ފުރަތަމަ ޑިވިޝަންގައި އޮޑި އަށް ރަނގަޅު ފެށުމެއް

ދިރާގު ދިވެހި ޕްރިމިއާ ލީގުގައި އޮޑި ސްޕޯޓްސް ކުލަބު އިން ކުޅުނު ފުރަތަމަ މެޗުގައި ޔުނައިޓެޑު ވިކްޓަރީގެ މައްޗަށް ކުރި ހޯދައި، ފުރަތަމަ ޑިވިޝަންގެ ފެށުން ވަރުގަދަ ކޮށްފި އެވެ.

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އޮޑި އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި އެ ޓީމުން އެއް ލަނޑު ޖެހިއިރު، އަނެއް ތިން ލަނޑު ވެސް ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި އޮޑި އަށް ލީޑު ނަގައިދިނީ ޢަބްދުﷲ ލޫތު އިބްރާހީމް އެވެ. ދެ ވަނަ ހާފު ފަށައިގެން ހަތް ވަނަ މިނެޓުގައި އޮޑިގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އިބްރާހީމް ވަޙީދު ޙަސަން އެވެ.

އޭގެ ފަހުން މެޗުގެ 76 ވަނަ މިނެޓުގައި އޮޑިގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ އަހްޒަމް ރަޝީދު އެވެ. އަދި މެޗުގައި އޮޑިގެ ހަތަރު ވަނަ ލަނޑު، މެޗުގެ 89 ވަނަ މިނެޓުގައި ޖެހީ މުޒުދާން ޙަސަން އެވެ.

މިއީ އެންމެ ފަހުން އޮތް ދެ ވަނަ ޑިވިޝަންގެ ފުޓުބޯޅަ މުބާރާތް ކާމިޔާބު ކުރި އޮޑި އިން ފުރަތަމަ ޑިވިޝަންގައި ކުޅުނު ފުރަތަމަ މެޗެވެ. އޮޑި އިން ފުރަތަމަ ޑިވިޝަންގެ ޖާގަ ހޯދީ އެންމެ ފަހުން އޮތް ދެ ވަނަ ޑިވިޝަންގައި ފައިނަލްގައި ވިކްޓަރީ ސްޕޯޓްސް ކުލަބުގެ މައްޗަށް ކުރި ހޯދައިގެންނެވެ.

ލީގުގައި އޮޑި އަށް ދެން އޮންނާނީ ކުލަބު ވެެލެންސިއާއާ ދެކޮޅަށް ކުޅޭ މެޗެވެ.