ގެދޮރުވެރިޔާ ސްކީމުގެ ދަށުން އެޕޯލޯއާއި ހަވާލުކުރި ސޯޝަލް ހައުސިންގެ މަސައްކަތް ސަރުކާރު ބަދަލުވި ފަހުން އޮތީ ހުއްޓާލާފައި: އަކްރަމް
16 އޮކްޓޯބަރު 2025 | ބުރާސްފަތި 11:17އެމްޑީޕީ ސަރުކާރުން އެޕޯލޯއާއި ހަވާލުކޮށްގެން 9 ޓަވަރު އިމާރާތްކުރަން ހަވާލުކުރިއިރު 4 ޓަވަރަކީ ސޯޝަލް ހައުސިންގ އަށް ޝަރުތުކޮށްފައިވާ މަސައްކަތެއް
އެމްޑީޕީގެ ބޯހިޔާވަހި ކަމުގެ ކޮމިޓީގެ މުގައްރިރު އަދި ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން
ގެދޮރުވެރިޔާ ސްކީމުގެ ދަށުން އެޕޯލޯ އާ ހަވާލުކުރި ސޯޝަލް ހައުސިންގެ މަސައްކަތް ސަރުކާރު ބަދަލުވި ފަހުން އޮތީ ހުއްޓާލާފައި ކަމަށް އެމްޑީޕީގެ ބޯހިޔާވަހި ކަމާ ބެހޭ ކޮމިޓީގެ މުގައްރިރު އަދި ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
ކޮމިޓީން ބޭއްވި ނޫސްވެރިން ބައްދަލުވުމުގައި ވާހަކަ ދައްކަވަމުން އަކްރަމް ވިދާޅުވީ މި ސަރުކާރުން ބޯހިޔާވަހިކަމަށް ވަރަށް އިސްކަމެއް ދޭނެކަމަށް ވިދާޅުވާ ކަމަށެވެ. ނަމަވެސް އެމްޑީޕީ ސަރުކާރުން ބޯހިޔާވަހިކަމަށް ފުލެޓް އެޅި އިރު އެޕޯލޯއާއި ހަވާލުކޮށްގެން 9 ޓަވަރު އިމާރާތްކުރަން ހަވާލުކުރެވުނު އިރު އޭގެ ތެރެއިން 4 ޓަވަރަކީ ސޯޝަލް ހައުސިންގ އަށް ޝަރުތުކޮށްފައި ހަވާލުކުރެވުނު މަސައްކަތެއް ކަމަށެވެ.
އަކްރަމް ވިދާޅުވީ އެޕޯލޯއާއެކު އެއްބަސްވެފައި ވާނީ ފުރަތަމަ ސޯޝަލް ހައުސިން ނިންމުމަށްފަހު އަމިއްލަ ފުލެޓްތައް ކުރިއަށް ގެންދިއުމަށް ޝަރުތުކޮށް ކަމަށެވެ.
އަޅުގަނޑުމެން ކިތައްމެ ފަހަރަކު ހުއްޓުވާފައި ހުންނާނެ ޕެރަލަލްކޮށް އެކަން ނުގެންދަވާތީ. އެކަމުގައި އެއިރު އިސްކޮށް އުޅުއްވި މިހާރުގެ ކެބިނެޓް ސެކްރެޓަރީ އަހުމަދު ހަބީބު. އެކަމަކު މި ސަރުކާރު އައި ފަހުން ސޯޝަލް ހައުސިންގެ ބައި ހުއްޓާލާފައި އެޕޯލޯގެ އަމިއްލަ ބައި ކުރިއަށް ގެންގޮސް ނިންމާލީ. އެއީ 600 ފުލެޓް. އެހެންވީމަ މި ބޭފުޅުން ބޯހިޔާވަހި ކަމަށް އެއްވެސް އިސްކަމެއް ނުދެއްވާކަން އިނގެނީ. އެ 600 ފުލެޓަކީ މި ސްކީމުގެ ދަށުން ލިބޭނެ ފުލެޓް.އެމްޑީޕީގެ ބޯހިޔާވަހި ކަމުގެ ކޮމިޓީގެ މުގައްރިރު އަދި ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން
އެމްޑީޕީގެ ސަރުކާރުގެ ބޯހިޔާވަހިކަމުގެ މަޝްރޫއުގެ ތެރެއިން އެޕޯލޯ އާ ހަވާލުުކުރީ 4 ކެޓަގަރީއަކަށް ހާއްސަ ކޮށްގެން 1000 ފުލެޓް އެޅުމަށެވެ. އެޕޯލޯއާ ހަވާލުކުރި ފްލެޓްތަކުގެ ތެރޭގައި އެންމެ އަގުހެޔޮކޮށް ދޫކުރަން ނިންމާފައިވާ ކައުންސިލް ހައުސިން ކެޓަގަރީ ވެސް ހިމެނެއެވެ. ދެން ހިމެނޭނީ އަތްފޯރާ ފަށުގައި ދޫކުރާ ފްލެޓްތަކާއި މެދު ފަންތި އާއި މަތީ ފަންތީގެ ފްލެޓްތަކެވެ.
މި މަސައްކަތް އެޕޯލޯއާއި ހަވާލުކުރީ އަމިއްލައަށް ފައިނޭންސް ކުރާ ގޮތަށެވެ.
