ފްލެޓުތަކަށް ކުލި ނުދެއްކުނު ނަމަވެސް ރައްޔިތުންގެ ކަރަށް މަޅި ފައްތައި ބާރުކުރުމަކީ ހައްލެއް ނޫން: ސައިފް
18 އޮކްޓޯބަރު 2026 | އާދީއްތަ 08:48ސޯޝަލް ހައުސިންގެ ކުލި ނުދެއްކޭ މީހުން ފްލެޓުތަކުން ބޭރުކުރުމުގެ ބަދަލުގައި، އެ މީހުންގެ ހާލަތު ބަލައި އިޖުތިމާއީ ރައްކާތެރިކަމުގެ ނިޒާމުގެ ތެރެއިން އެހީތެރިކަން ފޯރުކޮށްދިނުމަކީ ދައުލަތުގެ ޒިންމާއެއް ކަމަށް ކުރީގެ ކައުންސިލަރު ސައިފް ވިދާޅުވި. ގިނަ ބަޔަކަށް ކުލި ނުދެއްކެނީ ނިޒާމީ މައްސަލަތަކެއްގެ ސަބަބުން ކަމަށާއި، އާއިލާތައް މަގުމަތިކުރުމުން މުޖުތަމައަށް އޭގެ ނޭދެވޭ އަސަރުކޮށް ދައުލަތަށް އޮންނަ ބުރަ ބޮޑުވާނެކަން އޭނާ ފާހަގަކުރެއްވި
ރާއްޖެޓީވީގެ ފަލަސުރުހީ ޕްރޮގްރާމްގައި މާލެ ސިޓީ ކައުންސިލުގެ ގަލޮޅު އުތުރު ދާއިރާގެ ކުރީގެ ކައުންސިލަރު ސައިފް ފާތިހު ވާހަކަ ދައްކަވަނީ. | ރާއްޖެއެމްވީ
ސޯޝަލް ހައުސިން ދެނީ އަމިއްލަ ތަނަވަސްކަމުގައި ބޯހިޔާވަހިކަން ހޯދުމުގެ ކުޅަދާނަކަން ނެތް މީހުންނަށް ކަމަށްވާއިރު، އެފަދަ ފަރާތްތަކަށް ކުލި ނުދެއްކިގެން ފްލެޓުތަކުން ބޭރުކުރުމަކީ ސަރުކާރުގެ ގާނޫނީ ޒިންމާއެއް ނޫން ކަމަށް މާލެ ސިޓީ ކައުންސިލުގެ ގަލޮޅު އުތުރު ދާއިރާގެ ކުރީގެ ކައުންސިލަރު ސައިފް ފާތިހު ވިދާޅުވެއްޖެ އެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން ސައިފް ވިދާޅުވީ، މި ސަރުކާރަށް ސޯޝަލް ހައުސިންއާއި ސޯޝަލް ޕްރޮޓެކްޝަންގެ މަފްހޫމް އެއްގޮތަކަށްވެސް ނުވިސްނޭ ކަމަށެވެ. އަދި ސަރުކާރުން މިހާރު މަސައްކަތް ކުރަމުން ދަނީ ރައްޔިތުންގެ ކަރަށް މަޅި ފައްތައި، އެ މަޅި ބާރުކުރަމުންދާ އުސޫލަކުން ކަމަށް އޭނާ ވިދާޅުވި އެވެ.
ދުނިޔޭގެ އެހެން ގައުމުތަކުގައި ސޯޝަލް ހައުސިން ދިނުމަށްފަހު، ކުލި ނުދެއްކޭ ހާލަތްތަކުގައި އެ މީހުން މަގުމަތި ނުކުރާކަން ފާހަގަކުރައްވައި ސައިފް ވިދާޅުވީ، އޭގެ ބަދަލުގައި އެ ގޭބިސީތަކުގައި އުޅޭ މީހުންގެ އަދަދާއި، އެ މީހުންގެ އާމްދަނީއަށް އައި ބަދަލުތަކާއި، ވަޒީފާ ގެއްލިފައިވޭތޯ އަދި ކަރަންޓާއި ފެން ބިލު ފަދަ ޒަރޫރީ ޚަރަދުތައް ހަމަޖެއްސޭތޯ ބަލައި، އިޖުތިމާއީ ރައްކާތެރިކަމުގެ ނިޒާމުގެ (ސޯޝަލް ސޭފްޓީ ނެޓް) ތެރެއިން އެހީތެރިކަން ފޯރުކޮށްދޭ ކަމަށެވެ.
ކުލި ނުދެއްކިގެން މީހުން ބޭރުކޮށް މަގުމަތި ކުރުމުން އޭގެ ނޭދެވޭ އަސަރު މުޅި މުޖުތަމައަށް ކުރާނެ ކަމަށާއި، އޭގެ ބުރަ އެންމެ ފަހުން އުފުލަން ޖެހޭނީ ވެސް ދައުލަތަށް ކަމަށް ސައިފް ވިދާޅުވި އެވެ. ކުދިންތަކަކާ އެކު އަންހެނަކު މަގުމަތިވުމުން ކުދިން ގޯސް މަގަކުން ދިއުމާއި، އާއިލާތައް ބިކަވެ، ދައުލަތުގެ ބެލުމުގެ ދަށަށް ގެންދަންޖެހޭ ހާލަތްތައް މެދުވެރިވުމަކީ ދައުލަތަށް އިތުރު ބުރައަކަށް ވާނެ ކަމަށް އޭނާ ވިދާޅުވި އެވެ.
މިސާލަކަށް އެހެން ގައުމުގައި މި ހުންނަނީ ބަލާނެ އެ ގޭގައި ދިރިއުޅެނީ ކިތައް މީހުންތޯ. އެ މީހުންގެ އިންކަމް އަށް ވަނީ ކިހިނެއްތޯ؟ އޭނަ ކުރީގައި ދެއްކިފައި މިއަދު ނުދެއްކެނީ ކީއްވެގެންތޯ؟ އޭނައަށް ވަޒީފާއަށް އެބަ ބޭނުންވޭތޯ؟ އޭނައަށް އެބަ ބޭނުންވޭތޯ އިތުރު އެ ގޭގެ ބިލުތައް ދައްކަން ލާރިއެއް. އެބައޮތް ދެއްތޯ ސޯޝަލް ޕްރޮޓެކްޝަން މެކޭނިޒަމެއް. މި މެކޭނިޒަމްގެ ބޭނުމަކީ އެއްކަލަ ވެއްޓިގެން އަންނަ މީހާ ވެސް ބިންމަތީގައި ބަންލާފަ ނުޖެހި، އޭނަގެ ޒިންދަގީ އެއްކޮށް ބަރުބާދުވެގެން ނުދާ ގޮތަށް ސޭފްޓީ ނެޓެއްގެ ގޮތުގައި މި އޮންނަނީ. އެ ސޭފްޓީ ނެޓުގެ ބައެއް ދެއްތޯ ސަރުކާރުން ދޭ ސޯޝަލް ހައުސިންގއަކީ؟ ދެން އެ ތަނުން އޭނަ ބޭރުކޮށްލީމާ ކޮބާތޯ ނަތީޖާއަކީ؟ މިއީ މި އޭގެ ނަތީޖާއަކީ ސަރުކާރުން ނޫންތޯ އޭނަ ދެން ބަލަހައްޓަން ޖެހެނީސައިފް ފާތިހު
އެޗްޑީސީން 2025 ވަނަ އަހަރުގެ ޖޫން މަހު އާންމުކުރި ހިސާބުތަކަށް އިޝާރާތް ކުރައްވައި ސައިފް ވިދާޅުވީ، އެ ކޯޕަރޭޝަނުން ބަލަހައްޓާ 8,511 ފްލެޓުގެ ތެރެއިން ގަވާއިދުން ކުލި ދައްކަނީ 3,219 ފްލެޓުން ކަމަށެވެ. އަދި ބާކީ 5,099 ފްލެޓުން ގަވާއިދުން ކުލި ނުދައްކާ ކަމަށް އެ ތަފާސްހިސާބުތަކުން ދައްކާ ކަމަށް ވިދާޅުވި އެވެ.
މިއީ މަދު ބަޔަކު ގަސްދުގައި ކުލި ނުދައްކައިގެން އުޅޭ އިސްތިސްނާ ހާލަތެއް ނޫން ކަމަށާއި، މިއީ މީހުންނަށް އެ އަދަދުތައް ނުދެއްކިގެން ދިމާވާ "ސްޓްރަކްޗަރަލް" އަދި ނިޒާމީ މައްސަލައެއް ކަމަށް ސައިފް ވިދާޅުވި އެވެ.
އެހެންކަމުން ސަރުކާރުގެ ޒިންމާއަކީ އެ މީހުން ބޭރުކޮށްލުމުގެ ބަދަލުގައި، ކުލި ނުދެއްކެނީ ކީއްވެގެންތޯ ބަލައި އެކަމަށް އެހީތެރިވެވޭނެ އިންތިޒާމެއް ހަމަޖެއްސުން ކަމަށް އޭނާ ވިދާޅުވި އެވެ.
