ރަޝިޔާ އާއި ޔުކްރެއިންގެ މައްސަލައިގައި ޓްރަމްޕް ވަކި އަތަކަށް ޖެހިވަޑައި ނުގަންނަވާ ކަމަށް ވައިޓް ހައުސް އިން ބުނެފި

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ހުއްޓުމަކަށް ގެނައުމަށް ކުރަމުން އަންނަ މަޝްވަރާ ތަކުގައި، އެމެރިކާގެ ރައީސް ޑޮނަލްޑް ޓްރަމްޕް ވަކި އަތަކަށް ޖެހިވަޑައި ނުގަންނަވާ ކަމަށް އެމެރިކާގެ ރިޔާސީ ގަނޑުވަރު، ވައިޓް ހައުސް އިން ބުނެފި އެވެ.

ހަނގުރާމަ ހުއްޓުމަކަށް ގެނައުމަށް އެމެރިކާާ އިން ޚާއްސަ ހުށަހެޅުމެއް ހުށަހަޅާފައިވާއިރު، އެމެރިކާ އިން މަސައްކަތް ކުރަމުން އަންނަނީ ރަޝިޔާގެ މަސްލަހަތު ހިމާޔަތް ކުރުމަށް ކަމަށް ބުނެ، އެ ޤައުމަށް ވަނީ ފާޑު ކިޔުންތައް އަމާޒުވެފަ އެވެ. އަދި އެމެރިކާގެ ރައީސް ޓްރަމްޕް ބޭނުންފުޅު ވަނީ ރަޝިޔާ އިން ބޭނުންވާ ގޮތަށް ސުލްޙަ ޤާއިމު ކުރުމަށް ކަމަށް ވެސް ގިނަ ބަޔަކު އަންނަނީ ބުނަމުންނެވެ.

ހޯމަ ދުވަހު ނޫސްވެރިންނާ ވާހަކަ ދައްކަވަމުން ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ވަނީ އެކަމަށް ވަރުގަދަ ރައްދެއް ދެއްވައިފަ އެވެ. އޭނާ ވިދާޅުވީ ހަނގުރާމަ ނިންމުމަށް އެމެރިކާ އިން ދެ ފަރާތާ ވެސް މަޝްވަރާ ކުރަމުން އަންނަނީ އެއްވަރަކަށް ކަމަށެވެ. އެހެންކަމުން، ދެ ފަރާތާ އެއްވަރަށް އެމެރިކާ އިން މަޝްވަރާ ނުކުރާ ކަމަށް ބުނެ ދައްކާ ވާހަކަ އަކީ ދޮގެއް ކަމަށް އޭނާ ވިދާޅުވި އެވެ.

ޓްރަމްޕް އާއި އޭނާގެ ސަރުކާރަށް މި ފާޑު ކިޔުންތައް އަމާޒު ކުރަމުން ދަނީ ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަން ޕާޓީގެ ތެރެއިންނެވެ. އެމެރިކާގެ ސިޔާސީ މަޝްރަހުގައި، މި މައްސަލަ އަކީ ވަރަށް ބޮޑު ސަމާލު ކަމެއް ލިބިފައިވާ މައްސަލަ އަކަށް ވެފައިވާއިރު، ޓްރަމްޕްގެ ސަރުކާރުން ގެންދަނީ ރަޝިޔާއާ އެކު ވަރަށް ގާތްކޮށް މަސައްކަތް ކުރަމުން ކަމަށް ވެސް ތުހުމަތު ކޮށްފައިވެ އެވެ.

ލެވިޓް އިތުރަށް ވިދާޅުވެފައި ވަނީ، ރަޝިޔާ އިން ޔުކްރެއިން އަށް ދިން ހަމަލާގެ ސަބަބުން ފެށުނު ހަނގުރާމަ ނިންމުމަށް ޓްރަމްޕް ގެންދަވަނީ ވަރަށް އުންމީދާ އެކު މަސައްކަތް ކުރައްވަމުން ކަމަށެވެ. ހަނގުރާމަ ނިންމުމަށް ވަކި ޕްލޭނެއް ރޭވިފައިވާ ކަމަށާއި، އެކަން ކާމިޔާބު ކުރެވޭނެ ކަމުގެ އުންމީދު ވެސް ޓްރަމްޕް އަށް ލިބިވަޑައިގެންފައިވާ ކަމަށް ލެވިޓް ވިދާޅުވި އެވެ.

އެމެރިކާގެ ރައީސް ކަމުގެ ދެ ވަނަ ދައުރަކަށް ވަޑައިގެންނެވުމުގެ ކުރިން ވެސް ޓްރަމްޕް ވަނީ، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެންނަވާނެ ކަމަށް ވިދާޅުވެފަ އެވެ. ޚާއްސަކޮށް ރިޔާސީ އިންތިޚާބުގެ ކެމްޕެއިންގެ ތެރޭގައި ޓްރަމްޕް ވަނީ އެކަމަށް ވައުދުވެ ވަޑައިގެންފަ އެވެ.

ތަޖުރިބާކާރުން ބުނެފައިވާ ގޮތުގައި، ވައިޓް ހައުސްގެ މި ބަޔާނަކީ އެމެރިކާގެ ސިޔާސަތުތައް ސާފުކޮށް، ދެ ފަރާތަކަށް ވެސް އިންސާފުވެރިކަމާ އެކު މަސައްކަތް ކުރާކަން ދައްކުވައިދޭ ބަޔާނެއް ކަމަށެވެ. އަދި ހަނގުރާމަ ނިމުމަކަށް ގެނައުމަށް ކުރަމުން އަންނަ މަސައްކަތުގައި އެމެރިކާގެ ދައުރު ވަރަށް ބޮޑު ވާނެ ކަމަށް ވެސް ފާހަގަ ކޮށްފައިވެ އެވެ.