ރާއްޖެ އައުމާއެކު ސަނީ އުމަރު ހައްޔަރުނުކޮށް ގެންދިޔައީ ފުލުހުންގެ ކާރުގައި ސުވާލުކުރަން
ސަނީ އުމަރުގެ މައްޗަށް ތުހުމަތުކުރެވޭ މައްސަލައާއި ގުޅިގެން ސުވާލުކުރުމަށް ފެމިލީ އެންޑް ޗައިލް ޕްރޮޓެކްޝަން އަށް ހާޒިރުކުރެވިފައިވޭ
ސަނީ އުމަރު ވެލާނާ އެއަރޕޯޓުން ފުލުހުންގެ ބެލުމުގެ ދަށުން ކާރެއްގައި ގެންްދަނީ
ރާއްޖޭގެ ޓޫރިޒަމް ދާއިރާގައި މަޝްހޫރު އެންޓަޕްރެނަރެއްގެ ގޮތުގައި ފާހަގަވެފައިވާ ސަނީ އުމަރު ކުޑަކުދިންތަކަކަށް ޖިންސީ ގޯނާ ކުރި ކަމުގެ ތުހުމަތު ކުރެވި ފުލުހުން އެ މައްސަލަ ބަލަމުން އަންނަނިކޮށް، އޭނާ އެނބުރި ރާއްޖެ އައުމުން ހައްޔަރު ކުރުމުގެ ބަދަލުގައި ފުލުހުންގެ ކާރުގައި ސުވާލުކުރަން ގެންގޮސްފި އެވެ.
ފުލުހުން ބުނީ ސަނީ އުމަރުގެ މައްޗަށް ތުހުމަތުކުރެވޭ މައްސަލައާއި ގުޅިގެން ސުވާލުކުރުމަށް ފެމިލީ އެންޑް ޗައިލްޑް ޕްރޮޓެކްޝަން އަށް ހާޒިރުކުރެވިފައިވާ ކަމަށެވެ. އަދި އޭނާއަށް ކުރެވޭ ތުހުމަތުތަކާއި ގުޅިގެން ހައްޔަރު ނުކުރޭތޯ ސުވާލުކުރުމުން ފުލުހުން އެ ސުވާލަށް ޖަވާބެއް ދީފައި ނުވެ އެވެ.
ސަނީ އެނބުރި ރާއްޖެ އައިސްފައިވަނީ ކުޑަކުދިންތަކަކަށް ޖިންސީ ގޯނާ ކުރިކަމުގެ ތުހުމަތު ކުރެވިފައިވަނިކޮށް ރާއްޖެއިން ފިލައިގެން ދިޔަކަމަށް އަޑު ފެތުރިފައިވަނިކޮށެވެ. ސަނީ އުމަރު އަށް ކުރެވެނީ އޭނާގެ އަންހެނުންގެ އާއިލާ އަށް ނިސްބަތްވާ ކުއްޖަކަށް ޖިންސީ ގޯނާ ކުރި ކަމުގެ ތުހުމަތެވެ. އަދި މިކަމަށް އޭނާގެ އާއިލާގެ މެދުގައި އިއުތިރާފު ވެފައިވާ ކަމަށް، ރާއްޖެ އެމްވީ އަށް މައުލޫމާތު ލިބިފައިވެ އެވެ.
މިވާހަކަތައް ހުކުރު ދުވަހު ހެނދުނު ސޯޝަލް މީޑިއާ ގައި ފެތުރުމާއެކު، ސަނީ އުމަރު ވަނީ އެއަރ އިންޑިއާގެ ފްލައިޓަކުން ނިއު ދިއްލީ އަށް ފުރައިގެން ގޮސްފަ އެވެ.
ސޯޝަލް މިޑިއާގައި އާންމުވެފައިވާ ވީޑިއޯތަކުން ފެންނަނީ ވެލާނާ އެއަރޕޯޓުގެ އިންޓަރނޭޝަނަލް އެރައިވަލްސް އިން އޭނާ ފުލުހުންނާ އެކު ނުކުމެގެން އައިތަނެވެ. އަދި އެތަނުގައި އޮތް ފުލުހުންގެ ކާރަކަށް އޭނާ ގެންގުޅުނު ހޭންޑް ލަގޭޖް ބަހައްޓާފައި އެރުމުން، އެތަނުން ކުލަ ހެދުމުގައި ހުރި މީހަކު އެ ލަގެޖާއެކު ކާރަށް އަރާތަން ފެނެ އެވެ.
