ޓައިމް މެގަޒިނުން 2025 ވަނަ އަހަރުގެ "ޕާސަން އޮފް ދަ އިޔަރ" އަށް އާޓިފިޝަލް އިންޓެލިޖެންސް (އޭއައި) ގެ ފަރުމާވެރިން ހޮވައިފި އެވެ.

ބުރާސްފަތި ދުވަހު ޓައިމް މެގެޒިން އިން އިއުލާނު ކުރި ގޮތުގައި ޕާސަން އޮފް ދަ އިޔަރ އަކީ އިންސާނުންގެ ހަޔާތް ބައްޓަން ކުރުމުގައި ނުފޫޒު ގަދަ ފަރާތްތަކަށް ސަމާލު ކަން ލިބޭ ބާރުގަދަ ގޮތެއް ކަމަށެވެ. އެ ގޮތުން އާޓިފިޝަލް އިންޓެލިޖެންސް ފަރުމާ ކޮށް ބިނާ ކުރި ފަރާތްތަކަށް ވުރެ ބޮޑަށް އިންސާނުންގެ ހަޔާތައް ނުފޫޒު ފޯރުވި އެހެން ފަރާތްތަކެއް މި އަހަރު ނެތް ކަމަށް ޓައިމްގެ އެޑިޓަރ-އިން-ޗީފް ސޭމް ޖޭކޮބްސް ކިޔުންތެރިންނަށް ލިޔުއްވި ސިޓީއެއް ގައި ވިދާޅުވެފައި ވެއެވެ.

ޖޭކޮބްސް އޭއައި ފަރުމާކުރި ފަރާތްތައް ސިފަކުރެއްވީ "އިންސާނިއްޔަތަށް އުއްމީދާއި ކަންބޮޑުވުން ގެނެސްދޭ" ފަރާތްތަކެއްގެ ގޮތުގައެވެ.

2025 "ޕާސަން އޮފް ދަ އިޔަރ" އަދަދުގެ ކަވަރ ސްޓޯރީ ގައި ހިމެނެނީ އޭއައި އިން އަހަރުގެ ތެރޭގައި ގެނެސްފައިވާ ބޮޑެތި ކުރިއެރުން ތަކާއި އަދި "ބައެއް ފަހަރު ބިރުވެރި ގޮތްގޮތުން" ދުނިޔެ ބަދަލުކުރި ގޮތްތައް ހިމެނޭ ވާހަކަތަކެވެ.

އޭގެ އިތުރުން އޭއައި ކުރި އެރުވުމުގައި މުހިންމު ދައުރެއް އަދާ ކުރަމުންދާ ފަރާތްތަކުގެ އިންޓަރވިއުތައް ވެސް މި އަދަދުގައި ހިމަނާފައިވެއެވެ.

އޭއައި ގެ ސަބަބުން ކަންބޮޑުވާ ކަންކަމަށް މި އަދަދު ގައި ބަލާލާފައިވާއިރު، 16 އަހަރުގެ ކެލިފޯނިއާ ގެ ކުއްޖަކު އަމިއްލަ އަށް މަރުވި ހާދިސާ އެއް ތަފްސީލު ކޮށް ލިޔެފައިވެއެވެ. އެ ހާދިސާ އާ ގުޅިގެން އެ ކުއްޖާގެ މައިންބަފައިން ޗެޓްޖީޕީޓީ އުފައްދާ އޯޕަންއޭއައި އަށް ދައުވާކުރީ، އެ ކުއްޖާ މަރުވަން ދިމާވީ ޗެޓްބޮޓާ އެކު ކުރި މުއާމަލާތްތަކެއްގެ ސަބަބުން ކަމަށާއި، އެ ކުންފުނިން އެ ކުއްޖާގެ މަރަށް ޒިންމާވާން ޖެހޭނެ ކަމަށް ބުނެއެވެ.