ބަޖެޓު ފާސް ކުރުމުގައި ޙައްލެއް ނުހޯދި އެމެރިކާގެ ސަރުކާރު ހުއްޓުމަކަށް އައިސްފައިވާއިރު، އިދިކޮޅު ޑިމޮކްރަޓިކް ޕާޓީ އަށް ނިސްބަތްވާ ސްޓޭޓް ތަކުގެ ފަންޑިން އުނި ކުރަން އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފި އެވެ.

އެމެރިކާގެ ސަރުކާރު ވަގުތީ ގޮތުން ހުއްޓުމަކަށް އައިސްފައިވާއިރު، އެ މައްސަލަ އަށް ޙައްލު ހޯދުމަށް ވެރިކަން ކުރަމުން އަންނަ ރިބަޕްލިކަނުންނާއި، އިދިކޮޅު ޑިމޮކްރަޓުން ދެ ދުވަސް ވަންދެން މަސައްކަތް ކުރިއިރު ވެސް، ސެނެޓުން ބަޖެޓު ފާސް ކުރެވިފައި ނުވެ އެވެ.

ބުދަ ދުވަހު ސެނެޓުގައި ވޯޓަށް އެހި ރިޕަބްލިކަންގެ ބިލު ބޭރުވެފައި ވަނީ 55 ވޯޓު، 45 ވޯޓުންނެވެ. އެ ބިލުގައި ހުށަހަޅާފައި ވަނީ ނޮވެމްބަރު މަހުގެ 21 ވަނަ ދުވަހާ ހަމައަށް ސަރުކާރުގެ ބަޖެޓު އިތުރު ކުރުމަށެވެ. ޑިމޮކްރަޓިކް ޕާޓީ އަށް ނިސްބަތްވާ މެމްބަރުންގެ ތެރެއިން ދެ މެމްބަރަކާއި، އަމިއްލަ މެމްބަރުންގެ ތެރެެއިން އެއް މެމްބަރު ވަނީ އެ ބިލަށް ތާއީދުކޮށް ވޯޓު ދީފަ އެވެ.

ޑިމޮކްރަޓުން ހުށަހެޅި ބިލުގައި ހިމެނެނީ ސަރުކާރުގެ ބަޖެޓު އިތުރު ކުރުމާއެކު، 1.5 ޓްރިލިއަން އެމެރިކާ ޑޮލަރުގެ ހެލްތުކެއާ ޚަރަދު ހިމެނޭ ޕްރޮގްރާމް އެކެވެ. އެ ބިލު 53 ވޯޓު، 47 ވޯޓުން ބޭރުވެފައިވާއިރު، ރިޕަބްލިކަން ޕާޓީ އަށް ނިސްބަތްވާ ހުރިހާ މެމްބަރުން ވަނީ ބިލާ ދެކޮޅަށް ވޯޓު ދީފަ އެވެ.

އެހެންކަމުން އެމެރިކާގެ ސަރުކާރު ހުއްޓިފައިވާ ޙާލަތަށް އައިސްފައިވާއިރު، ޑިމޮކްރަޓިކް ޕާޓީ އަށް ނިސްބަތްވާ ސްޓޭޓް ތަަކަށް އަމާޒުކޮށް ފިޔަވަޅު އަޅާނެ ކަމުގެ އިންޒާރު ދެއްވުމަށް ފަހު، ޓްރަމްޕް ގެންދަވަނީ އެކަން ތަންފީޒު ކުރައްވަމުންނެވެ. އެމެރިކާގެ ރިޔާސީ ގަނޑުވަރު، ވައިޓް ހައުސްގެ ބަޖެޓު ޑިރެކްޓަރު ރަސެލް ޓީ ވޯޓް ވިދާޅުވެފައި ވަނީ، ޑިމޮކްރަޓިކް ސްޓޭޓް ތަކަށް ކަނޑައަޅާފައިވާ 26 ބިލިއަން އެމެރިކާ ޑޮލަރުގެ އިންފްރާސްޓްރަކްޗާ ފަންޑިން މަޑު ޖައްސާލާނެ ކަމަށެވެ.

އެގޮތުން އޭގެ ތެރޭގައި ނިއު ޔޯކް ސިޓީގައި ޓްރާންސްޕޯޓް މަޝްރޫއު ތަަކަށް ކަނޑައެޅިފައިވާ 18 ބިލިއަން އެމެރިކާ ޑޮލަރާއި، ކެލިފޯނިއާ، ވޮޝިންޓަން އަދި ހަވާއި ފަދަ 16 ސްޓޭޓަކަށް ކަނޑައަޅާފައިވާ އަށް ބިލިއަން އެމެރިކާ ޑޮލަރުގެ "ގްރީން" ފަންޑިން ވެސް ހިމެނެ އެވެ.

ހަމަ އެހެންމެ، ސަރުކާރު ހުއްޓިފައިވާ ޙާލަތުގައި މުވައްޒަފުން ވަޒީފާ އިން ވަކި ކުރަން ޖެހިދާނެ ކަމަށް އެމެރިކާގެ ނައިބު ރައީސް ޖޭޑީ ވޭންސް ވެސް ވަނީ ވިދާޅުވެފަ އެވެ. އެކަމުގެ އިންޒާރު ވޭންސް ދެއްވާފައިވާއިރު، އަސާސީ ޚިދުމަތްތައް ދެމެހެއްޓުމަށްޓަކައި ބައެއް ދާއިރާ ތަކުން ޚަރަދު ކުޑަ ކުރަން ޖެހޭނެ ކަމަށް ވޭންސް ވިދާޅުވެފައިވެ އެވެ.

މިޗިގަން ޔުނިވާސިޓީގެ ޕަބްލިކް ޕޮލިސީ ލެކްޗަރަރ ސްޓެފަނީ ލައިސަރ ވިދާޅުވެފައި ވަނީ، އެ ޙާލަތުގެ ސަބަބުން އެމެެރިކާގެ އިޤްތިޞާދަށް ނޭދެވޭ އަސަރު ކުރަމުން އަންނަ ކަމަށެވެ. ހަމަ އެހެންމެ، އިންވެސްޓްމަންޓުތައް ލަސްވެ، ލޯނުގެ އިންޓްރެސްޓް ރޭޓު މަތިވެ އަދި އިދާރީ ބުރަތައް އިތުރު ވަމުންދާ ކަމަށް ވެސް އޭނާ ފާހަގަ ކުރެއްވި އެވެ.

އެމެރިކާގެ ސެނެޓުގެ މައިނޯރިޓީ ލީޑަރު ޗަކް ޝުމާ ވަނީ ރައީސް ޓްރަމްޕް އެމެރިކާގެ ރައްޔިތުން "ރާޒުވާ ކުޅި ބައެއްގެ" ގޮތުގައި ބޭނުން ކުރަމުންދާ ކަމަށް ވިދާޅުވެ، އެކަމަށް ފާޑު ވިދާޅުވެފަ އެވެ. އަދި ޑިމޮކްރަޓުން ހުށަހަޅާފައިވާ ހެލްތުކުއާ ސަބްސިޑީތަކަކީ ރައްޔިތުންގެ އެދުމާ އެއްގޮތަށް ހުށަހަޅާފައިވާ ކަންކަން ކަމަށް ވެސް އޭނާ ވިދާޅުވި އެވެ.

އެހެން ނަމަވެސް، ރިޕަބްލިކަން ޕާޓީގެ ސެނެޓު މެޖޯރިޓީ ލީޑަރު ޖޮން ތޫން ވިދާލުވެފައި ވަނީ، އެ މައްސަލައިގައި ފުރިހަމަ ޒިންމާ ޑިމޮކްރަޓުން ނަގަން ޖެހޭނެ ކަމަށެވެ. އަދި ޑިމޮކްރަޓުން ރައީސް ޓްރަމްޕް އަށް ކުރާ ނަފުރަތުގެ ސަބަބުން އެ ޕާޓީގެ ވިސްނުން ވެސް ގެއްލިފައިވާ ކަމަށް އޭނާ ވިދާޅުވި އެވެ.

އެމެރިކާގެ ސަރުކާރަށް އައި މި ހުއްޓުން ކިހާ ދުވަހަކަށް ދެމިގެން ދާނެކަން މިވަގުތު ސާފެއް ނުވެ އެވެ. ބައިޕާޓިސަން ޕޮލިސީ ސެންޓަރުގެ މައުލޫމާތު ތަކަށް ބަލާއިރު، 1980 ވަނަ އަހަރުން ފެށިގެން 14 ފަހަރެއްގެ މަތިން ސަރުކާރުގެ ހިންގުން ހުއްޓިފައިވެ އެވެ. އޭގެ ތެރެއިން ގިނަ ފަހަރު ސަރުކާރު ހުއްޓުމަކަށް އައިސްފައި ވަނީ ވަރަށް މަދު ދުވަސް ކޮޅަކަށެވެ.

އެމެރިކާގެ ތާރީޚުގައި އެންމެ ދިގު މުއްދަތަކަށް ސަރުކާރު ހުއްޓުމަކަަށް އައިސްފައި ވަނީ، 2018 ވަނަ އަހަރުގެ ފަހު ކޮޅާއި، 2019 ވަނަ އަހަރުގެ ކުރީ ކޮޅު އެވެ. އެއީ ގާތް ގަނޑަކަށް 34 ދުވަހުގެ މުއްދަތަކަށެވެ.