ކުޑަކުދިންތަކަކަށް ޖިންސީ ގޯނާ ކުރިކަމުގެ ތުހުމަތު ކުރެވޭ ޑރ.ސަނީ ފުލުހުންގެ ބެލުމުގެ ދަށަށް ގެންގޮސްފި
1 ޑިސެމްބަރު 2025 | ހޯމަ 17:21ކުރިން ސަނީ އުމަރު ވަނީ އެއަރ އިންޑިއާގެ ފްލައިޓަކުން ނިއު ދިއްލީ އަށް ފުރައިގެން ގޮސްފަ
ޑރީ ސަނީ އުމަރު
ކުޑަކުދިންތަކަކަށް ޖިންސީ ގޯނާ ކުރި ކަމުގެ ތުހުމަތު ކުރެވިފައިވާ، ފަތުރުވެރިކަމުގެ ދާއިރާގެ މަޝްހޫރު ވިޔަފާރިވެރިޔާ ސަނީ އުމަރު ފުލުހުންގެ ބެލުމުގެ ދަށަށް ގެންގޮސްފި އެވެ.
އޭނާ ފުލުހުންގެ ބެލުމުގެ ދަށަށް ގެންގޮސްފައި ވަނީ ހޯމަ ދުވަހުގެ ރޭގެ ވަގުތެއްގަ އެވެ. ފުލުހުން ވަނީ ހޯމަ ދުވަހުގެ ރޭ އޭނާ ހައްޔަރުކުރިކަން ރާއްޖެ އެމްވީ އަށް ކަށަވަރުކޮށްދީފަ އެވެ.
ނަމަވެސް އޭނާ ހައްޔަރު ކުރީ ކޮންތާކުންކަން ފުލުހުން ހާމަކޮށްދީފަ އެއް ނުވެ އެވެ. ފުލުހުން މިކަމާއި މެދު ކޮމެންޓެއް ނުކުރި ނަމަވެސް އިތުބާރު ހުރި މަސްދަރަކުން މި ނޫހަށް ކިޔާދިން ގޮތުގައި ސަނީ ހައްޔަރު ކުރީ އެއާޕޯޓުންނެވެ. ބައެއް މަސްދަރުތަކުން މައުލޫމާތު ދިން ގޮތުގައި އޭނާ ހައްޔަރުކޮށްފައި ވަނީ ރާއްޖެ އިން ފިލަން އުޅެނިކޮށް ކަމަށް ބެލެވެ އެވެ.
ކުޑަކުދިންތަކަކަށް ޖިންސީ ގޯނާ ކުރިކަމުގެ ތުހުމަތު ކުރެވިފައިވަނިކޮށް އޭނާ ވަނީ މީގެ ކުރިން ރާއްޖެ ދޫކޮށް ގޮސްފަ އެވެ. އެހެންނަމަވެސް ހޯމަ ދުވަހު އޭނާ ވަނީ އެނބުރި ރާއްޖެ އައިސްފަ އެވެ. އޭނާ އެނބުރި ރާއްޖެ އައުމުން ހައްޔަރު ކުރުމުގެ ބަދަލުގައި ފުލުހުންގެ ކާރުގައި ސުވާލުކުރަން ވަނީ ގެންގޮސްފަ އެވެ.
ފުލުހުން ބުނީ ސަނީ އުމަރުގެ މައްޗަށް ތުހުމަތުކުރެވޭ މައްސަލައާއި ގުޅިގެން ސުވާލުކުރުމަށް ފެމިލީ އެންޑް ޗައިލްޑް ޕްރޮޓެކްޝަން އަށް ހާޒިރުކުރެވިފައިވާ ކަމަށެވެ. އަދި އޭނާއަށް ކުރެވޭ ތުހުމަތުތަކާއި ގުޅިގެން ހައްޔަރު ނުކުރޭތޯ ސުވާލުކުރުމުން ފުލުހުން އެ ސުވާލަށް ޖަވާބެއް ދީފައި ނުވެ އެވެ.
ސަނީ އުމަރު އަށް ކުރެވެނީ އޭނާގެ އަންހެނުންގެ އާއިލާ އަށް ނިސްބަތްވާ ކުއްޖަކަށް ޖިންސީ ގޯނާ ކުރި ކަމުގެ ތުހުމަތެވެ. އަދި މިކަމަށް އޭނާގެ އާއިލާގެ މެދުގައި އިއުތިރާފު ވެފައިވާ ކަމަށް، ރާއްޖެ އެމްވީ އަށް މައުލޫމާތު ލިބިފައިވެ އެވެ. މިވާހަކަތައް ހުކުރު ދުވަހު ހެނދުނު ސޯޝަލް މީޑިއާ ގައި ފެތުރުމާ އެކު، ސަނީ އުމަރު ވަނީ އެއަރ އިންޑިއާގެ ފްލައިޓަކުން ނިއު ދިއްލީ އަށް ފުރައިގެން ގޮސްފަ އެވެ.
