މަސްތުގެ ހާލަތުގައި ހުރެ ފިރިހެން ދަރިފުޅަށް ޖިންސީ އަދި ޖިސްމާނީ އަނިޔާ ދިން ކަމަށް ތުހުމަތުކުރެވޭ 50 އަހަރުގެ މަންމަ އެއް ފުލުހުން ހައްޔަރުކޮށްފި އެވެ.

ފުލުހުން ހާމަކުރި ގޮތުގައި މި މައްސަލަ އެ އިދާރާއަށް ހުށަހެޅީ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުންނެވެ. ސޯޝަލް މިނިސްޓްރީން ފުލުހުންނަށް ހުށަހެޅި މައުލޫމާތުގައި ބުނެފައިވަނީ ކުޑަކުއްޖާގެ މަންމަގެ ފަރާތުން އެ ކުއްޖާއަށް ޖިންސީ އަދި ޖިސްމާނީ އަނިޔާ ލިބިފައިވާ ކަމަށް ތުހުމަތުކުރެވޭ ކަމަށެވެ.

ފުލުހުން ހާމަކުރި ތަފްސީލުތަކުގައި ބުނެފައިވާ ގޮތުގައި މި މައްސަލައިގައި ތުހުމަތުކުރެވޭ 50 އަހަރުގެ އަންހެންމީހާ މާލެ ސަރަހައްދުން ހައްޔަރުކޮށްފައިވަނީ ހޯމަ ދުވަހު އެވެ. ކުއްޖާއަށް އޭނާގެ މަންމަ ޖިންސީ އަނިޔާ ދީފައިވަނީ މަސްތުވުމަށް ބަނގުރާ ބޭނުންކޮށްގެން ކަމަށް ފުލުހުން ބުނެ އެވެ. އަދި އެ ކުއްޖާއަށް ޖިސްމާނީ ގޯނާ ވެސް ކޮށްފައިވާ ކަމަށް ފުލުހުން ބުނެފައި ވެއެވެ.

މި މައްސަލައިގައި ތުހުމަތުކުރެވޭ އަންހެންމީހާ ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ. ހޯމަ ދުވަހު ހައްޔަރުކުރި އެ އަންހެންމީހާގެ ބަންދާމެދު ގޮތް ނިންމުމަށް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް ކޯޓުން އަމުރުކޮށްފައިވާ ކަމަށް ފުލުހުން ބުންޏެވެ.

މި މައްސަލަ ފުލުހުން ދަނީ ތަހުގީގު ކުރަމުންނެވެ.