ތަހުގީގީ ރިޕޯޓް: ރޯވެފައިވާ އިމާރާތަކަށް ކަރަންޓު ދިނީ ކާކު؟ ކަރަންޓު ނުކަނޑާ އަލިފާން ނިއްވަން އުޅުނީ ގަސްތުގައި ލަސްކުރަންތަ؟

ހައުސިންގ މިނިސްޓްރީ، ކޮންސްޓްރަކްޝަން މިނިސްޓްރީ، އަދި އެންވަޔަރަންމަންޓް މިނިސްޓްރީ ހިންގަމުންދިޔަ އިމާރާތް މުޅިން އަނދައި އަޅިއަށްވެގެންދިޔަ ނުރައްކާތެރި އަލިފާނުގެ ހާދިސާއާ ގުޅިގެން، ފުލުހުން ބޭއްވި ނޫސްވެރިންގެ ބައްދަލުވުމުގައި ހާމަކުރި މަޢުލޫމާތުތަކުންނާއި ވީޑިއޯ ފުޓޭޖްތަކުން އެތައް ސުވާލުތަކެއް ވަނީ އުފެދިފަ އެވެ. ޚާއްސަކޮށް، ހާދިސާ ހިނގި ވަގުތާއި، ސަލާމަތީ ބާރުތަކުން ޢަމަލުކުރި ގޮތާއި، އަދި ތަޙުޤީޤީ މަރުޙަލާގައި ހުރި ފުށުއެރުންތަކަކީ މިހާރު ވެސް އާންމުންގެ ބޮޑެތި ކަންބޮޑުވުންތަކެއް އޮތް ކަންކަމެވެ.

ފުލުހުން އާންމުކުރި ވީޑިއޯއިން ފުރަތަމަ މަންޒަރު ފެންނަނީ ފަތިހު 5:33 ގައެވެ. އަދި ހެނދުނު 6:13 ގައި އެތާނުގައި ތިބި ބިދޭސީން ދުވާ މަންޒަރު ފެންނައިރު، އޭގެ ފަހުން 6:17 ގައި އޮފް ޑިއުޓީގައި ހުރި އެމްއެންޑީއެފް މީހަކު ފޯނުން ގުޅައި ހާދިސާ ރިޕޯޓުކުރާ މަންޒަރު ފެނެ އެވެ. ނަމަވެސް، އެމްއެންޑީއެފްގެ ފަޔަރ ލޮރީ އެތަނަށް ދިޔަ ގަޑިއެއް ވީޑިއޯއަކުން ނުފެނެ އެވެ. އަދި ފަޔަރ ލޮރީއަށް އެތަނުގައި ހަރަކާތްތެރިވާ މަންޒަރު ފެންނަނީ  ހެނދުނު 06:35 ގައިކަމުން ހާދިސާ ރިޕޯޓުކުރި ވަގުތާއި އަލިފާން ނިއްވާ ލޮރީއަށް އެތަނަށް ދެވުނު ވަގުތާ ދެމެދު ގިނަ ވަގުތުތަކެއް ހޭދަވެފައިވާކަން ފާހގަވެއެވެ. 

އެންމެ ބޮޑު ސުވާލަކަށްވެފައިވަނީ، ފަޔަރ ކޮމާންޑް ސްޓޭޝަން އެންމެ 100 މީޓަރު ކައިރީގައި ހުރެ، ރިޕޯޓުކުރިތާ 28 މިނެޓު ފަހުން އެ ސަރަހައްދަށް ދިޔައީ ކީއްވެގެން ތޯ އުފެދޭ ސުވާލެވެ. މިހާ ބޮޑަށް ސިފައިން އެތަނަށް ދިޔުމުގައި ލަސްވީ ކީއްވެ ތޯ އުފެދޭ ސުވާލެވެ. މިއީ ބަޔަކު އަންގައިގެން ލަސްކުރި ކުރުމެއް ތޯ އުފެދޭ ސުވާލެވެ. ނުވަތަ ގަސްތުގައި، ވަކި މަގްސަދެއް ހާސިލު ކުރުމަށް ލަސްކުރި ކުރުމެއްތޯ އުފެދޭ ސުވާލެވެ. އެ ޑިސްޕެޗަށް ޗީފް އޮފް ޑިފެންސް ފޯސް، ޑިފެންސް މިނިސްޓަރު، ނުވަތަ ރައީސުލްޖުމްހޫރިއްޔާގެ ހުއްދަ ހޯދަން މަޑުކުރަން ޖެހުނީ ތޯ އުފެދޭ ސުވާލެވެ. 

އިމާރާތުގެ އެތެރޭގެ ކަންކަމަށް ބަލާއިރު، ޑިސެމްބަރު 12 ގެރޭ 00:40 ގައި އެ އިމާރާތުން އެންމެ ފަހުން ނުކުތީ މުވައްޒަފެކެވެ. އެހެންކަމަށްވާނަމަ، އެގަޑިއާ ހަމައަށް އެތަނުގައި ތިބީ ކޮންބައެއް ކަމާއި، އެމީހުން ކުރަމުންދިޔައީ ކޮން މަސައްކަތެއް ކަމާއި، އެއީ އޯވަޓައިމް މަސައްކަތުގައި ގައި ތިބި ބަޔެއްތޯ އާއި، އެކަމަށް ހުއްދަ ދިނީ ކޮން ވެރިއެއްތޯ ސާފުވާންޖެހެ އެވެ. މީގެއިތުރުން، ޑިސެމްބަރު 20 ގައި އިންޑިޔާ ގެ އަރސަން އިންވެސްޓިގޭޓަރުން އައިސް ފޮރެންސިކް ތަހުގީގު ފަށާފައިވާއިރު، ޑިސެމްބަރު 22 ގައި އެމީހުން ފުރައިގެން ގޮސްފައިވެ އެވެ. އިންޑިއާގެ މި ތަހުގީގީ ޓީމު ގެނައުން 12 ދުވަހަށް ލަސްވުމާއި، މާކުރިން އެ ސަރަހައްދު ސާފުކުރަން ހުއްދަ ދިނުމަކީ ހެކި ނައްތާލުމަށް މަގުފަހިވި ކަމެއް ކަމަށް ބެލުމުގެ ފުރުސަތު ބޮޑެވެ.

މި ހާދިސާގެ ތަންކޮޅެއް ފުނަށް ބަލާއިރު، އެންމެ ބޮޑު އިހުމާލެއް ފެންނަ އެއް ކަމަކީ، އަލިފާން ނިއްވާ މީހުން އަލިފާން ނިއްވަމުންދިޔަ އިރު އެ އިމާރާތުގެ ކަރަންޓު ކަނޑާފައި ނެތްކަމެވެ. ތަހުގީގީ އަދި ފަންނީ ނަޒަރަކުން ބަލާއިރު، އެއްވެސް ގާބިލު ފަޔަރ އޮފިސަރަކު ކަރަންޓު ނުކަނޑައި، އަލިފާން ނިއްވުމަށްޓަކައި މީހުން އިމާރާތަކަށް ނުފޮނުވާނެ އެވެ. ކަރަންޓު ހުރި އިމާރާތެއްގައި އަލިފާން ނިއްވުމުގެ މަސައްކަތް ކުރުމަކީ ފަޔަރފައިޓަރުންގެ ފުރާނައަށް ނުރައްކާވުމުގެ އިތުރުން، ކަރަންޓު ކޭބަލްތަކުން 5,500 އާއި 10,000 ޑިގްރީ ސެލްސިއަސްގެ ހޫނުމިނުގައި އާކިންގް އުފެދި، އަލިފާންގަނޑު މާ ބޮޑަށް ހަލުވިކަމާއެކު ފެތުރިގެންދާނެ ކަމެކެވެ. އިމާރާތުގެ ކޭބަލްތަކުން ޝޯޓް ސަރކިޔުޓްވުމުގެ ނިޝާންތަކާއި އިންސުލޭޝަން ފުއްޕާފައިވުން ފެނުމަކީ، މިކަމުގައި އިހުމާލުވެފައިވާ މިންވަރު ހާމަވާ ކަމެކެވެ.

މިކަމުން އުފެދޭ ސުވާލުތައް ވެސް އިންތިހާ އެވެ. ފުލުހުން ހާމަކުރި ގޮތުގައި، އެންމެ ފުރަތަމަ ހާދިސާ ހިނގި ވަގުތު އިމާރާތްތަކުން ކަރަންޓު ގޮސްފައިވެ އެވެ. އެހެން ނަމަވެސް އަލިފާން ނިއްވާ ފަޔަރފައިޓަރުން އައި އިރު، އިމާރާތުގައި ކަރަންޓު ހުއްޓެވެ. އެހެން ކަމަށް ވާނަމަ އެ އިމާރާތަށް ކަރަންޓު ދިނީ ކާކު ތޯ ބަލަން ޖެހެ އެވެ. އެފަދަ ވަގުތެއްގައި ކަރަންޓު ދީ، އިމާރާތް އިތުރަށް ރޯވުމަށް މަގުފަހި ކުރުވީ މީހަކު ބުނެގެން ތޯ ބަލަން ޖެހެ އެވެ. އިމާރާތަށް އަލުން ކަރަންޓު ދޭން ވަކި ފަރާތަކުން އެންގީ ހެއްޔެވެ؟ ކަރަންޓު ކަނޑާނުލާ އަލިފާން ނިއްވަން މަސައްކަތް ކުރީ ބަޔަކު ބުނެގެން ހެއްޔެވެ؟ ނުވަތަ އެވަގުތު ހުރި ކޮމާންޑިންގ އޮފިސަރަކީ އެކަމަށް ގާބިލު ނޫން އޮފިސަރަކީ ހެއްޔެވެ؟ އެހެން ކަމަށް ވާނަމަ އޭނާ އެތަނަށް ފޮނުވީ ކާކު ހެއްޔެވެ؟ މިއީ ހައްތަހާ ވެސް ޖަވާބު ނުލިބޭ، މުހިއްމު ސުވާލުތަކެކެވެ.  

ފުލުހުންގެ ޓެކްނިކަލް ބަސްމަގު ބޭނުންކޮށްގެން މިއީ ގަސްތުގައި ބަޔަކު ރޯކޮށްލި ހާދިސާއެއް ނޫންކަމަށް ދައްކަން އުޅުނު ނަމަވެސް، ސީލިންގުގެ އެކި ހިސާބުތަކުން ވަކިވަކި ކުދި ޕޮއިންޓްތަކުގައި އަލިފާން ހިފާފައި ހުރުމަކީ، ކްލެސިކް އަރސަން ނުވަތަ ގަސްތުގައި ރޯކޮށްލާފައިވާކަމުގެ ސާފު ހެއްކެއް ކަމަށް ބެލެވިދާނެ އެވެ. ދުނިޔޭގެ އެކި ކަންކޮޅުތަކުގައި މިފަދަ ހާދިސާތައް ތަހުގީގު ކުރި އެކްސްޕަރޓުން އެ މޭރުމުން ކަންކަން ފާހަގަ ކޮށްފައި ވެ އެވެ. ކައިރީގައި މާ ސިންގާ ކަނޑު އޮތް ނަމަވެސް، އަލިފާން ކޮންޓްރޯލްކުރަން 7 ގަޑިއިރު ނެގުމަކީ ސިފައިންގެ ނާގާބިލު ކަމެވެ. ނުވަތަ ގަސްތުގައި ކަންތައްތަކެއް ލަސްކުރުވި ކަމަކަށް ވެދާނެ ހެއްޔެވެ؟ އެހެން ކަމަށް ވާނަމަ އެކަން ކުރީ ކާކު ހެއްޔެވެ؟ އެކަމަށް އިރުޝާދު ދިނީ ކޮން ފަރާތަކުން ހެއްޔެވެ؟ 2024 ޑިސެމްބަރުގެ ފަހުން ގާތްގަނޑަކަށް 2 އަހަރު ވާން ގާތް ވެފައިވާއިރު، ފުލުހުން ބޭއްވި ނޫސްވެރިންގެ ބައްދަލުވުމުން ހަގީގަތުގައި ޖަވާބު ލިބުނު އެއްވެސް ސުވާލެއް ނެތެވެ. ސުވާލުތައް ވީ އިތުރެވެ. ކުރެވޭ ތުހުތަތުތައް ވެސް ވީ އިތުރެވެ.