އަލްބޭނިއާގެ ސަރުކާރުން އެ ގައުމުގެ ކެބިނެޓަށް ދުނިޔޭގެ ފުރަތަމަ އާޓިފިޝަލް އިންޓެލިޖެންސް (އޭއައި) މިނިސްޓަރު އައްޔަނު ކޮށް އެ ގައުމުގެ ޕާލިމެންޓުގައި ފުރަތަމަ ފަހަރަށް އޭނާ ވާހަކަ ދައްކައިފިއެވެ.

ޕާލިމެންޓަށް އޭނާ ދިން ބަޔާނުގައި އޭނާ ވަނީ އޭނާގެ ޒިންމާތައް ބަޔާންކޮށް، "އަހަރެން މިތާ މިހުރީ އިންސާނުން ރިޕްލޭސް ކުރަން ނޫން" ކަމަށާއި، "އެހެނަސް އިންސާނުންނަށް އެހީތެރިވުމަށް" ކަމަށް ބުނެފައެވެ.

ދުނިޔޭގެ ފުރަތަމަ އޭއައި މިނިސްޓަރު ކެބިނެޓަށް އައްޔަން ކުރީ ހުސްވި ހަފްތާ ގައި އަލްބޭނިއާގެ ބޮޑުވަޒީރު އެޑީ ރާމާ އެވެ.

"ބައެއް މީހުން ބުނެފި އަހަރެން 'ޤާނޫނު އަސާސީއާ ޚިލާފު' އޭ، އެއީ އަހަރެންނަކީ އިންސާނެއް ނޫން ވީމާ،" އަލްބޭނިއާ ބަހުން 'އިރު' މާނަ ކުރެވޭ ޑިއެލާ ގެ ނަންދީފައިވާ މިނިސްޓަރު ވީޑިއޯ އެއްގައި ޕާލިމެންޓަށް ބުންޏެވެ. މި ވީޑިއޯގައި އޭނާ ފެނުނީ އަލްބޭނިއާގެ ސަގާފީ ހެދުމެއް ލައިގެން ހުރި އަންހެނެއްގެ ގޮތުގައެވެ.

"އަހަރެން ތިބާ އަށް ހަނދާން ކޮށްދޭނަން، ޤާނޫނު އަސާސީއަށް އޮތް ޙަޤީޤީ ނުރައްކާ އަބަދުވެސް އޮންނަނީ މެޝިންތަކުގެ ސަބަބުންނެއް ނޫން، އެހެނަސް ބާރުގައި ތިބޭ މީހުންގެ އިންސާނިއްޔަތުކަން ނެތް ނިންމުންތަކުގެ ސަބަބުން،" ކަމަށް ޑިއެލާ ބުންޏެވެ.

ފާއިތުވި ހަފްތާގައި ބޮޑުވަޒީރު ރާމާ ވިދާޅުވީ އޭއައި މިނިސްޓަރާ ހަވާލު ކުރެވޭނީ ސަރުކާރުގެ ހުރިހާ ބީލަންތަކާ ގުޅޭ ނިންމުންތައް ނިންމުމަށް ކަމަށާއި، އެއީ "ސައްތައިން ސައްތަ ކޮރަޕްޝަނުން އެއްކިބާވެފައިވާ،" ނިންމުންތަކެއް ކަމުގައި ހެދުމުގެ ބޭނުމުގައި ކަމަށެވެ.

ޓްރާންސްޕޭރެންސީ އިންޓަނޭޝަނަލްގެ ކޮރަޕްޝަން އިންޑެކްސްގައި، ކަރަޕްޝަންގެ މައްސަލަ ބޮޑު އަލްބޭނިއާ ވަނީ 180 ޤައުމުގެ ތެރެއިން 80 ވަނައިގައެވެ.

ކަރަޕްޝަން އާ ދެކޮޅަށް މަސައްކަތް ކުރުމަށް އައްޔަނު ކުރި އާޓިފިޝަލް އިންޓެލިޖެންސް މިނިސްޓަރު ގެ މައްސަލައިގައި އިދިކޮޅު ފަރާތްތަކުން ވަނީ ރުޅި ގަދަވެފައެވެ.

"މި މަޤްޞަދަކީ ސަމާލުކަން ހޯދުން ނޫން އެހެން އެއްވެސް ކަމެއް ނޫން،" ކޮރަޕްޝަންގެ ތުހުމަތު ކުރެވިފައިވާ ކުރީގެ ބޮޑުވަޒީރު އަދި އިދިކޮޅު ލީޑަރު ސެލީ ބެރީޝާ ވިދާޅުވިއެވެ.

"ޑިއެލާއާ އެކު ކޮރަޕްޝަން ހުއްޓުވުމަކީ ކުރެވޭނެ ކަމެއް ނޫން،" އޭނާ އިތުރަށް ވިދާޅުވިއެވެ.

"ޑިއެލާ ކޮންޓްރޯލް ކުރާނީ ކާކު؟ ޑިއެލާއަކީ ޤާނޫނު އަސާސީއާ ޚިލާފު އެއްޗެއް، އަދި ޑިމޮކްރެޓިކް ޕާޓީން މި މައްސަލަ ޤާނޫނު އަސާސީ އާ ޚިލާފު ކަމަށް ކަނޑައަޅަން ކޯޓަށް ހުށަހަޅާނެ،" އޭނާ ވިދާޅުވިއެވެ.

ކޮރަޕްޝަނާ ދެކޮޅަށް ކުރެވޭ މަސައްކަތަކީ އަލްބޭނިއާ ޔޫރަޕިއަން ޔޫނިއަން އަށް ވަނުމަށް ކުރާ މަސައްކަތުގައި ވަރަށް މުހިންމު ކަމެކެވެ.

ބޮޑުވަޒީރު ރާމާގެ އަމާޒަކީ 2.8 މިލިއަން މީހުން ދިރިއުޅޭ ބޯލްކަން ސަރަހައްދުގެ މި ޤައުމު 2030 ވަނަ އަހަރާ ހަމައަށް ޔޫރަޕިއަން ޔޫނިއަން ގައި ބައިވެރި ކުރުމެވެ.