ވަނަ ދުނިޔޭގެ ޤައުމު ތަކުން މީހުން އެމެރިކާ އަށް ވަނުން ހުއްޓުވަން ނިންމަވައިފަ އެވެ. އަދި ކުރީގެ ރައީސް ޖޯ ބައިޑަންގެ ވެރި ކަމުގައި ދީފައިވާ އެތައް މިލިއަން ހުއްދަ ތަކެއް ވެސް ބާތިލު ކުރައްވަން ނިންމަވާފައިވެ އެވެ. މިއީ އިމިގްރޭޝަންއާ ދެކޮޅަށް ޓްރަމްޕް ގެންގުޅުއްވާ ވިސްމުގައި އިތުރު ބޮޑު ބަދަލެކެވެ.

މި ހަމަލާއާ ގުޅިގެން އެފްބީއައި، ސީއައިއޭ އަދި ހޯމް ލޭންޑް ސެކިއުރިޓީގެ ވެރިން އަދި ޓްރަމްޕް އައްޔަން ކުރައްވާފައިވާ އެހެން އޮފިޝަލުން ވިދާޅުވެފައި ވަނީ، ލަކަންވަލް އެމެރިކާ އަށް ވަނުމުގެ ފުރުސަތު ދީފައި ވަނީ ބައިޑަންގެ ސަރުކާރުން ކަމަށެވެ. އެއީ އަފްޣާނިސްތާން އިން އެމެރިކާގެ ސިފައިން ނެރުމުގައި ހިންގި ކަންތައް ތަކުގެ ތެރޭގައި ހިންގި އެސައިލަމް ޕޮލިސީ ތަކުގެ ސަބަބުން ހިނގާފައިވާ ކަމެއް ކަމަށް ބުނެފައިވެ އެވެ.