ފެނަކައިގެ ހާއްސަ އޮޑިޓް ރިޕޯޓު ސިފަވަނީ އަދީބް ފައިލް ކިޔާ ފައިލްއާއި އެފްއައިޔޫ ރިޕޯޓު ނިވާކުރަން އަޅާ ސަތަރިގަނޑެއްގެ ގޮތުގައި: ޒިޔާދު
ޒިޔާދު ވިދާޅުވީ ކަމުނުދަނީ މިކަންކަން ކުރާ ސްޕީޑު ކަމަށާއި އެހެން ނަމަވެސް ކޯޓުން އެކަން ކުރި ސްޕީޑު ވަރަށް ބާރު ކަމަށް
ވައިކަރަދޫ ދާއިރާގެ މެމްބަރު ޙުސެއިން ޒިޔާދު
ފެނަކަ ކޯޕަރޭޝަންގެ ހާއްސަ އޮޑިޓް ރިޕޯޓު ސިފަވަނީ އަދީބް ފައިލް ކިޔާ ފައިލް އާއި، އެފްއައިޔޫ ރިޕޯޓު ނިވާކުރަން އަޅާ ސަތިރަގަނޑެއްގެ ގޮތުގައި ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.
އޮޑިޓަރ ޖެނެރަލްގެ އޮފީހުން ކޮށްފައިވާ ފެނަކަ ކޯޕަރޭޝަން ލިމިޓެޑްގެ ހާއްސަ އޮޑިޓް ރިޕޯޓުން ފާހަގަވާ ކޮރަޕްޝަންގެ އަމަލުތައް ތަހުގީގުކޮށް ފިޔަވަޅުއެޅުން އަވަސްކުރުމަށް ގޮވާލައި ހުށަހަޅާފައިވާ ގަރާރަށް ބަހުސް ކުރައްވާ ޒިޔާދު ވިދާޅުވީ، އޮޑިޓަރ ޖެނެރަލް އެއް ކަނޑައަޅާފައި ގާނޫނުއަސާސީން ބާރުތަކެއްދީފަ އަދި އެކަމަށް ގާނޫނުތަކެއް ހެދިފައި ހުންނައިރުގައި ފެނަކައިގެ ހާއްސަ އޮޑިޓް ރިޕޯޓު ނިކުތީ މިސަރުކާރަށްވެސް ދެ އަހަރުވީ ފަހުން ކަމަށެވެ. ޒިޔާދު ވިދާޅުވީ މި ސްޕީޑުގައި މައްސަލަ އުޅޭކަމަށާއި އެއްސަރުކާރެއް ނިމި އަބަދުވެސް ނިމުނު ސަރުކާރުުގެ ކަންކަން ބަލަން އޮޑިޓަރ ޖެނެރަލް އެއް ކަނޑައަޅަނީ ކަމަށް ވަންޏާ ދެ އޮޑިޓަރ ޖެނެރަލް ދައުލަތަށް ބޭނުންވާ ކަމަށެވެ.
އަޅުގަނޑު ފާހަގަކުރަން އޮޑިޓަރ ޖެނެރަލް މިކަހަލަ ހާއްސަ ރިޕޯޓެއް ހާއްސަ ހާލަތްތަކުގައި ހާއްސަ ގޮތްގޮތައް ނެރޭ ނެރުމުގައި އެބަތުހުމަތުކުރެވޭ އެހެން ކަހަލަ ކަންކަމަށް މިސާލަކަށް ވަހުމް އަޅުގަނޑުމެންގެ ހިތުގައި އެބަ އުފެދޭ. މިސާލަކަށް މީގެކުރިން ނިކުތް އެފްއައިޔޫ ރިޕޯޓާއި ހަމަ އެހެން އަދީބް ފައިލް ކިޔާ އެއްޗެއް. އަޅުގަނޑަށް ސިފަވަނީ މީ އޭގައި އަޅަމް ނިވާކުރަން އަޅާ ސަތަރިގަނޑެއްގެ ގޮތުގަ މި ރިޕޯޓު. މީގަ ގޯހެއް ނުހިނގައެކޭ ނޫން އަޅުގަނޑު މިދަންނަވަނީ ، އިއްޒަތްތެރި ރައީސް މިކަންކަން ކުރަންހުރޭ ރަނގަޅު ވަގުތާއި ރަނގަޅު ގަޑިއާހުސައިން ޒިޔާދު
އޮޑިޓް ރިޕޯޓެއް ނިކުންނަ ކަމަށް ވާނަމަ އެއަށް ފިޔަވަޅު ނޭޅި ދާނެ ހިސާބު އިނގޭކަން ފާހަގަކުރައްވާ ޒިޔާދު ވިދާޅުވީ މިއަދުވެސް މާލިއްޔާތު ކޮމެޓީގައި މޯލްޑިވްސް ގޭސްގެ ބޭފުޅަކު 250000 (ދެލައްކަ ފަންސާސް ހާސް) ޑޮލަރުން ވައްކަން ކުރި ވާހަކަ އެބައޮތް ކަމަށެވެ. އެހެން ނަމަވެސް އެބޭފޫޅަކަށް އަދަބެއްވެސް ނުދެވޭ ކަމަށާއި އެޅި ފިޔަވަޅަކީ ޗެކު ފޮތް އަތުލައި އެސްޓީއޯއަށް ބަދަލުކުރުން ކަމަށް ޒިޔާދު ވިދާޅުވި އެވެ. އަދި އެބޭފުޅާއަށް އިތުރު އެއްވެސް ފިޔަވަޅެއް ނޭޅޭ ކަމަށާއި އެބޭފުޅާ ހަމަ އެ މަގާމުގައި އަދިވެސް ހުންނެވި ކަން ޒިޔާދު ފާހަގަކުރެއްވި އެވެ.
ޒިޔާދު ވިދާޅުވީ ހަގީގަތުގައި މިއަދު ގޭސްގެންނަށް ދީފައި އެހުރީ ކުނާ ވިޔާ ކުންފުންޏަކަށް ކަމަށެވެ. އަދި އެޗްޑީސީގެ ކޮރަޕްޝަންގެ ވާހަކަ ވަރަށް ބާރަށް ފެތުރިގެން ދިޔަކަމަށާއި އެކަމަށްވެސް ފިޔަވަޅެއް ނޭޅި އޮޑިޓް ރިޕޯޓެއްވެސް ނާންނަ ކަމަށް ޒިޔާދު ވިދާޅުވި އެވެ. މިކަން ކަމަށް ދެން އަންނަ ވެރިއަކު ހާއްސަ ރިޕޯޓެއް ނެރެގެން މިކަންކަން ހައްލު ނުވާނެ ކަމަށްވެސް ޒިޔާދު ވިދާޅުވި އެވެ.
އޭގެ އިތުރުން ޒިޔާދު ވިދާޅުވީ ކަމުނުދަނީ މިކަންކަން ކުރާ ސްޕީޑު ކަމަށާއި އެހެން ނަމަވެސް ކޯޓުން އެކަން ކުރި ސްޕީޑު ވަރަށް ބާރު ކަމަށެވެ. އަދި މީގެ ކުރީގެ ފެނަކައިގެ އެމްޑީއެއް ޑޮލަރު މާރުކުރި މައްސަލަ މިހާރުވެސް ކޯޓުގައި އޮތް ކަން ފަނޑީޔާރަށްވެސް އެނގޭނެ ކަމަށާއި އެ މައްސަލަވެސް އޮއްވާ އޭގެ ފަހުން ފެނަކައިގެ އެމްޑީއަކަށް ހުކުމެއް އައުމަކީ އިންސާފު ކަމަކަށް ގަބޫލު ނުކުރެވޭ ކަމަށް ޒިޔާދު ވިދާޅުވި އެވެ.
ނަގުދު ފައިސާއެއް ނޫން މިވަގުތު ކޮރަޕްޝަނަށް އެންމެ ބޮޑަށް ލިބޭ އެއްބާރަކަށް ވަނީ ކުރީގެ ސަރުކާރު. އަބަދުވެސް އެސަރުކާރު އަނެއް ސަރުކާރުގެ ނުވަލުގައި ހަމަ ކުރާނެ ކަމެއް އިއްޒަތްތެރި ރައީސް ކުރަނީ. މިވާހަކަ ދެއްކީމާ އެމީހާ އެބަޖަހާ ދޫޏިދޫ ޖަލަށް ސޯޅަ ދުވަހަށް، އަބްދީ އެބަހުއްޓޭ އަދިވެސް އެމްޑީއަކަށް މޯލްޑިވްސް ގޭސްގަ. ދެލައްކަ ފަންސާސް ހާސް ޑޮލަރު ގެއްލިފަވީ، ވީތަނެއް ނޭންގެ. އެވާހަކަ ދައްކަން ޔާސިރު އަބްދުއްލަތީފް ނިކުތީމަ އޭނައަށް ސޯޅަ، ސައުގޫބް ނިކުތީމަ އޭނައަށް ސޯޅަ ދުވަސް ޖަލު، ސޮލާހު ނުކުތީމަ އޭނައަށް ސޯޅަ ދުވަސް ޖަލު އަޒީމް ނުކުތީމަ އޭނައަށްވެސް ސޯޅަ ދުވަސް ޖަލު ޖުމާނުވެސް ޖަލުގަ ޝާކިރުވެސް ޖަލުގަ މިވާހަކަ ދައްކަން ނުކުތީމަވައިކަރަދޫ ދާއިރާގެ މެންބަރު ހުސައިން ޒިޔާދު
ޒިޔާދު ވިދާޅުވި މުޒާހަރާ ކުރަނީ ވެރިކަން ވައްޓާލަން ނޫން ކަމަށާއި މުޒާހަރާ ކުރަނީ ކަންކަން އަވަސް ވޭތޯ އާއި ގޯސް ކަންކަން އިސްލާހު ކުރަން ކަމަށެވެ. އޭގެ ނަތީޖާ އަކީ މުވައްޒަފުންގެ މުސާރަ ބޮޑު ވުމާއި ނުލިބި ހުރި ފައިސާ ލިބުން ކަމަށް ޒިޔާދު ވިދާޅުވި އެވެ. ޒިޔާދު ވިދާޅުވީ ނޮވެމްބަރު 17 ގައި އަނެއްކާވެސް ނިކުންނާނަން ކަމަށާއި އޮޑިޓް ރިޕޯޓު ނެރޭވަރަކަށް ނެރެންވީ ކަމަށެވެ.
ޒިޔާދުގެ ވާހަކަ ނިންމާލީ އެމްޑީޕީގެ މުޒާހަރާއިން ހައްޔަރު ކުރި މީހުން ވަގުތުން ވަގުތަށް ދޫކޮށްލުމަށް ގޮވާލަމުންނެވެ.
