ފަހު ވަގުތު އާސެނަލް އިން ސިޓީއާ އެއްވަރު ކޮށްފި
ލީގުގައި މިހާތަނަށް ކުޅެފައިވާ ފަސް މެޗުން 10 ޕޮއިންޓާ އެކު އާސެނަލް އޮތީ ދެ ވަނައިގަ އެވެ. ލީގުގައި ކުޅުނު ފަސް މެޗުން ހަތް ޕޮއިންޓާ އެކު ސިޓީ އޮތީ ނުވަ ވަނައިގަ އެވެ.
މެޗުގައި ލަނޑު ޖެހުމަށް ފަހު އާސެނަލްގެ މާޓިނެލީ އުފާ ފާޅު ކުރަނީ
އިނގިރޭސި ޕްރިމިއާ ލީގުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުން، ފަހު ވަގުތު އާސެނަލް ސަލާމަތް ވެއްޖެ އެވެ.
އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އާދީއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ސިޓީ އިން ލަނޑު ޖަހައި ކުރި ހޯދާފައި ވަނިކޮށް، އާސެނަލް އިން ވަނީ ފަހު ވަގުތު ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.
މެޗު ފަށައިގެން ނުވަ ވަނަ މިނެޓުގައި ސިޓީ އިން ވަނީ އާސެނަލް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ސިޓީ އަށް ޖަހައިދިނީ އެ ޓީމަށް ކުޅެމުން އަންނަ ނޯވޭގެ ފޯވާޑު އާލިން ހަލަންޑް އެވެ. އެ ލަނޑު ޖަހަން ހާލަންޑް އަށް ފުރުސަތު ތަނަވަސްކޮށްދިނީ ޓިޖާނީ ރެއިންޖާސް އެވެ.
މެޗުގެ ނަތީޖާ ހަމަހަމަ ކުރުމަަށް އާސެނަލް އިން ކުރި މަސައްކަތް އެ ޓީމަށް ކާމިޔާބު ކުރެވުނީ، މެޗުގެ ފަހު ވަގުތުގެ ތެރޭގަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އާސެނަލް އަށް ނަތީޖާ ހަމަހަމަ ކޮށްދިނީ ގަބްރިއެލް މާޓިނެލީ އެވެ.
މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، މެޗުގައި ރަނގަޅަށް ކުޅުނީ އާސެނަލްގެ ކުޅުންތެރިން ކަމަށެވެ. އޭނާ ބުނީ މުޅި މެޗު ކޮންޓްރޯލް ކޮށްގެން ކުޅުނީ އާސެނަލް އިން ކަމަށާއި، އާސެނަލްގެ ކުޅުންތެރިންނާ މެދު އޭނާ ފަޚުރުވެރިވާ ކަމަށެވެ. ނަމަވެސް، މެޗުން މޮޅު ނުވުމުން ނުތަނަވަސްވެފައި ހުރި ކަމަށް އާޓެޓާ ބުންޏެވެ.
ސިޓީގެ ކޯޗު ޕެޕް ގާާޑިއޯލާ ބުނެފައި ވަނީ، މެޗުގެ ނަތީޖާ އަކީ ވަރަށް އިންސާފުވެރި ނަތީޖާއެއް ކަމަށެވެ. އޭނާ ބުނީ ޖުމުލަ ގޮތެއްގައި އާސެނަލް އިން މެޗުގައި ރަނގަޅަށް ކުޅެފައިވާ ކަމަށެވެ. ގާޑިއޯލާ ބުނީ މެޗުގައި ސިޓީގެ ކުޅުންތެރިންގެ ފަރާތުން ހުށިޔާރު ކަމެއް ފެނިފައިވާ ކަމަށާއި، ސިޓީ އިން ބައެއް ކަންކަން ރަނގަޅު ކުރަން ޖެހިފައިވާ ކަމަށެވެ.
ލީގުގައި މިހާތަނަށް ކުޅެފައިވާ ފަސް މެޗުން 10 ޕޮއިންޓާ އެކު އާސެނަލް އޮތީ ދެ ވަނައިގަ އެވެ. ލީގުގައި ކުޅުނު ފަސް މެޗުން ހަތް ޕޮއިންޓާ އެކު ސިޓީ އޮތީ ނުވަ ވަނައިގަ އެވެ.
